ນິງຖ້ວນ - ສີຂຽວໃນ "ທະເລຊາຍ"
ຫັນເປັນສີຂຽວ ເຂດ "ທະເລຊາຍ" ດ້ວຍພືດກະສິກໍາ ສະເພາະ
ນິງຖ້ວນ ຕັ້ງຢູ່ຊາຍຝັ່ງທະເລ ພາກກາງຕອນໃຕ້, ໄດ້ຖືວ່າ ເປັນເຂດ “ທະເລຊາຍນ້ອຍ” ຂອງ ຫວຽດນາມ ເນື່ອງຈາກ ພູມສັນຖານ ເປັນ ທະເລຊາຍ, ມີປະລິມານນໍ້າຝົນຕົກໜ້ອຍຕໍ່ປີ ເຮັດໃຫ້ເກີດ ໄພ ແຫ້ງແລ້ງ ແລະ ແດດຮ້ອນຕະຫຼອດປີ. ເນື້ອທີ່ດິນເປັນທະເລຊາຍ ທັງໝົດ ຢູ່ແຂວງ ນິງຖ້ວນ ມີ 41.021 ເຮັກຕາ, ກວມ 12,21% ຂອງເນື້ອທີ່ດິນທຳມະຊາດຂອງແຂວງ.
ຈາກສະພາບດິນຟ້າອາກາດ ທີ່ບໍ່ເອື້ອອຳນວຍ, ປະຊາຊົນ ຢູ່ທີ່ນີ້ໄດ້ຫັນເປັນທ່າໄດ້ປຽບ ໂດຍການປູກອາງຸ່ນ, ເປັນພືດທີ່ມີຄວາມທົນ ທານ ຕໍ່ແດດ ແລະ ແຫ້ງແລ້ງໄດ້ດີ. ເພາະສະນັ້ນ, ຈາກແຜ່ນດິນ ທີ່ມີສະພາບອາກາດທີ່ໂຫດຮ້າຍ, ນິງຖ້ວຍ ໂດຍບັງເອີນ ໄດ້ກາຍ ເປັນດິນແດນ ທີ່ເໝາະສົມກັບການປູກຕົ້ນອາງຸ່ນ.
ຕົ້ນອາງຸ່ນ ໄດ້ນຳເຂົ້າມາ ຫວຽດນາມ ແຕ່ປີ 1960 ແລະ ຖືກປູກຢູ່ສູນ ຍາໂຮ໋, ປັດຈຸບັນ ແມ່ນສະຖາບັນຄົ້ນຄວ້າຝ້າຍ ແລະ ພັດທະນາ ກະສິກຳ ຍາໂຮ໋ (ເມືອງ ນິງເຊີນ, ແຂວງ ນິງຖ້ວນ) ຈາກບັນດາແນວພັນ ອາງຸ່ນ ເຂດຮ້ອນ ແລະ ເຂດອຸ່ນ ຈາກປະເທດ ໄທ, ສ ເກົາຫຼີ ແລະ ສ ອາເມລິກາ. ປັດຈຸບັນ, ທົ່ວແຂວງ ມີເນື້ອທີ່ປູກອາງຸ່ນ ຫຼາຍປະເພດ ປະມານ 1.365 ເຮັກຕາ, ໃນນັ້ນແນວພັນ ອາງຸ່ນ ແບບດັ້ງເດີມ ແລະ ອາງຸ່ນຂຽວ NH01-48 ກວມປະມານ 80% ຂອງ ເນື້ອທີ່ທັງໝົດ. ສະເລ່ຍແຕ່ລະປີ, ນິງຖ້ວນ ສະໜອງໝາກອາງຸ່ນ ອອກສູ່ຕະຫຼາດ ປະມານ 33.800 ໂຕນ, ໃນນັ້ນໝາກອາງຸ່ນ ສົດກວມ 80% ຍອດຜະລິດຕະພັນ.
