ASEAN: ການສົ່ງອອກສິນຄ້າປະກົດສີສັນຄວາມຈະເລີນ
ປີ 2023 ຜ່ານໄປ ເຕັມໄປດ້ວຍຄວາມຫຍຸ້ງຍາກ ແລະ ສິ່ງທ້າທາຍຂອງພື້ນຖານເສດຖະກິດໂລກ, ກ້າວເຂົ້າສູ່ປີ 2024, ຍ້ອນການຟື້ນຕົວຂອງຕະຫຼາດໂລກ, ບັນດາຄຳສັ່ງສິນຄ້າສົ່ງອອກເພີ່ມຂຶ້ນ, ສະນັ້ນ ການເຄື່ອນໄຫວນຳເຂົ້າ ແລະ ສົ່ງອອກສິນຄ້າ ຂອງບັນດາປະເທດ ອາຊີຕາເວັນອອກສ່ຽງໃຕ້ ປະກົດເຫັນສີສັນ ຄວາມຈະເລີນ.
ການຟື້ນຕົວ ຂອງ ການສົ່ງອອກທີ່ແຂງແຮງກວ່າຈະມີຜົນກະທົບຕໍ່ເສດຖະກິດທີ່ເພິ່ງພາການຄ້າຫຼາຍກວ່າເກົ່າ. ພື້ນຖານເສດຖະກິດ ບັນດາປະເທດ ASEAN ທີ່ມີອັດຕາສ່ວນການສົ່ງອອກສິນຄ້າໃນ GDP ສູງກວ່າ ປະກອບມີ ສິງກະໂປ (110%), ຫວຽດນາມ (91%) ແລະ ມາເລເຊຍ (86%). ການສົ່ງອອກສິນຄ້າແມ່ນກຳລັງໜູນທີ່ມີຄວາມໝາຍຢູ່ ໄທ (58%), ແຕ່ໜ້ອຍກວ່າອິນໂດເນເຊຍ (22%) ແລະ ຟີລິບປິນ (20%), ເຊິ່ງເປັນບັນດາປະເທດມີຕະຫຼາດພາຍໃນທີ່ໃຫຍ່ກວ່າ.
ການສົ່ງອອກ ເອເລັກໂຕຣນິກ ພວມນຳໜ້າໃນຂະບວນການຟື້ນຕົວດ້ານການຄ້າ ແລະ ກວມເອົາອັດຕາສ່ວນໃຫຍ່ຂອງການສົ່ງອອກຈາກຟີລິບປິນ, ມາເລເຊຍ, ຫວຽດນາມ ແລະ ສິງກະໂປ ແລະ ຢູ່ລະດັບທີ່ໜ້ອຍກວ່າ ໄທ. ການສົ່ງອອກ ເອເລັກໂຕຣນິກ ກວມເອົາປະມານ 58% ຍອດມູນຄ່າການສົ່ງອອກຂອງ ຟີລິບປິນ; 38% ໃນ ມາເລເຊຍ; 31% ໃນ ຫວຽດນາມ ແລະ 23% ໃນ ສິງກະໂປ.
ກະສິກຳແມ່ນໜຶ່ງໃນບັນດາຂົງເຂດທີ່ສຳຄັນທີ່ສຸດ ຂອງບັນດາປະເທດ ອາຊີຕາເວັນອອກສ່ຽງໃຕ້ ເມື່ອກວມເອົາກວ່າ 25% GDP ຂອງບາງປະເທດ. ສຳລັບ ມຽນມາ, ຂົງເຂດນີ້ສະໜອງກວ່າ 40% ຈໍານວນວຽກເຮັດທັງໝົດ.
ASEAN ແມ່ນແຫຼ່ງສະໜອງຜະລິດຕະພັນ ກະເສດຕົ້ນຕໍຂອງຫຼາຍຕະຫຼາດໃຫຍ່ໃນທົ່ວໂລກ. ຕາມປົກກະຕິແລ້ວ, ອິນໂດເນເຊຍ, ໄທ ແລະ ມາເລເຊຍ ປູກຢາງພາລາປະມານ 3,3 ລ້ານໂຕນຕໍ່ປີ, ກວມເອົາປະມານ 70% ຂອງປະລິມານການຜະລິດຂອງໂລກ.
