ASEAN ເປັນເຈົ້າການ ຮັບມືຕໍ່ການປ່ຽນແປງຂອງດິນຟ້າອາກາດ
ຕໍ່ໜ້າ ຜົນກະທົບ ຈາກການປ່ຽນແປງ ຂອງ ດິນຟ້າອາກາດ ທີ່ມີຕໍ່ການພັດທະນາປະຊາຄົມ, ASEAN ໄດ້ສ້າງຂອບເຂດ ແລະ ແຜນການເຄື່ອນໄຫວເພື່ອຕ້ານການປ່ຽນແປງ ຂອງ ດິນຟ້າອາກາດ. ປັດຈຸບັນ, 10 ປະເທດ ອາຊີຕາເວັນອອກສ່ຽງໃຕ້ ລ້ວນແຕ່ເຂົ້າຮ່ວມສົນທິສັນຍາຂອບການປ່ຽນແປງ ຂອງ ດິນຟ້າອາກາດ ຂອງ ສະຫະປະຊາຊາດ (UNFCCC) ແລະ ສັນຍາ ປາຣີ ກ່ຽວກັບການປ່ຽນແປງ ຂອງ ດິນຟ້າອາກາດ.
ອາຊີຕາເວັນອອກສ່ຽງໃຕ້ ແມ່ນພາກພື້ນທີ່ສຳຄັນ ສໍາລັບການດໍາເນີນການດ້ານສະພາບອາກາດ. ການປ່ອຍອາຍພິດ ຂອງ ພາກພື້ນກວມປະມານ3%ຂອງການປ່ອຍອາຍພິດທົ່ວໂລກ, ແຕ່ອາດສູງເຖິງ 5% ໃນປີ 2030. ເຖິງວ່າປະລິມານການປ່ອຍ ອາຍພິດ ຍັງໜ້ອຍ, ແຕ່ພາກພື້ນນີ້ ເປັນຂົງເຂດ ທ່ີໄດ້ຮັບຜົນກະທົບຈາກການປ່ຽນແປງ ຂອງ ດິນຟ້າອາກາດ.
ປະເທດໃນພາກພື້ນເຊັ່ນ: ມຽນມາ, ຟີລິບປິນ, ຫວຽດນາມແລະໄທເປັນປະເທດທີ່ໄດ້ຮັບຜົນກະທົບຢ່າງຮ້າຍແຮງທີ່ສຸດໃນໂລກ ກ່ຽວກັບຈຳນວນຜູ້ເສຍຊີວິດ ຈາກໄພພິບັດ ທາງທໍາມະຊາດ ໃນໄລຍະສອງທົດສະວັດ ທີ່ຜ່ານມາ. ບາງເຂດ ຂອງ ອາຊີຕາເວັນອອກສ່ຽງໃຕ້, ໂດຍສະເພາະແມ່ນເຂດຕົວເມືອງຢູ່ລຽບຕາມແຄມຝັ່ງທະເລ ໄດ້ປະສົບກັບການສູງຂຶ້ນ ຂອງ ນ້ຳທະເລ.
ທະນາຄານພັດທະນາ ອາຊີ (ADB) ໄດ້ຈັດຊື່ 19 ເມືອງຂອງອາຊີຕາເວັນອອກສ່ຽງໃຕ້ ໃນຈຳນວນ25 ເມືອງຂອງໂລກທີ່ໄດ້ຮັບຜົນກະທົບຈາກລະດັບນ້ຳທະເລສູງຂຶ້ນ, ໃນນັ້ນມີ7 ເມືອງຢູ່ ຟີລິບປິນ. ການຄົ້ນຄວ້າ ຍັງສະແດງໃຫ້ເຫັນວ່າ ຜົນກະທົບຈາກການປ່ຽນແປງ ຂອງ ດິນຟ້າອາກາດ ຕໍ່ເສດຖະກິດໃນພາກພື້ນແມ່ນໃຫຍ່ຫຼວງ. ADB ຄາດວ່າ ອາຊີຕາເວັນອອກສ່ຽງໃຕ້ ຈະສູນເສຍ11% GDP ໃນປີ 2100.
