ບັນດາປະເທດ ອາຊີຕາເວັນອອກສ່ຽງໃຕ້ ເພີ່ມທະວີການຮ່ວມມືດ້ານການຄຸ້ມຄອງ ໄພພິບັດທາງທຳມະຊາດ
ດ້ວຍພູມມີປະເທດ ທີ່ຫຼາກຫຼາຍ ຈາກແຜ່ນດິນໃຫຍ່ ໄປຈົນເຖິງປະເທດໝູ່ເກາະ, ອາຊີຕາເວັນອອກສ່ຽງໃຕ້ ຕ້ອງທົນທຸກທໍລະມານຈາກໄພພິບັດທາງທຳມະຊາດ ຢ່າງຮຸນແຮງທີ່ສຸດ. ເພື່ອສ້າງພາກພື້ນທີ່ປອດໄພຍິ່ງຂຶ້ນ, ບັນດາປະເທດ ASEAN ຈະຕ້ອງເຮັດວຽກຮ່ວມກັນ ເພື່ອແບ່ງປັນ ແລະ ເພີ່ມທະວີການປະສານງານ ເພື່ອປ້ອງກັນໄພພິບັດ ທາງທຳມະຊາດ.
ໃນອາຊີຕາເວັນອອກສ່ຽງໃຕ້, ໄທ, ລາວ, ຫວຽດນາມ, ອິນໂດເນເຊຍ ແລະ ມາເລເຊຍ ແມ່ນຈຸດຮ້ອນທີ່ຈະເກີດໄພນ້ຳຖ້ວມ, ເກີດນ້ຳກັດເຊາະຊາຍຝັ່ງທະເລ ແລະ ໄຟໄໝ້ປ່າ. ໄທ ພວມໄດ້ຮັບຜົນກະທົບຈາກການປ່ຽນແປງ ຂອງດິນຟ້າອາກາດ ໃນຫຼາຍຂົງເຂດ, ຕ້ອງຮັບມືກັບຄວາມຮ້ອນ ແລະ ໄພແຫ້ງແລ້ງ. ຖ້າລະດັບນ້ຳທະເລສູງຂຶ້ນປະມານ 2 ມ, ຈະສົ່ງຜົນສະທ້ອນຕໍ່ພົນລະເມືອງ 28% ແລະ ຕົວເລກ GDP 52%. ຢູ່ ອິນໂດເນເຊຍ, ລະດັບນ້ຳທະເລ ທີ່ເພີ່ມຂຶ້ນ ຈະສົ່ງຜົນສະທ້ອນ ຕໍ່ເຂດຖ່ານຂີ້ຕົມ ທີ່ໃຊ້ໃນການຜະ ລິດນ້ຳມັນປາມ ເປັນສ່ວນຫຼາຍ.
ກະຊວງປ້ອງກັນຄວາມສະຫງົບ ສົມທົບກັບແຂວງ ກວາງນິງ ຈັດຕັ້ງການຊ້ອມ ຕ້ານອັກຄີໄພ, ຄົ້ນຫາ ແລະ ກູ້ໄພຂັ້ນກະ ຊວງ ໃນປີ 2023. ມີຜູ້ເຂົ້າຮ່ວມກວ່າ 2.000 ຄົນ ແລະ ພາຫະນະ ທີ່ທັນສະໄໝ 128 ຄັນ ຈາກບັນດາກຳລັງແຂວງ ກວາງນິງ, ກະຊວງປ້ອງກັນຄວາມສະຫງົບ ແລະ ກະຊວງປ້ອງກັນ ປະເທດ. ພາບ: VNA
ເຊັ່ນດຽວກັນຢູ່ ຫວຽດນາມ, ບ່ອນທີ່ຈຳນວນຜະລິດຕະພັນກະສິ ກຳ ມີບົດບາດສຳຄັນຢູ່ເຂດທົ່ງພຽງແມ່ນ້ຳຂອງ ແລະ ແມ່ນ້ຳແດງ, ລະດັບນ້ຳທະເລ ທີ່ສູງຂຶ້ນ 2 ມ ຈະສົ່ງຜົນສະທ້ອນຢ່າງຮ້າຍແຮງຕໍ່ປະຊາຊົນ. ໃນຂະນະດຽວກັນ, ຕາມຂໍ້ມູນດາວທຽມ, ເຂດຊາຍຝັ່ງທະເລ ຂອງ ມາເລເຊຍ ກໍ່ຈະໄດ້ຮັບຜົນກະທົບເຊັ່ນດຽວກັນ.