ອິນໂດເນເຊຍ ແລະ ມາເລເຊຍ ເປັນສອງປະເທດ ຜະລິດນໍ້າມັນ ປາມຫຼັກ ໃນພາກພື້ນອາຊີຕາເວັນອອກສ່ຽງໃຕ້ ແລະ ສະໜອງ ເກືອບ 90% ປະລິມານການຜະລິດຂອງໂລກ. ນອກຈາກນັ້ນ, ອິນໂດເນເຊຍ ຍັງເປັນປະເທດທີ່ຜະລິດ ໂກໂກ້ ໃຫຍ່ອັນດັບ 3 ຂອງໂລກ, ເມື່ອສະໜອງປະມານ 450.000 ໂຕນຕໍ່ປີ ແລະ ເປັນປະເທດ ຜະລິດຊາໃຫຍ່ອັນດັບ 8 ຂອງໂລກ ຕາມການ ຕີລາຄາ ຈາກອົງການອາຫານ ແລະ ການກະເສດແຫ່ງ ສະຫະປະຊາຊາດ (FAO).
ຟີລິບປິນເປັນປະເທດຜະລິດ, ສົ່ງອອກໝາກພ້າວ ແລະ ໝາກນັດລາຍໃຫຍ່ທີ່ສຸດຂອງໂລກ ແລະ ເປັນປະເທດຜະລິດນ້ໍາຕານ ລາຍໃຫຍ່. ອີງຕາມຂໍ້ມູນທີ່ຫາກໍ່ໄດ້ເປີດເຜີຍໂດຍສໍານັກງານສະຖິຕິແຫ່ງຊາດ ຟີລິບປິນ, ໃນໄຕມາດທໍາອິດຂອງປີ 2024 ການສົ່ງອອກສິນຄ້າ ແລະ ການບໍລິການຂອງປະເທດໄດ້ເພີ່ມຂຶ້ນ 7.5%.
ຫວຽດນາມ ແລະ ໄທ ແມ່ນສອງປະເທດນຳໜ້າ ໃນການສົ່ງອອກເຂົ້າສານ. ຫວຽດນາມ ແລະ ອິນໂດເນເຊຍ ແມ່ນສອງປະເທດ ມະຫາອຳນາດໃນການສົ່ງອອກໝາກພິກໄທ. ຫວຽດນາມ, ໄທ, ມາເລເຊຍ ແມ່ນ 3 ປະເທດສົ່ງອອກໝາກຖົ່ວລຽນໃຫຍ່ທີ່ສຸດໃນພາກພື້ນ.
ໃນໄຕມາດທີ I ປີ 2024, ວົງເງິນສົ່ງອອກສິນຄ້າຂອງຫວຽດນາມ ຄາດວ່າບັນລຸ 93,06 ຕື້ ໂດລາສະຫະລັດ, ເພີ່ມຂຶ້ນຢ່າງແຂງແຮງ ແລະ ສະໝໍ່າສະເໝີ ໃນ 3ກຸ່ມສິນຄ້າຄື: ຜະລິດ ຕະພັນກະເສດ, ປ່າໄມ້ ແລະ ສິນໃນນໍ້າຄາດວ່າ ບັນລຸ ໄດ້ 8,46 ຕື້ ໂດລາສະຫະລັດ, ເພີ່ມ 23,8%; ກຸ່ມສິນຄ້າອຸດສາຫະກຳປຸງແຕ່ງ ແລະ ປະດິດສ້າງຄາດວ່າ ບັນລຸໄດ້79,6 ຕື້ ໂດລາສະຫະລັດ, ກວມເອົາ 86% ຍອດວົງເງິນສົ່ງອອກ; ກຸ່ມສິນຄ້າ ເຊື້ອເພີງ ແລະ ຊັບພະຍາກອນແຮ່ທາດ ຄາດວ່າບັນລຸໄດ້ 1,13 ຕື້ ໂດລາສະຫະລັດ, ເພີ່ມຂຶ້ນ12,1% ເມື່ອທຽບໃສ່ໄລຍະດຽວກັນ ຂອງປີ 2023. ນອກຈາກນັ້ນ, ການເຄື່ອນໄຫວສົ່ງອອກເຄື່ອງ ຕໍ່າແຜ່ນຕັດຫຍິບ ໃນໄຕມາດທີ I ປີ 2024 ມີສັນຍານ ທ່ີດີ.
