បច្ចេកវិទ្យា ADN ៖ ប្រគល់ឈ្មោះជូនវីរបុរសវិញ

ជាងកន្លះសតវត្សរ៍បន្ទាប់ពីសង្គ្រាមបញ្ចប់ របកគំហើញនៃបច្ចេកវិទ្យាពិនិត្យ ADNរបស់អ្នកវិទ្យាសាស្ត្រវៀតណាម កំពុងជួយកំណត់អត្តសញ្ញាណរបស់យុទ្ធជនពលី តំណភ្ជាប់ជំនួបជុំ ដែលគ្រួសារជាច្រើនបានរង់ចាំអស់ជាច្រើនទសវត្សរ៍កន្លង។

សំណាកត្រូវបានកំណត់ប្រភពដើម និងបង្កើតឯកសាររក្សាទុក។ រូបថត៖ ខាញ់ឡុង / VNP

* របកគំហើញនៃបច្ចេកវិទ្យា ADN

សង្គ្រាមបានបញ្ចប់ជាងកន្លះសតវត្សរ៍ ប៉ុន្តែនៅទូទាំងប្រទេស នៅតែមានយុទ្ធជនពលីជាច្រើន នៅតែមិនអាចត្រឡប់ទៅជួបជុំគ្រួសារវិញ។ អដ្ឋិធាតុនីមួយៗ ដែលមិនទាន់បានកំណត់អត្តសញ្ញាណ ជាចន្លោះប្រហោងមិនទាន់បានបំពេញ ក្នុងការចងចាំរបស់សាច់ញាតិ ហើយក៏ជាកង្វល់របស់សង្គមទាំងមូល។។

យុទ្ធនាការ ៥០០ថ្ងៃយប់ ត្រូវបានគណៈកម្មាធិការដឹកនាំជាតិស្តីពីការស្វែងរក ប្រមូលផ្តុំ និងកំណត់អត្តសញ្ញាណ
អដ្ឋិធាតុរបស់យុទ្ធជនពលី បានបំផុស ដើម្បីឆ្ពោះទៅអបអរសាទរខួបលើកទី៨០ នៃទិវាយុទ្ធជនពិការ និងយុទ្ធជនពលី (ថ្ងៃទី២៧ ខែកក្កដា ឆ្នាំ១៩៤៧ – ថ្ងៃទី២៧ ខែកក្កដា ឆ្នាំ២០២៧) ពីមួយថ្ងៃទៅមួយថ្ងៃ អ្នកវិទ្យាសាស្ត្រវៀតណាម កំពុងនាំយកវិទ្យាសាស្ត្រក្លាយជាស្ពានតំណភ្ជាប់ រវាងអតីតកាល និងបច្ចុប្បន្ន ជួយយុទ្ធជនដែលមិនស្គាល់អត្តសញ្ញាណវិលមករកឈ្មោះរបស់ខ្លួនបន្ទាប់ពីច្រើនទសវត្សរ៍។

មជ្ឈមណ្ឌលធ្វើតេស្ត ADN គឺជាអង្គភាពសំខាន់មួយ ក្នុងចំណោមបណ្តាអង្គភាពសំខាន់ ដែលរដ្ឋាភិបាលប្រគល់ភារកិច្ចនូវការធ្វើតេស្ត ADN ដើម្បីកំណត់អត្តសញ្ញាណយុទ្ធជនពលី។ រូបថត៖ ខាញ់ឡុង / VNP