ເທດສະການອາງຸ່ນ ແລະ ເຫຼົ້າແວງ ແມ່ນງານບຸນປະເພນີ ຂອງແຂວງ ນິງຖ້ວນ, ໄດ້ຈັດຂຶ້ນທຸກໆ 2 ປີ, ເພື່ອສ້າງເຄື່ອງໝາຍການຄ້າຂອງທ້ອງຖິ່ນ, ໃນນັ້ນມີບັນດາຜະລິດຕະພັນກະເສດແມ່ນທ່າແຮງ ແລະ ມີລັກສະນະຈຳເພາະ, ນີ້ແມ່ນ ເຫດການ ວັດທະນະທຳ ເພື່ອແນໃສ່ເຊີດຊູຄວາມງາມດ້ານວັດທະນະທຳ ຂອງ ບັນດາເຜົ່າໃນແຂວງ. ປີນີ້, ງານບຸນ ຈະໄດ້ຈັດຂຶ້ນ ແຕ່ວັນທີ 13-18 ມິຖຸນາ, ຄາດວ່າ ຈະແມ່ນງານບຸນ ໃຫຍ່ສຸດເທົ່າທ່ີເຄີຍຈັດມາ.
ຜູ້ປູກອາງຸ່ນທີ່ມີຊື່ສຽງທີ່ສຸດຢູ່ ນິງຖ້ວນ ແມ່ນທ່ານ ຫງວຽນວັນມ້ອຍ, ເຈົ້າຂອງນິຄົມອາງຸ່ນ ບາມ້ອຍ ຢູ່ຕາແສງ ເຟືອກຖ້ວນ, ເມືອງ ນິງ ເຟືອກ. ເພິ່ນມີເນື້ອທີ່ປູກອາງຸ່່ນ ກິນໝາກ ແລະ ອາງຸ່ນ ເພື່ອການ ຜະລິດ ເຫຼົ້າແວງ 2 ເຮັກຕາ. ໃນຊຸມປີມໍ່ໆ ມານີ້, ນິຄົມອາງຸ່ນ ຂອງ ເພິ່ນ ໄດ້ກາຍເປັນຈຸດໝາຍປາຍທາງ ເພື່ອການຢ້ຽມຢາມ ແລະ ເພີດເພີນກັບ ອາງຸ່ນ ທີ່ມີຊື່ສຽງ ສຳລັບນັກທ່ອງທ່ຽວ ທັງໃກ້ ແລະ ໄກ.
ຢູ່ນິງຖ້ວນ ຍັງມີໝູ່ບ້ານອາງຸ່ນ ຖ໋າຍອານ ຢູ່ຕາແສງ ຫວິ໊ງຫາຍ, ເມືອງ ນິງຫາຍ. ສະຖານທີ່ແຫ່ງນີ້ ມີເນື້ອທີ່ປູກອາງຸ່ນ ປະມານ 200 ເຮັກຕາ ຕັ້ງຢູ່ລຽບຕາມເສັ້ນທາງ 702, ສາຍທາງທ່ອງທ່ຽວ ແຄມ ທະເລ ຊຶ່ງຖືວ່າ ງາມທີ່ສຸດຢູ່ ຫວຽດນາມ, ແລ່ນຜ່ານ ປ່າສະຫງວນ ແຫ່ງຊາດ ນູຍຈົ໋ວ, ໄປເຖິງອ່າວ ຫວິ໊ງຮີ. ນີ້ແມ່ນໝູ່ບ້ານອາງຸ່ນ ເພື່ອ ການບໍລິການທ່ອງທ່ຽວ ມີຊື່ສຽງທີ່ສຸດຂອງທ້ອງຖິ່ນ ກັບບັນດາສວນໝາກອາງຸ່ນ ທີ່ຂຽວສົດງົດງາມ ແລະ ກວ້າງໃຫຍ່ໄພສານ ແລະ ບັນ ດາ ຄ້າງ ໝາກອາງຸ່ນ ສຸກເຕັມທີ່ ແກວ່ງໄກວໄປຕາມສາຍລົມ ຊຶ່ງ ສ້າງຄວາມປະທັບໃຈໃຫ້ກັບນັກທ່ອງທ່ຽວ.
ນອກຈາກຕົ້ນອາງຸ່ນ, ໜໍ່ໄມ້ຝຣ່ັງ ແລະ ຫວ້ານຫາງແຂ້, ຕົ້ນໝາກ ແອັບເປິ້ນ ກໍ່ຖືວ່າ ເປັນແນວພັນພືດ ທີ່ສຳຄັນ ຂອງຂະແໜງ ກະສິກຳ ຂອງແຂວງ ນິງຖ້ວນ ຍ້ອນມີການຂະຫຍາຍຕົວ ທາງທຳມະຊາດ ທີ່ ເໝາະສົມ ກັບແຖບດິນແຫ່ງນີ້.