ASEAN ໄດ້ເພີ່ມການເຄື່ອນໄຫວ ໃນການສ້າງຂໍ້ລິເລີ່ມ ໃນການປ້ອງກັນການປ່ຽນແປງ ຂອງ ດິນຟ້າອາກາດ ພາຍໃນພາກພື້ນ ເຊັ່ນ: ການຫັນເປັນພະລັງງານທົດແທນ, ກະສິກຳ ແລະຄວາມປອດໄພດ້ານສະບຽງອາຫານ, ການປົກປັກຮັກສາປ່າໄມ້ ແລະ ນຳໃຊ້ທີ່ດິນ, ການຄວບຄຸ້ມຄວາມສ່ຽງຈາກໄພພິບັດ, ການອະນຸລັກຊີວະນາໆ ພັນແລະອື່ນໆ.
ASEAN ໄດ້ກໍານົດເປົ້າໝາຍຢ່າງຈະແຈ້ງ ຍິ່ງຂຶ້ນ ໃນເອກະສານແນະນຳຫຼ້າສຸດ ຂອງຕົນ. ແຜນປະຕິບັດງານ ຂອງ ASEAN ກ່ຽວກັບການຮ່ວມມືດ້ານພະລັງງານ (APAEC) 2016-2025 ໄດ້ກໍານົດເປົ້າໝາຍ ຂອງສ່ວນແບ່ງພະລັງງານທົດແທນແມ່ນ 23%ໃນການສະໜອງພະລັງງານ ທັງໝົດໃນປີ2021. ASEAN ຍັງມຸ່ງໝັ້ນ ທີ່ຈະຫຼຸດ30%ຄວາມເຂັ້ມຂົ້ນຂອງການໃຊ້ພະລັງງານ ລົງໃນປີ 2025 ອີງຕາມລະດັບປີ 2005.
ໂດຍສະເພາະແມ່ນການປ່ຽນແປງຂອງດິນຟ້າອາກາດພວມສ້າງຜົນກະທົບຕໍ່ຂະແໜງກະສິກຳ, ແມ່ນປັດໄຈເສດຖະກິດ ຕົ້ນຕໍຂອງ ອາຊີຕາເວັນອອກສ່ຽງໃຕ້. ທົ່ງນາເຂົ້າ ໃນເຂດທົ່ງພຽງແມ່ນ້ຳຂອງຄາດວ່າ ຈະຫຼຸດລົງ 6-12% ແລະ ຜົນຜະລິດ ຈະຫຼຸດລົງ 3-26% ໃນປີ 2050. ຢູ່ ອິນໂດເນເຊຍ, ຟີລິບປິນ, ໄທແລະ ຫວຽດນາມ, ການປ່ຽນແປງຂອງດິນຟ້າອາກາດຈະເຮັດໃຫ້ຜົນຜະລິດເຂົ້າຫຼຸດລົງເຖິງ 50%.
ທ່ານ ປອ Tan Siang Hee, ຜູ້ອຳນວຍການບໍລິຫານຂອງສະມາ ຄົມ CropLife ອາຊີ ໄດ້ສັງເກດວ່າ“ຊາວກະສິກອນ ໃນທົ່ວອາຊີ ຕາເວັນອອກສ່ຽງໃຕ້ກຳລັງປະເຊີນໜ້າກັບສິ່ງທ້າທາຍທີ່ຮ້າຍແຮງກວ່າເກົ່າ ແລະ ເປັນໄພຂົ່ມຂູ່ຕໍ່ຊີວິດການເປັນຢູ່ຂອງພວກເຂົາ”.