មានវត្តមាននៅមជ្ឈមណ្ឌលធ្វើតេស្ត ADN នៃវិទ្យាស្ថានជីវវិទ្យា បណ្ឌិត្យសភាវិទ្យាសាស្ត្រ និងបច្ចេកវិទ្យាវៀតណាម ក្នុងប៉ុន្មានថ្ងៃនៃខែកក្កដា យើងខ្ញុំបានមើលឃើញយ៉ាងច្បាស់នូវបរិយាកាសធ្វើការដ៏មមាញឹករបស់អ្នកវិទ្យាសាស្ត្រ។ ចាប់តាំងពីថ្ងៃដាក់ឲ្យដំណើរការ នៅឆ្នាំ២០១៩ មជ្ឈមណ្ឌលធ្វើតេស្ត ADN គឺជាអង្គភាពស្នូលមួយ បានរដ្ឋាភិបាលប្រគល់ភារកិច្ចធ្វើតេស្ត ADN បម្រើការកំណត់អត្តសញ្ញាណយុទ្ធជនពលី។

បរិយាកាសធ្វើការមមាញឹក ធ្វើការបម្រើការកំណត់អត្តសញ្ញាណអិដ្ឋធាតុយុទ្ធជនពលី នៃបុគ្គលិកមជ្ឈមណ្ឌលធ្វើតេស្ត ADN ក្នុងយុទ្ធនាការ ៥០០ថ្ងៃយប់ ដែលបំផុសដោយគណៈកម្មាធិការដឹកនាំជាតិស្តីពីការស្វែងរក ការប្រមូល និងការកំណត់អត្តសញ្ញាណអធិដ្ឋធាតុយុទ្ធជនពលី ។ រូបថត៖ ខាញ់ឡុង / VNP

ពេលទទួលសំណាក ដែលបានបញ្ជូនមកមជ្ឈមណ្ឌល បុគ្គលិកកត់ត្រាព័ត៌មាននៅក្នុងបន្ទប់ផ្ទុកសំណាក។ រូបថត៖ ខាញ់ឡុង / VNP

សំណាកត្រូវបានរក្សាទុកក្នុងទូដោយសីតុណ្ហភាព - ៨០អង្សាសេ។ រូបថត៖ ខាញ់ឡុង / VNP

ក្នុងបន្ទប់ពិសោធន៍ ឈុតខោអាវការពារពណ៌សផ្លាស់ទីយ៉ាងស្ងៀមស្ងាត់រវាងឧបករណ៍ទំនើបៗ។ បរិយកាសឮតែសំឡេងម៉ាស៊ីនវិភាគ រួមជាមួយសកម្មភាពត្រឹមត្រូវ បានអនុវត្តរាប់សិបដំណាក់កាល ក្នុងរយៈពេលជាច្រើនសប្តាហ៍ ជួនកាលច្រើនខែ។

លោក ត្រឹន ទ្រុងថាញ (Tran Trung Thanh) នាយកមជ្ឈមណ្ឌលធ្វើតេស្ត ADN បាននិយាយថា សំណាកអដ្ឋិធាតុរបស់យុទ្ធជនវៀតណាមត្រូវបានចាត់ទុកថា ជាសំណាកដែលពិបាកវិភាគបំផុត នៅលើពិភពលោក ដោយសារតែកម្រិតរលួយខ្ពស់ ក្នុងលក្ខខណ្ឌអាកាសធាតុត្រូពិច។ កាលពីមុន វិធីសាស្រ្តពីវិភាគ ADN មីតូខន់ឌ្រី ឬ ADN nuclear បានបង្ហាញពីកំហិតមួយចំនួនពេលអនុវត្តក្នុងទ្រង់ទ្រាយធំ ក៏ដូចជានៅក្នុងដំណើរការពង្រីកតំបន់ហ្សែន ដើម្បីបង្ហាញលទ្ធផលត្រឹមត្រូវ។

ដោយផ្អែកលើស្ថានភាពនេះ រដ្ឋាភិបាលបានប្រគល់ភារកិច្ចជូនបណ្ឌិត្យសភាវិទ្យាសាស្ត្រ និងបច្ចេកវិទ្យាវៀតណាម ដឹកនាំមជ្ឈមណ្ឌលធ្វើតេស្ត ADN វិទ្យាស្ថានជីវវិទ្យា សម្របសម្រួលជាមួយគណៈកម្មការអន្តរជាតិស្តីពីមនុស្សបាត់ខ្លួន (ICMP) ស្រាវជ្រាវ និងបង្កើនប្រសិទ្ធភាពដំណើរការបច្ចេកវិទ្យាថ្មី រួមមានការស្រង់យក ADN nuclear ការកំណត់ហ្សែនជំនាន់ថ្មី និងការវិភាគការបង្ហាញ SNP។