ປັດຈຸບັນ, ໜໍ່ໄມ້ຝຣັ່ງ ໄດ້ຖືວ່າ ເປັນພືດທີ່ຊ່ວຍ “ລົບລ້າງຄວາມ ອຶດ ຫີວ ແລະ ຫຼຸດຜ່ອນຄວາມທຸກຍາກ” ໃນທ້ອງຖີ່ນ ດ້ວຍຜົນຜະລິດ ແລະ ຄຸນນະພາບສູງ, ມີຕະຫຼາດຈຳໜ່າຍໃຫຍ່ ແລະ ອາຍຸການເກັບກ່ຽວໄດ້ເຖິງ 5 ປີ. ປັດຈຸບັນ, ແຂວງ ນິງຖ້ວນ ມີເນື້ອທີ່ປູກ ໜໍ່ໄມ້ຝຣັ່ງ ກວ່າ 200 ເຮັກຕາ, ປູກຫຼາຍກວ່າໝູ່ ແມ່ນຢູ່ເມືອງ ນິງເຟືອກ, ນິງຫາຍ, ຖ້ວນບັກ, ນິງເຊີນ ແລະ ຟານຣາງ - ທາບຈ່າມ.
ຫວ້ານຫາງແຂ້ ກໍເປັນພືດທີ່ປູກງ່າຍ ແລະ ບົວລະບັດງ່າຍ, ນັບແຕ່ ເວລາປູກ ຈົນເຖິງເວລາເກັບກ່ຽວ ແມ່ນຂ້ອນຂ້າງສັ້ນ ຊຶ່ງເໝາະສົມ ທີສຸດ ກັບສະພາບການປູກຝັງ ຂອງປະຊາຊົນ ຜູ້ມີທຶນໜ້ອຍ, ໃຊ້ ນ້ຳຫົດໜ້ອຍ ຢູ່ເຂດດິນມີສະພາບອາກາດທີ່ແຫ້ງແລ້ງ ແລະ ສະ ພາບອາກາດຮ້ອນ ຄື ນິງຖ້ວນ. ປັດຈຸບັນ, ທົ່ວແຂວງມີເນື້ອທີ່ປູກ ຫວ້ານຫາງແຂ້ ປະມານ 350 ເຮັກຕາ, ເນື້ອທີ່ປູກຕົ້ນຕໍ ຢູ່ຕາແສງ ວັນຫາຍ (ນະຄອນ ຟານຣາງ-ທາບຈ່າມ), ເມືອງ ນິງເຟືອກ, ນິງເຊີນ ແລະ ຖ້ວນບັກ. ຕົ້ນຫວ້ານຫາງແຂ້ ໄດ້ຮັບຮອງວ່າ ເປັນໜຶ່ງໃນ 12 ຜະລິດຕະພັນກະສິກໍາ ສະເພາະຂອງ ນິງຖ້ວນ.
ນິງຖ້ວນ ຖືການພັດທະນາກະສິກຳ ນໍາໃຊ້ເຕັກໂນໂລຊີສູງ ຕິດພັນກັບອຸດສາຫະກຳ ປຸງແຕ່ງ, ສົ່ງອອກ ແລະ ພັດທະນາການທ່ອງທ່ຽວ ແມ່ນໜຶ່ງໃນບັນດາໜ້າທີ່ສຳຄັນ ເພື່ອສ້າງບາດກ້າວບຸກທະລຸ, ນຳກະສິກຳເຕັກໂນໂລຊີສູງ ກາຍເປັນຂະແໜງເສດຖະກິດ ປາຍແຫຼມ ຂອງທ້ອງຖິ່ນ.
ຫັນກະສິກຳເຕັກໂນໂລຊີສູງ ເປັນຂະແໜງເສດຖະກິດ ປາຍແຫຼມ
ແຂວງ ນິງຖ້ວນ ພວມຍູ້ແຮງ ການນໍາໃຊ້ເຕັກໂນໂລຊີສູງ ເຂົ້າໃນ ການຜະລິດກະສິກຳ ເພື່ອສ້າງເປັນເຂດ ແລະ ໂຄງການທີ່ມີ ຂອບ ຂະໜາດ, ຜະລິດອອກ ບັນດາປະເພດສິນຄ້າກະສິກຳ ມີຄຸນນະ ພາບສູງ ຕອບສະໜອງ ຄວາມຕ້ອງການຂອງຕະຫຼາດ; ຫັນກະສິກຳເຕັກໂນໂລຊີສູງ ເປັນຂະແໜງເສດຖະກິດປາຍແຫຼມ ຂອງທ້ອງຖິ່ນ.