ຮູບຖ່າຍຈາກດາວທຽມ ສະແດງໃຫ້ເຫັນວ່າ ຄວາມສ່ຽງ ຂອງ ໄຟ ໄໝ້ປ່າ ຢູ່ບາງປະເທດໃນ ອາຊີຕາເວັນອອກສ່ຽງໃຕ້ ແມ່ນຢູ່ໃນລະດັບທີ່ໜ້າຕົກໃຈ. ໃນນັ້ນ, ປະມານ 600 ຈຸດຮ້ອນ ຢູ່ໃນປະເທດໄທ, ສ່ວນຫຼາຍແມ່ນຢູ່ຕາມປ່າດົງ ແລະ ຫຼາຍກວ່າ 4.000 ແຫ່ງແມ່ນຢູ່ໃນ ກຳປູເຈຍ.
ອົງການພັດທະນາເຕັກໂນໂລຊີ ອາວະກາດ ແລະ ເຕັກໂນໂລຊີຂໍ້ມູນຂ່າວສານພູມສາດ ໄທ ຍັງກ່າວວ່າ ແຂວງ ການຈະນະບູລີ ຂອງ ໄທ ເປັນແຂວງທີ່ມີ ໄຟໄໝ້ຫຼາຍທີ່ສຸດ ຄືມີເຖິງ 110 ກໍລະນີ. ນອກຈາກ ໄທ ແລ້ວ, ດາວທຽມ ຍັງໄດ້ບັນທຶກຈຸດຮ້ອນຢູ່ ກຳປູເຈຍ 4.056 ຈຸດ, ມຽນມາ 979 ຈຸດ, 622 ຈຸດໃນ ລາວ ແລະ 166 ຈຸດຢູ່ ຫວຽດນາມ.
ການປ່ຽນແປງ ຂອງ ສະພາບດິນຟ້າອາກາດ ແລະ ສະພາບ ມະຫາສະໝຸດ ອູ່ນຂຶ້ນ ໂດຍມະນຸດເປັນຜູ້ສ້າງ ແມ່ນເພີ່ມຄວາມຖີ່ ແລະ ລະດັບຄວາມຮຸນແຮງ ຂອງປະກົດການດິນຟ້າອາກາດຮຸນແຮງເຊັ່ນ ພາຍຸ Yagi. ອີງຕາມ UNICEF, ເດັກນ້ອຍ 6 ລ້ານຄົນໃນອາຊີຕາເວັນອອກສ່ຽງໃຕ້ ໄດ້ຮັບຜົນກະທົບຈາກພາຍຸນີ້, ເນື່ອງຈາກຄວາມຫຍຸ້ງຍາກໃນການເຂົ້າເຖິງແຫຼ່ງນໍ້າສະອາດ, ການສຶກສາ, ການດູແລສຸຂະພາບ, ອາຫານ ແລະ ທີ່ພັກອາໄສ.
ປັດຈຸບັນ, ປະເທດ ອາຊີຕາເວັນອອກສ່ຽງໃຕ້ ຈຳນວນໜຶ່ງພວມເຂົ້າຫາ ໂຮນລັງ ເພື່ອຊອກຫາວິທີແກ້ໄຂ ເພື່ອຮັບມືກັບສະພາບ ນໍ້າທະເລຍື່ງຂຶ້ນສູງ ແລະ ໄພນ້ຳຖ້ວມ ຍ້ອນການປ່ຽນແປງ ຂອງດິນຟ້າອາກາດ. ເນື່ອງຈາກວ່າ ປະເທດ ໂຮນລັງ ມີປະສົບການຫຼາຍສິບປີໃນການຄຸ້ມຄອງນ້ໍາ, ດ້ວຍຄວາມຫວັງທີ່ຈະຊ່ວຍຫຼຸດ ຜ່ອນຄ່າໃຊ້ຈ່າຍຫຼາຍຕື້ໂດລາສະຫະລັດ ສໍາລັບລະບົບໄພພິບັດ ນໍ້າຖ້ວມ ແລະ ຄວາມເສຍຫາຍ ທີ່ປະຊາຊົນ ຢູ່ທີ່ນີ້ ຕ້ອງຮັບເອົາ.