សំណាកត្រូវបានកំណត់ប្រភពដើម និងបង្កើតឯកសាររក្សាទុក។ រូបថត៖ ខាញ់ឡុង / VNP

ដំណើរការថ្មីរួមមានដំណាក់កាលជាច្រើន ចាប់ពីការស្រង់យក វាស់បរិមាណ ការពង្រីក រហូតដល់ការកំណត់លំដាប់ ADN ជួយសមត្ថភាពកំណត់អត្តសញ្ញាណបុគ្គល និងបម្រៀបធៀបយ៉ាងត្រឹមត្រូវជាមួយសំណាកសាច់ញាតិ ដោយគ្រាន់តែប្រើប្រាស់សម្ភារៈពន្ធុវិទ្យា ក្នុងបរិមាណតូចបំផុត សូម្បីតែចំពោះសាច់ញាតិឆ្ងាយច្រើនជំនាន់ក៏ដោយ។ ផ្អែកលើការកែលម្អដំណើរការ អត្រាទទួលបាន ADN បានកើនឡើងពីប្រហែល ២២% រហូតដល់ ៨០% នៃចំនួនសំណាក ដែលបានចំណាត់ការដោយបច្ចេកវិទ្យាថ្មី។

លោក ថាញ់ បានមានប្រសាសន៍ថា "មកដល់បច្ចុប្បន្ននេះ រួមជាមួយនឹងមូលដ្ឋានទិន្នន័យនៃសាច់ញាតិរបស់យុទ្ធជនពលី ដែលកំពុងត្រូវបានសាងសង់ក្នុងមូលដ្ឋានទិន្នន័យប្រជាជនជាតិ ការអនុវត្តដំណើរការបច្ចេកវិទ្យាអំពីការវិភាគ ADN នៃមជ្ឈមណ្ឌលធ្វើតេស្ត ADN នឹងពង្រឹកប្រសិទ្ធភាពជាង។ ការកំណត់អត្តសញ្ញាណរបស់យុទ្ធជនពលី នឹងត្រូវបានអនុវត្តលឿនជាង ត្រឹមត្រូវជាង ជាមួយមូលដ្ឋានវិទ្យាសាស្ត្ររឹងមាំជាង ដើម្បីសង់អត្តសញ្ញាណត្រូមត្រូវជូនយុទ្ធជនពលីបានតែត្រឹមត្រូវ និងឆាប់រហ័ស"។

បន្ទាប់ពីដំណើរការស្រាវជ្រាវ មជ្ឈមណ្ឌលធ្វើតេស្ត ADN បានចាប់ផ្តើមសាកល្បងនៅបូជនីយដ្ឋានពីរគឺ ត្រាលិញ ( Tra Linh) (ខេត្ត កាវបាំង (Cao Bang)) និង រ៉ុងយេង (Rong Gieng) (ខេត្ត អានយ៉ាង (An Giang)) ក្នុងឆ្នាំ២០២៥ បានកំណត់អត្តសញ្ញាណជោគជ័យចំពោះយុទ្ធជនពលីពីរនាក់។ សមិទ្ធផលនេះ ត្រូវបានជ្រើសតាំងជាព្រឹត្តិការណ៍វិទ្យាសាស្ត្រ និងបច្ចេកវិទ្យាលេចធ្លោចំនួន ១០ របស់វៀតណាម ក្នុងឆ្នាំ២០២៥។

