ឋានសួគ៍សម្រាកលំហែកាយ មូយណែ (Mui Ne)

កាល​ពីមុន គ្រាន់តែជា​ភូមិ​នេសាទតូចមួយ ជ្រោយដី ដែលលយចេញក្រៅសម្រាប់​អ្នក​នេសាទមកចត និងជៀសវាងនៅពេលមានខ្យល់ព្យុះ។ ឥឡូវនេះ មូយ​ណែ (Mui Ne) (ទីក្រុង ផាន​ថៀត (Phan Thiet) ខេត្ត ប៊ិញ​ធួន (Binh Thuan)) ត្រូវបានភ្ញៀវទេសចរក្នុង​និង​អន្តរជាតិស្គាល់ដូចជា "ឋានសួគ៌​ទេសចរណ៍សម្រាក​លំហែកាយ" ទ្រង់ទ្រាយតំបន់។

"មណ្ឌល​សម្រាកលំហែកាយ" resort នៅឆ្នេរសមុទ្រពណ៌ខៀវ

ប្ដីប្រពន្ធលោក L.C និង លោកស្រី N.T ពីរដ្ឋធានី ហាណូយ(Ha Noi) មករស់នៅ មូយណែ (Mui Ne) ជាង ៣០ឆ្នាំមុន។ ពួកគាត់បានជ្រើសរើសទិញ អាផាតមិនក្នុងតំបន់ Sea Link City Resort ស្ថិតនៅសង្កាត់ មូយ​ណែ (Mui Ne) (ទីក្រុង ផាន​ថៀត (Phan Thiet) ខេត្ត ប៊ិញ​ធួន (Binh Thuan) ចាប់តាំងពី​ទីនេះនៅត្រឹមតែជាគម្រោងថ្មី ដែលទើបចាប់ផ្តើមសាងសង់។

“ដំបូងឡើយ ខ្ញុំនិងភរិយាគ្រោងចាត់ទុក​កន្លែងនេះគ្រាន់តែជាកន្លែងសម្រាកលំហែកាយ និងកម្សាន្តលេងជាមួយក្រុមគ្រួសារ និងកូនៗ ក្នុងរយៈពាលវិស្សមកាលតែប៉ុណ្ណោះ។ ប៉ុន្តែបន្ទាប់ពីរស់នៅទីនេះក្នុងរយៈពេលខ្លី ខ្ញុំមានអារម្មណ៍ថាអាកាសធាតុនៅមូយ​ណែ (Mui Ne) ល្អណាស់ ខ្យល់អាកាសបរិសុទ្ធ ជាមួយនឹងពន្លឺថ្ងៃដ៏កក់ក្តៅពេញមួយឆ្នាំ ដែលល្អណាស់សម្រាប់សុខភាព ហើយវាមានចម្ងាយពីទីក្រុងហូជីមិប្រហែល ២០០ គីឡូម៉ែត្រប៉ុណ្ណោះ ដូច្នេះខ្ញុំសម្រេចចិត្តរស់នៅទីនេះ តាំងពីពេលនោះមក។” - លោក L.C បាននិយាយ។

ភ្ញៀវ​ទេសចរ​ទទួល​បាន​បទពិសោធន៍​រ៉ូមែនទិច ក្នុងអាងហែល​ទឹក​ឥតព្រំដែន​នៅ  Centara Mui Ne។ រូបថត៖ ឡេមិញ/VNP

មកដល់​មូយណែ (Mui Ne) លើកនេះ យើងមានឱកាសបានទៅលេងផ្ទះរបស់គ្រួសារប្តីប្រពន្ធគាត់ ដើម្បីទទួលអារម្មណ៍ពីលំហ និងបរិយាកាសរស់នៅក្នុងទីក្រុងសមុទ្រនៃខាង​ត្បូង​នៃភាគកណ្តាល​វៀតណាម។ ម្ចាស់ផ្ទះ បាននាំក្រុមយើងខ្ញុំទៅទស្សនាអាផាតមិនពីរជាន់ក្នុងតំបន់ Sea Link City Resort ដែលរចនាឲ្យមានខ្យល់អាកាសចេញចូល និងរបៀប​រៀបចំប្រកបដោយភាពឆ្លាតវៃ និងទំនើប។ លោក L.C បន្ថែមថា គាត់នៅទីនេះពេញមួយឆ្នាំ មិនចាំបាច់ប្រើម៉ាស៊ីនត្រជាក់ទេ ព្រោះគ្រាន់តែបើកបង្អួច ខ្យល់សមុទ្រក៏បក់មកយ៉ាងត្រជាក់ដែរ។ បណ្តាអាផាតមិននិងអគារធំៗនៅទីនេះត្រូវបានរចនាឡើងតាមបែបវិទ្យាសាស្ត្រ អគារដែលសាងសង់ក្រោយមិនត្រូវសាងសង់ឲ្យបិទរារាំងខ្យល់ និងបាំងទិដ្ឋភាពឆ្នេរសមុទ្រ សម្រាប់អគារដែលសាងសង់មុនឡើយ ដូច្នេះវាតែងតែត្រជាក់រៀងរហូត។