ເມື່ອບໍ່ດົນມານີ້, ກະຊວງກະສິກຳຟີລິບປິນ ກ່າວວ່າ ການສູນເສຍດ້ານກະສິກຳ ຂອງປະເທດ ຍ້ອນພາຍຸNoruຄາດວ່າ ຈະສູງເຖິງ 1,29ຕື້ ເປໂຊ (21,9 ລ້ານໂດລາສະຫະລັດ). ພາຍຸ Noruສົ່ງຜົນກະທົບຕໍ່ເນື້ອທີ່ຜະລິດກະສິກຳ ກວ່າ 141.312 ເຮັກຕາ, ສ້າງຄວາມເສຍຫາຍໃຫ້ແກ່ຊາວກະສິກອນແລະຊາວປະມົງ 82.158 ຄົນ. ລັດຖະບານ ຟີລິບປິນ ຍອມຮັບວ່າ: ພາຍຸ Noru ໄດ້ເຮັດໃຫ້ຈຳນວນເຂົ້າ ແລະ ເຂົ້າສານ (ປະມານ 90% ຂອງ ຜະລິດຕະພັນກະເສດ ທັງໝົດ72.231 ໂຕນ) ຖືກເສຍຫາຍ. ອີງຕາມອົງການຄຸ້ມຄອງບໍລິການ ທໍລະນີສາດ ແລະ ດາລາສາດ ຟີລິບປິນ, ລົມພາຍຸໄດ້ເຮັດໃຫ້ຢ່າງໜ້ອຍ 8 ຄົນເສຍຊີວິດ, ກວ່າ 74.000 ຄົນ ໄດ້ອົບພະຍົບ ອອກຈາກເຮືອນ ຂອງ ເຂົາເຈົ້າ ກ່ອນທີ່ພາຍຸຈະພັດເຂົ້າມາ.
ຢູ່ ຫວຽດນາມ, ເພື່ອຮັບມືກັບພາຍຸ ເຊິ່ງຖືວ່າ ຮຸນແຮງທີ່ສຸດໃນຮອບ 20 ປີຜ່ານມາ, ບັນດາແຂວງ ແຕ່ ກວາງບິ່ງຫາບິ່ງຖ້ວນ ໄດ້ກວດກາ ແລະອົບພະຍົບ ປະຊາຊົນ 868.230 ຄົນ. ບັນດາທ້ອງຖິ່ນ ຍັງໄດ້ຮຽກຮ້ອງ ແລະຊີ້ນຳກຳປັ່ນ 57.800 ກວ່າລຳພ້ອມກັບແຮງງານ 300.000 ຄົນ ເພື່ອຫຼົບຈາກພາຍຸ. ຄວາມເສຍຫາຍທີ່ເກີດຈາກພາຍຸ ໄດ້ຫຼຸດລົງ ຍ້ອນການນຳແຕ່ຂັ້ນສູນກາງລົງຮອດທ້ອງຖິ່ນ ຍາມໃດກໍ່ຕັ້ງໃຈຮັບປະກັນຄວາມປອດໄພ ໃນຊີວິດຂອງ ປະຊາຊົນ ຢ່າງແທ້ຈິງ. ພ້ອມທັງໄດ້ເສີມຂະຫຍາຍບົດບາດຕັ້ງໜ້າຂອງປະຊາຊົນ ໃນການປ້ອງກັນໄພນ້ຳຖ້ວມ ແລະ ພາຍຸ.
ຮັບຮູ້ວ່າ ການປ່ຽນແປງ ຂອງ ດິນຟ້າອາກາດ ເປັນບັນຫາລະດັບໂລກ, ບໍ່ມີປະເທດ ຫຼື ອົງການໃດສາມາດ ດໍາເນີນການໄດ້ດ້ວຍຕົນເອງ, ASEAN ໄດ້ເພີ່ມທະວີ ການຮ່ວມມືກັບບັນດາປະເທດຄູ່ຮ່ວມມື ແລະ ອົງການຈັດຕັ້ງສາກົນ ໃນຫຼາຍປີມານີ້. ບັນດາໂຄງ ການຕອບໂຕ້ການປ່ຽນແປງ ຂອງ ດິນຟ້າອາກາດ ກັບບັນດາປະເທດຄູ່ຮ່ວມມືເຊັ່ນ: ສ ອາເມລິກາ, ຍີ່ປຸ່ນ, ສເກົາຫຼີ, ສປ ຈີນ, ອົດສະຕຣາລີ...ຜ່ານບັນດາກົນໄກຮ່ວມມືໃນຫຼາຍປີມານີ້ໄດ້ຮັບຜົນດີຫຼາຍຢ່າງ.
ບົດ: VNP ສັງລວມ - ພາບ: VNA - ແປໂດຍ: ຢືຟຽນ