* នៅពីក្រោយការជួបជុំគ្នានីមួយៗ

ក្នុងយុទ្ធនាការ ៥០០ថ្ងៃយប់ មជ្ឈមណ្ឌលធ្វើតេស្ត ADN ត្រូវបានប្រគល់ភារកិច្ចធ្វើតេស្តអិដ្ឋធាតុរយុទ្ធជនពលី ៦៦៣២ សំណាក និងសម្រេចភារកិច្ចមុនខែកក្កដា ឆ្នាំ២០២៧។ សម្រាប់អ្នកវិទ្យាសាស្ត្រនៅទីនេះ លទ្ធផលជោគជ័យនីមួយៗ មិនត្រឹមតែជាសមិទ្ធផលវិទ្យាសាស្ត្រប៉ុណ្ណោះទេ ប៉ុន្តែក៏ជាក្តីសង្ឃឹមរបស់ក្រុមគ្រួសារ ដែលបានរង់ចាំរាប់សិបឆ្នាំ ដើម្បីស្គាល់ទីតាំង ដែលសាច់ញាតិចែកឋាន។

សំណាកត្រូវបានសម្អាតផ្នែកមានជាតិកាល់ស្យូម ដើម្បីសម្រួលដល់ការស្រង់យក ADN។ រូបថត៖ ខាញ់ឡុង / VNP

នៅពេលទទួលបានសំណាក បុគ្គលិក មន្ត្រីរបស់មជ្ឈមណ្ឌលធ្វើតេស្ត ADN កត់ត្រាព័ត៌មាន បែងចែកគុណភាព កំណត់ប្រភពដើម និងបង្កើតឯកសារមុនពេលដំណើរចំណាត់ការ។ សំណាកត្រូវបានសម្អាត សម្ងួត កិនជាម្សៅ រួចសម្រង់ ADN ។ បន្ទាប់មក ADN ត្រូវបានវាស់វែង មុនពេលបន្តឈានចូលដំណាក់កាលបន្ទាប់នៃដំណើរការវិភាគ។

សកម្មភាពទាំងអស់ ត្រូវបានគោរពយ៉ាងតឹងរ៉ឹងតាមស្តង់ដារបច្ចេកទេស និងសុវត្ថិភាព។ ដោយសារតែបរិមាណ ADN នៅសល់មកតិចតូច ខណៈពេលដែលហានិភ័យនៃការចម្លងរោគដោយបាក់តេរីមានកម្រិតខ្ពស់ សូម្បីតែកំហុសតូចមួយ ក៏អាចប៉ះពាល់ដល់លទ្ធផលដែរ។ ប្រការនោះទាមទារឱ្យអ្នកពិនិត្យមានការប្រុងប្រយ័ត្នខ្ពស់ និងអាចបត់បែនបាន ក្នុងដំណាក់កាលនីមួយៗ។

បងស្រី ឡេយុង (Le Dung) អ្នកពិនិត្យ បាននិយាយថា ដំណើរការបច្ចេកវិទ្យាថ្មីមានភាពស្មុគស្មាញខ្លាំង ទាមទារបុគ្គលិកមានចំណេះដឹងជំនាញខ្ពស់ ហើយដំណាក់កាលជាច្រើនត្រូវត្រួតពិនិត្យខ្វែង ដើម្បីធានាបាននូវភាពត្រឹមត្រូវនៃលទ្ធផល។ ដើម្បីឆ្លើយតបនឹងកាលកំណត់ បុគ្គលិកភាគច្រើនរបស់មជ្ឈមណ្ឌលចូលរួមក្នុងដំណាក់កាលផ្សេងៗជាច្រើន។ សំណាកភាគច្រើន គឺសុទ្ធតែលំបាក ម្រូវអនុវត្តម្តងហើយម្តងទៀត ពីពីរទៅបីដង។

សំណាកត្រូវបានដាក់ចូលម៉ាស៊ីន ដើម្បីកិនជាម្សៅ មុនពេលស្រង់យកADN។ រូបថត៖ ខាញ់ឡុង / VNP