ໃນໄຕມາດທີ I ປີ 2024, ອິນໂດເນເຊຍ ແມ່ນຕະຫຼາດ ນຳເຂົ້າໃຫຍ່ອັນດັບທີ 3 ຂອງ ຫວຽດນາມ ໃນພາກພື້ນ ASEAN (ຖັດຈາກ ໄທ 2,6 ຕື້ ໂດລາສະຫະລັດ ແລະ ມາເລເຊຍ 2,41 ຕື້ ໂດລາສະຫະລັດ). ເປັນຄັ້ງທຳອິດ ຫວຽດນາມ ໄດ້ກາຍເປັນ ປະເທດສົ່ງອອກເຂົ້າສານລາຍໃຫຍ່ທີ່ສຸດໄປຍັງຕະຫຼາດ ສິງກະໂປ ແລະ ເປັນຄູ່ຮ່ວມມືສົ່ງອອກສິນໃນນໍ້າ ໃຫຍ່ອັນດັບ 5 ຂອງ ປະເທດນີ້. ວົງເງິນການສົ່ງອອກຂອງ ສິງກະໂປ ບັນລຸກວ່າ 165,94 ຕື້ ໂດລາ ສິງກະໂປ, ເພີ່ມຂຶ້ນ 4,45% ເມື່ອທຽບໃສ່ ໄລຍະດຽວກັນຂອງປີ 2023.
ທະນາຄານກາງ ມາເລເຊຍ ປະກາດວ່າຈັງຫວະການເຕີບໂຕ GDP ຂອງ ມາເລເຊຍ ໃນໄຕມາດທີ 1 ປີ 2024 ບັນລຸ 4,2% ເມື່ອທຽບໃສ່ໄລຍະດຽວກັນ ຂອງປີ 2023, ສູງສຸດໃນປີຜ່ານມາ. ຜົນໄດ້ຮັບນີ້ແມ່ນມາຈາກການຟື້ນຕົວ ຂອງຄວາມຕ້ອງການ ສິນຄ້າ ສົ່ງອອກຈາກບັນດາຄູ່ຮ່ວມມືຕ່າງປະເທດ, ກໍ່ຄື ການບໍລິໂພກ ເອກະຊົນຂະຫຍາຍຕົວທີ່ແຂງແຮງ. ການສົ່ງອອກຂອງມາເລເຊຍ ໄດ້ເພີ່ມ 5,2% ເມື່ອທຽບໃສ່ການຫຼຸດລົງ 7,9% ໃນໄຕມາດທີ 4 ຂອງປີ 2023.
ການສົ່ງອອກຂອງພາກພື້ນ ASEAN ກັບມາມີການເຕີບໂຕຂຶ້ນອີກ, ເຊິ່ງຈະຊ່ວຍຂະຫຍາຍ ການເກີນດຸນການຄ້າ, ເພີ່ມທະວີການສຳຮອງເງິນຕາຕ່າງປະເທດ ແລະ ຮັກສາຄວາມໝັ້ນຄົງຂອງເງິນຕາໃນປີ 2024, ສົ່ງຜົນໃຫ້ເສດຖະກິດ ASEAN ຈະຟື້ນຕົວຢ່າງແຂງແຮງ.
ບົດ: VNP - ພາບ: VNA - ແປໂດຍ: ຢືຟຽນ