ທ່ານ ເລຮວ່ຽນ, ຮອງປະທານ ຄະນະກຳມະການ ປະຊາຊົນ ແຂວງ ນິງຖ້ວນ ໃຫ້ຮູ້ວ່າ ການພັດທະນາກະສິກຳນຳໃຊ້ເຕັກໂນໂລຊີສູງ ແລະ ຫັນເປັນດີຈີຕອນ ໃນຂະແໜງກະສິກຳ ແມ່ນທ່າອຽງຕົ້ນຕໍ ແລະ ຈຳເປັນຢ່າງຍິ່ງ ເຂົ້າໃນການເຊື່ອມໂຍງ.
ເພື່ອໃຫ້ບັນລຸເປົ້າໝາຍທີ່ໄດ້ວາງອອກ, ແຂວງ ນິງຖ້ວນ ສຸມໃສ່ເຖິງການລະດົມບັນດາແຫຼ່ງກຳລັງແຮງ ເພື່ອຜັນຂະຫຍາຍປະຕິບັດຫຼາຍກຸ່ມວຽກງານ ແລະ ວິທີແກ້ໄຂ. ນັ້ນແມ່ນ, ເພີ່ມທະວີການໂຄສະນາ ເຜີຍແຜ່ ກ່ຽວກັບພັດທະນາກະສິກຳ ດ້ວຍການນຳໃຊ້ເຕັກໂນໂລຊີສູງ; ສ້າງກົນໄກ ແລະ ນະໂຍບາຍດຶງດູດການລົງທຶນ ແລະ ຊ່ວຍໜູນພັດທະນາກະສິກຳ ນໍາໃຊ້ເຕັກໂນໂລຊີສູງ. ພ້ອມກັນນັ້ນ, ລົງທຶນເຂົ້າພື້ນຖານວັດຖຸ, ເຕັກນິກ ຂອງ ບັນດາເຂດຜະລິດ ແລະ ເຂດກະສິກຳເຕັກໂນໂລຊີສູງ; ເພີ່ມທະວີການຄົ້ນຄວ້າ, ຄັດເລືອກແນວພັນ ແລະ ບັນດາຂັ້ນຕອນ, ເຕັກໂນໂລຊີການຜະລິດ. ພ້ອມດຽວກັນ ນິງຖ້ວນຍັງ ຊຸກຍູ້ຢ່າງແຂງແຮງ ພັດທະນາ ການປຸງແຕ່ງ, ເຊື່ອມໂຍງການຜະລິດ, ຊຸກຍູ້ການຄ້າ, ເປີດກວ້າງຕະຫຼາດ ຈຳໜ່າຍສິນຄ້າ; ພັດທະນາ ແຫຼ່ງ ຊັບພະຍາກອນມະນຸດ ເພື່ອຮັບໃຊ້ການຜະລິດ ກະສິກໍາ ເຕັກໂນໂລຊີສູງ; ຍົກສູງປະສິດທິຜົນການດຶງດູດ, ນຳໃຊ້ບັນດາ ແຫຼ່ງກຳລັງແຮງ ແລະ ເລັ່ງລັດ ການຫັນເປັນດີຈີຕອນ ກັບບັນດາການເຄື່ອນໄຫວພັດທະນາກະສິກຳ ນໍາໃຊ້ເຕັກໂນໂລຊີສູງ.