ອີງຕາມນັກສັງເກດການ, ການທົດລອງຕຶກອາຄານລອຍຕົວ ແລະ ວິທີການປົກປັກຮັກສາແຄມທະເລ ຂອງ ໂຮນລັງ ສາມາດຊ່ວຍກຳນົດທິດໃຫ້ແກ່ຄວາມພະຍາຍາມ ຕ້ານສະພາບນໍ້າທະເລຍື່ງຂຶ້ນສູງຂອງ ອາຊີຕາເວັນອອກສ່ຽງໃຕ້.
ໃນບັນດາຫົວຄິດປະດິດສ້າງ ທີ່ນໍາໃຊ້ໃນປະເທດ ໂຮນລັງ ແມ່ນຮົ້ວກັ້ນພາຍຸ Maeslant ທີ່ຕັ້ງຢູ່ໃກ້ກັບທ່າກຳປັ່ນ Rotterdam, ເຊິ່ງໄດ້ປົກປ້ອງຊາຍຝັ່ງທະເລ ພາກໃຕ້ ຂອງປະເທດ ມາເປັນເວລາກວ່າ 25 ປີ. ຮົ້ວກັ້ນເຄື່ອນໄຫວແບບອັດຕະໂນມັດນີ້ ຈະປິດແບບອັດຕະໂນມັດ ເມື່ອລະດັບນ້ຳທະເລ ຂຶ້ນສູງກວ່າ 1,5 ມ, ປົກປັກຮັກສາປະເທດໜຶ່ງທີ່ມີເນື້ອທີ່ຕ່ຳກວ່າລະດັບນ້ຳທະເລ 40%. ຮົ້ວກັ້ນພາຍຸທີ່ຄ້າຍຄືກັນອີກແຫ່ງໜຶ່ງໃນໂລກ ແມ່ນຕັ້ງຢູ່ໃນນະຄອນ Saint Petersburg ຂອງ ຣັດເຊຍ.
ຄະນະກຳມະການຄຸ້ມຄອງໄພພິບັດ ອາຊຽນ (ACDM) ໃນໄລ ຍະ 20 ປີ ຜ່ານມາ ໄດ້ສືບຕໍ່ເປີດກວ້າງການຮ່ວມມືກັບບັນດາຄູ່ຮ່ວມມືພາຍນອກ ລວມທັງບັນດາອົງການຂອງສະຫະປະຊາຊາດ, ອົງການການເງິນຫຼາຍຝ່າຍ ແລະ ອົງການບໍ່ຂຶ້ນກັບລັດຖະບານ ອື່ນໆ. ຄວາມພະຍາຍາມນີ້ ສະແດງໃຫ້ເຫັນເຖິງຄວາມມຸ່ງໝັ້ນຂອງ ACDM ໃນການຮ່ວມມືກັບບັນດາປະເທດ ເພື່ອສ້າງຄວາມສາມາດຟື້ນຟູ ພາຍຫຼັງໄພພິບັດ ໃນພາກພື້ນ.
ອາຊີຕາເວັນອອກສ່ຽງໃຕ້ ແມ່ນໜຶ່ງໃນບັນດາສະຖານທີ່ ທີ່ໄດ້ຮັບຜົນເສຍຫາຍຢ່າງໜັກໜ່ວງທີ່ສຸດຕໍ່ການປ່ຽນແປງ ຂອງ ສະພາບດິນຟ້າອາກາດ, ເຖິງແມ່ນວ່າ ການເຄື່ອນໄຫວ ຂອງ ACDM ໄດ້ນຳມາເຊິ່ງຄວາມຄືບໜ້າ ທ່ີສຳຄັນໃນການພັດທະນາການຄຸ້ມຄອງໄພພິບັດໃນພາກພື້ນ. ແຕ່ໃນສະພາບການຄວາມສ່ຽງໄພທຳມະຊາດ ນັບມື້ນັບສູງຂຶ້ນ, ຍັງມີສິ່ງທ້າທາຍຫຼາຍຢ່າງຢູ່ຕໍ່ໜ້າ. ດ້ວຍການເຮັດວຽກຮ່ວມກັນບົນຈິດໃຈ ASEAN ໜຶ່ງດຽວ, ການຕອບໂຕ້ລວມ, ASEAN ພ້ອມແລ້ວທີ່ຈະແກ້ໄຂສິ່ງທ້າທາຍເຫຼົ່ານີ້ ແລະ ກ້າວໄປຂ້າງໜ້າ ເປັນອົງການນຳໜ້າໃນການຄຸ້ມຄອງໄພທຳມະຊາດ./.
ບົດ: VNP - ພາບ: VNA - ແປໂດຍ: ຢືຟຽນ