យោងតាមលោក ត្រឹន ទ្រុងថាញ (Tran Trung Thanh) បន្ទាប់ពីការអនុវត្តដំណោះស្រាយល្អបំផុតទាំងបីដង នៅតែមិនទទួលបានលទ្ធផល មន្ត្រី បុគ្គលិកនឹងប្តូរទៅដំណើរការលើសំណាកផ្សេង ដើម្បីប្រើប្រាស់ធនធានឱ្យមានប្រសិទ្ធភាព និងធានាវឌ្ឍនភាពចំពោះចំនួនសំណាកនៅមានច្រើន។

ដើម្បីបញ្ចប់ភារកិច្ចមុនខែកក្កដា ឆ្នាំ២០២៧ បុគ្គលិកនៃមជ្ឈមណ្ឌលធ្វើតេស្ត ADN កំពុងរត់ប្រណាំងនឹងពេលវេលា ធ្វើការទាំងយប់ទាំងថ្ងៃ។ រួមដំណើរជាមួយពួកគេ នៅទាំងមាបការគាំទ្រពីអ្នកជំនាញអន្តរជាតិផងដែរ។

ការងារត្រួតពិនិត្យគុណភាពសំណាក។ រូបថត៖ ខាញ់ឡុង / VNP

លោក Thomas Parsons ទីប្រឹក្សាវិទ្យាសាស្ត្រជាន់ខ្ពស់ នៃគណៈកម្មការអន្តរជាតិស្តីពីមនុស្សបាត់ខ្លួន (ICMP) មានប្រសាសន៍ថា “ជាមួយការគាំទ្រពីរដ្ឋាភិបាលសហរដ្ឋអាមេរិក និងគណៈកម្មការអន្តរជាតិស្តីពីមនុស្សបាត់ខ្លួន (ICMP) បន្ទប់ពិសោធន៍នៃមជ្ឈមណ្ឌលធ្វើតេស្ត ADN បានខិតខំប្រឹងប្រែងយ៉ាងខ្លាំង និងទទួលបានជោគជ័យ ក្នុងការប្រើប្រាស់បច្ចេកវិទ្យាថ្មីៗ។ អ្វីដែលធ្វើឱ្យខ្ញុំចាប់អារម្មណ៍បំផុតនោះគឺ ភាពស្វិតស្វាញ ការតាំងចិត្ត និងការប្ដេជ្ញាចិត្តក្នុងរយៈពេលវែងរបស់វៀតណាម រួមជាមួយនឹងគំនិតចំហ និងឆន្ទៈត្រៀមទទួលយកឱកាសថ្មីៗ ដែលវិទ្យាសាស្ត្រ និងបច្ចេកវិទ្យានាំមក”។

សម្រាប់អ្នកធ្វើការងារដោយស្ងប់ស្ងាត់នោះ រាល់លទ្ធផលធ្វើតេស្តនីមួយៗ មិនត្រឹមតែបញ្ជាក់ពីតម្លៃនៃវិទ្យាសាស្ត្រប៉ុណ្ណោះទេ ប៉ុន្តែថែមទាំងបើកឱកាសជួបជុំបន្ទាប់ពីការរង់ចាំអស់ជាច្រើនទសវត្សរ៍ផងដែរ។

«យើងទាំងអស់គ្នាមានមោទនភាពយ៉ាងខ្លាំង ពេលបានចូលរួមយុទ្ធនាការ ៥០០ថ្ងៃយប់។ អ្វីដែលសុភមង្គលបំផុតនោះគឺ លទ្ធផលធ្វើតេស្ត អាចរួមចំណែកបញ្ជូនយុទ្ធជនពលីត្រឡប់ជួបជុំគ្រួសាររបស់ពួកគេវិញ។ នេះក៏ជាការដឹងគុណចំពោះការលះបង់របស់មនុស្សជំនាន់មុន ដើម្បីសន្តិភាពនៃប្រទេសជាតិ» លោកស្រី ឡេ យុង (Le Dung) បានចែករំលែក៕

អត្ថបទ៖ ង៉ឹនហា - រូបថត៖ ខាញ់ឡុង / VNP