ຫວ່າງມໍ່ໆ ມານີ້, ແຂວງ ນິງຖ້ວນ ໄດ້ນໍາໃຊ້ນະໂຍບາຍບຸລິມະສິດ ຫຼາຍຢ່າງ ເພື່ອດຶງດູດ ແລະ ຊ່ວຍເຫຼືອບັນດາວິສາຫະກິດ, ສະຫະ ກອນກະສິກຳ ຊຸກຍູ້ຢ່າງແຂງແຮງ ການນໍາໃຊ້ເຕັກໂນໂລຊີສູງ ເຂົ້າ ການຜະລິດ ໄດ້ມາດຕະຖານ VietGAP, GlobalGAP, ISO, ISO/IEC 17025, HACCP, ຜະລິດຕະພັນ ກະເສດປອດສານພິດ... ພົ້ນເດັ່ນແມ່ນຮູບແບບການຜະລິດ ໜໍ່ໄມ້ຝຣັ່ງຂຽວ ຂອງ ນິຄົມກະສິກຳປອດສານພິດ ຕຽນຕ໋ຽນ, ສະຫະກອນ ຕ໋ວນຕູ໋ (ເມືອງ ນິງເຟືອກ); ການຜະລິດເຫຼົ້າແວງ ຂອງ ບໍລິສັດ Ladora Farm ຈຳກັດ (ເມືອງ ນິງເຊີນ); ການປູກໝາກແຕງ “ເມລອນ” ເຕັກໂນໂລຊີສູງ ຂອງສະຫະກອນກະສິກໍາເຕັກໂນໂລຊີສູງ ພາກກາງ ຕອນໃຕ້ (ເມືອງ ບ໋າກອ໋າຍ).
ຂະບວນການສະກັດນ້ຳໝາກອາງຸ່ນ ແລະ ຜະລິດ ເຫຼົ້າແວງ ຢູ່ນິຄົມອາງຸ່ນ ບາມ້ອຍ. ພາບ: ກົງດາດ/VNP
ພິເສດ, ບໍລິສັດຫຸ້ນສ່ວນອາຫານ ແກ໋ງດົ່ງຫວຽດ (VietFarm) ແມ່ນວິສາຫະກິດ ແຖວໜ້າຂອງ ຫວຽດນາມ ຜະລິດ, ປຸງແຕ່ງ ແລະ ສົ່ງ ອອກສະເພາະຫວ້ານຫາງແຂ້. ວິສາຫະກິດນີ້ ໄດ້ຂຸດຄົ້ນ ຢ່າງມີປະ ສິດທິຜົນ ແລະ ຍົກລະດັບຄຸນຄ່າ ຂອງ ຫວ້ານຫາງແຂ້ ຍ້ອນມີ ພື້ນ ທີ່ວັດຖຸດິບ ຫວ້ານຫາງແຂ້ ກວ່າ 200 ເຮັກຕາ ໄດ້ຮັບການຢັ້ງຢືນ ຈາກ VietGAP, GlobalGAP ແລະ ໂຮງງານ ປຸງແຕ່ງຫວ້ານຫາງ ແຂ້ ໃຫຍ່ທີ່ສຸດ ຫວຽດນາມ ຕັ້ງຢູ່ເຂດ ອຸດສາຫະກຳ ແທງຫາຍ, ນະ ຄອນ ຟານຣາງ-ທາບຈ່າມ ດ້ວຍຕ່ອງໂສ້ ແລະ ເຕັກໂນໂລຊີ ການ ຜະລິດ ທີ່ທັນສະໄໝ ໄດ້ມາດຕະຖານສາກົນ FSSC 22000. ຜະລິດຕະພັນຂອງ VietFarm ໄດ້ມີໜ້າຢູ່ກວ່າ 20 ປະເທດ ໃນໂລກ.
ໃນຊຸມປີມໍ່ໆມານີ້, ບັນດານັກວິທະຍາສາດ ຂອງສະຖາບັນ ຄົ້ນຄວ້າ ຝ້າຍ ແລະ ພັດທະນາກະສິກຳ ຍາໂຮ໋ ໄດ້ປະສົບ ຄວາມສໍາເລັດ ໃນການປະສົມແນວພັນອາງຸ່ມໃໝ່ ຈຳນວນໜຶ່ງ ເຊັ່ນ: NH01-48, NH01-152, Black-Queen ແລະ ລ່າສຸດ ແມ່ນແນວພັນ ອາງຸ່ນ ບໍ່ມີແກ່ນ NH04- 102 ໄດ້ປູກທົດລອງ ຢ່າງມີປະສິດທິຜົນ. ແນວພັນ ອາງຸ່ນ ຫຼາຍຊະນິດ ໄດ້ຖືກປູກ ຢູ່ທົ່ວໄປ ຢູ່ເຂດເພາະປູກຈຳນວນໜຶ່ງ ຂອງ ແຂວງ ນິງຖ້ວນ ໄດ້ຮັບຄວາມນິຍົມ ແລະ ຜະລິດຢ່າງກວ້າງ ຂວາງ ຈາກ ຊາວກະສິກອນ, ເຮັດໃຫ້ກົນໄກແນວພັນ ອຸດົມສົມບູນ ຍິ່ງຂຶ້ນ ແລະ ຕອບສະໜອງ ຄວາມຕ້ອງການ ທີ່ນັບມື້ນັບສູງ ຂອງ ຕະຫຼາດ ແລະ ຜູ້ບໍລິໂພກ.