តំបន់ Sea Links City Resort បច្ចុប្បន្ននេះជាមណ្ឌល​សម្រាក​លំហែកាយលំដាប់ផ្កាយ ៥ ដ៏ល្បីល្បាញនៅ មូយណែ (Mui Ne)  - ទីក្រុង​ ផាម​ថៀត (Phan Thiet) ដែលរចនាមានបន្ទប់ ប្រមាណជិត ១០០០ បន្ទប់ អាផាតមិន និងវីឡាដែលមានទីតាំងនៅលើខ្នងភ្នំត្រជាក់ ជាមួយនឹងសេវាកម្មសម្រាក​លំហែកាយ ​លេងកម្សាន្ត អាហារ អាងហែលទឹក ទីលានវាយកូនហ្គោល លំដាប់អាស៊ី និងវិមានស្រាក្រហមដ៏អស្ចារ្យ និងបុរាណដែលលាក់ខ្លួន ពីក្រោយចំការទំពាំងបាយជូរបៃតង។

ក្រៅពីតំបន់ Sea Links City Resort បច្ចុប្បន្ន មូយណែ (Mui Ne) មានរាប់រយ resort មណ្ឌលសម្រាកកាយ និងសណ្ឋាគារលំដាប់ថ្នាក់ផ្សេងទៀត ដែលលាតសន្ធឹងតាមឆ្នេរសមុទ្រពីច្រកទ្វារនៃទីក្រុង ផាម​ថៀត (Phan Thiet) ទៅ ហន​រ៉ម (Hon Rom) - ទីបញ្ចប់នៃ មូយ​ណែ (Mui Ne) ។ មានឈ្មោះដូចជា The Cliff, Romana resort, Sailing Club, Centara Mirage, Anantara, Terracotta... គឺជាអាស័យដ្ឋានដ៏ល្បីល្បាញសម្រាប់ការ​សម្រាក​លំហែកាយ និងទទួលបទពិសោធន៍ដ៏គួរឱ្យចាប់អារម្មណ៍សម្រាប់ភ្ញៀវទេសចរជាតិ និងអន្តរជាតិ រាល់ពេលដែលពួកគេមកកាន់មូយ​ណែ (Mui Ne) -  ទីក្រុង​ ផាម​ថៀត (Phan Thiet)។ ដូច្នេះហើយ មូយ​ណែ (Mui Ne) ត្រូវបានគេស្គាល់ដោយរហស្សនាមថា “​មណ្ឌល​ resort” របស់ប្រទេសវៀតណាម។

លាដៃគ្រួសារប្ដីប្រពន្ធលោក L.C និងលោកស្រី  N.T. ក្រុមយើងបានជ្រើសរើស Centara Mirage Resort ដែលមានទីតាំងនៅឈូងសមុទ្រ ហន​រើម (Hon Rom) ក្នុងសង្កាត់ មូយ​ណែ (Mui Ne) ជាកន្លែងឈប់សម្រាក និងសម្រាប​លំហែកាយ។ Centara Mirage Resort ត្រូវបានសាងសង់តាមរចនាបទ មេឌីទែរ៉ាណេ - អេស្បាញ ធំទំលំទូលាយក្នុងទំហំ​ផ្ទៃដីរហូតដល់ ១០០០ ហិកតា ហើយទើបតែបើកដំណើរការស្វាគមន៍ភ្ញៀវ នៅចុងឆ្នាំ ២០២១ ដូច្នេះវាដូចជាជំនោរខ្យល់ថ្មីដែលរួមចំណែកដល់ភាពសម្បូរបែបនៃ "ឋាន​សួគ៍សម្រាក​លំហែកាយ" មូយ​ណែ (Mui Ne) ។