ຕາມການສຳຫຼວດ ຂອງ ພະແນກກະສິກຳ ແລະ ພັດທະນາຊົນນະ ບົດແຂວງ, ມູນຄ່າການຜະລິດ ຕໍ່ເນື້ອທີ່ລົງທຶນຜະລິດກະສິກຳ 1 ເຮັກຕາ ດ້ວຍການນໍາໃຊ້ເຕັກໂນໂລຊີສູງ ບັນລຸປະມານ 600 ລ້ານດົ່ງ/ເຮັກຕາ/ປີ, ໃນນັ້ນມີຮູບແບບຈຳນວນໜຶ່ງ ຄື ປູກໝາກແຕງ “ເມລອນ”, ໜໍ່ໄມ້ຝຣັ່ງຂຽວ ບັນລຸກວ່າ 1 ຕື້ດົ່ງ/ເຮັກຕາ/ປີ.
ການປະສົມປະສານຢ່າງມີປະສິດທິຜົນ ລະຫວ່າງລັດ, ນັກວິທະຍາ ສາດ, ວິສາຫະກິດ ແລະ ຊາວກະສິກອນ ໃນການໝູນໃຊ້ວິທະຍາ ສາດເຕັກໂນໂລຊີສູງ ໃນການຜະລິດກະສິກຳ ໄດ້ສ້າງບາດກ້າວ ກະໂດດຂັ້ນ ໃຫ້ແກ່ຂະແໜງການກະສິກຳ ທີ່ມີລັກສະນະສະເພາະຂອງ ນິງຖ້ວນ, ຈາກນັ້ນ ມຸ່ງໄປເຖິງການພັດທະນາແບບຍືນຍົງ ແລະ ມີປະສິດທິຜົນ ເພື່ອຍົກສູງຄຸນຄ່າ ຜະລິດຕະພັນກະສິກຳ, ປົກປັກຮັກສາສິ່ງແວດລ້ອມ, ປັບປຸງຊີວິດການເປັນຢູ່ ແລະ ສ້າງຮັ່ງຄຸນມີໃຫ້ຊາວກະສິກອນ ອີກດ້ວຍ.
ນິງຖ້ວນ ວາງເປົ້າໝາຍ ໄລຍະ 2021-2025, ລະດັບການເຕີບໂຕ ຂອງມູນຄ່າການຜະລິດກະສິກຳ ນຳໃຊ້ເຕັກໂນໂລຊີສູງ ຕ້ອງບັນລຸ 30-40%/ປີ. ສູ້ຊົນຮອດປີ 2025, ຈະມີ 3-5 ເຂດກະສິກຳເຕັກໂນໂລຊີສູງ ດ້ວຍເນື້ອທີ່ຜະລິດກະສິກຳນຳໃຊ້ເຕັກໂນໂລຊີສູງ ບັນລຸ 1.000 ເຮັກຕາ, ມູນຄ່າຜະລິດກະສິກຳ ນຳໃຊ້ເຕັກໂນໂລຊີສູງ ບັນລຸ 700 ລ້ານດົ່ງ/ເຮັກຕາ ແລະ ມີໂຄງການກະສິກຳນຳໃຊ້ ເຕັກໂນໂລຊີສູງ ເຄື່ອນໄຫວທີ່ມີປະສິດທິຜົນ ປະມານ 30 ໂຄງການ, ໃນນັ້ນ ໃນແຕ່ລະເມືອງ ມີ 4-6 ໂຄງການ, ໂດຍໃຫ້ບຸລິມະສິດຄັດເລືອກ ພັດທະນາ ຜະລິດຕະພັນສະເພາະທີ່ມີທ່າແຮງເພື່ອສົ່ງອອກ.
ບົດ: ເຊີນເຫງ້ຍ - ພາບ: ເລມິງ, ກົງດາດ - ແປໂດຍ: ບິກລຽນ