ក្នុងអំឡុងពេលដែល​ស្នាក់​នៅ​ មូយ​ណែ (Mui Ne) យើងខ្ញុំបានទៅទស្សនា resort សណ្ឋាគារមួយចំនួនច្រើនដែលបានរចនាទាំងលំដាប់តាមបែបអាស៊ី និងអឺរ៉ុបផង ពីបុរាណរហូតដល់ទំនើប ជាមួយនឹងសេវាកម្មប្រើប្រាស់ចម្រុះដែលដំណើរការតាមបណ្តោយឆ្នេរសមុទ្រ មូយ​ណែ (Mui Ne) ជាមួយ​ឆ្នេរខ្សាច់ពណ៌សរាបស្មើ ទឹកសមុទ្រពណ៌ខៀវថ្លា រួមផ្សំ​នឹងរលកបោកបក់យ៉ាងទន់ភ្លន់។ សមុទ្រ មូយ​ណែ (Mui Ne) មានភាពស្រស់បំព្រង ទាក់ទាញភ្ញៀវទេសចរណ៍បរទេសជាច្រើននាក់ មក​លេងកន្សាន្ត​ ហែល​ទឹក​សមុទ្រ ហាលកម្ដៅថ្ងៃ ​និង​ជិះ​ក្តារ​រំអិល​ទឹក​សមុទ្រ... បង្កើតរូបភាពទេសចរណ៍ដ៏រស់រវើក។

ម្ហូបអាហារនៅមូយ​ណែ (Mui Ne) ក៏គួរឱ្យចាប់អារម្មណ៍ផងដែរ ជាមួយនឹងមុខម្ហូបធ្វើពី​គ្រឿងសមុទ្រស្រស់ៗដែលត្រូវបានកែច្នៃតាមរចនាបទរបស់​ប្រជាជន​រស់​ក្នុងស្រុក នៅតាមភោជនីយដ្ឋាន បណ្តោយ ​ ឆ្នេរមូយ​ណែ (Mui Ne) ។ ប្រសិនបើអ្នកមក មូយ​ណែ (Mui Ne អ្នក​គួរតែសាកល្បងញ៉ាំគ្រំ និងខ្យងអាំងជាមួយខ្លាញ់ខ្ទឹមដែលហូបជាមួយនំបញ្ចុក​ និង​ទឹក​ត្រីសុទ្ធ​​ ផាន​ថៀត  (Phan Thiet)  នោះជាបទពិសោធន៍ចំពោះមុខម្ហូបដ៏គួរឱ្យចាប់អារម្មណ៍មួយ។

ក្លាយជាគោលដៅឈានមុខក្នុងតំបន់

យោងតាមតម្រង់ទិស មូយ​ណែ (Mui Ne) ត្រូវបានរដ្ឋាភិបាលអនុម័តអំពីផែនការមេអភិវឌ្ឍតំបន់ទេសចរណ៍ថ្នាក់ជាតិ រហូតដល់ឆ្នាំ ២០៤០ និងចក្ខុវិស័យដល់ឆ្នាំ ២០៥០ ជាមួយនឹងការប្តេជ្ញាចិត្តលើកស្ទួយបញ្ជូនតំបន់ទេសចរណ៍ជាតិ មូយណែ (Mui Ne) ទៅជាគោលដៅនាំមុខគេក្នុងតំបន់។តាមរយៈនោះ តំបន់ទេសចរណ៍ជាតិ មូយ​ណែ (Mui Ne) ត្រូវបានគ្រោងទុកលើផ្ទៃដីសរុបចំនួន ១៤.៧៦០ ហ.ត ក្នុងភូមិភាគនៃឆ្នេរចំនួន ៣ គឺទីក្រុង ផាម​ថៀត (Phan Thiet) ស្រុក បាក​ប៊ិញ (Bac Binh) និងស្រុក ទុយ​ផង (Tuy Phong)។ ក្រៅពីអាទិភាពដោយ អាកាសធាតុនិងទេសភាពដែលធម្មជាតិអំណោយផល មូយ​ណែ (Mui Ne) ក៏ប្រមូលផ្តុំអាស័យដ្ឋានវប្បធម៌ និងប្រវត្តិសាស្ត្រដ៏ល្បីល្បាញ​ និងសម្បូរបែបជាច្រើន ដែលបាន​កំណត់លក្ខណៈពិសេសនៃតំបន់ឆ្នេរសមុទ្រមានប្រពៃណីបុរាណពី​យូរ​លង់​មក​ហើយ។ 

នៅទីនោះ​មានប្រជុំប្រាសាទចាមបុរាណ Po sah Inu (សង្កាត់ភូហាយ (Phu Hai)) ជាមួយនឹងពិធីបុណ្យ Kate ប្រពៃណីរបស់ជនជាតិដើមចាម មានសាលា យុក​ថាញ (Duc Thanh) នៅក្បែរដងទន្លេ កាទី (Ca Ty) ដែលជាកន្លែងរក្សាទុកអនុស្សាវរីយ៍របស់លោកប្រធានហូជីមិញ (Ho Chi Minh) អារាម វ៉ាន់​ធុយ​ទូ  (Van Thuy Tu) ត្រូវបានសាងសង់ក្នុងឆ្នាំ ១៧៦២ ដែលជាកន្លែង​រក្សានិង​ដាក់​តាំងគ្រោងឆ្អឹងត្រីបាឡែនធំបំផុតនៅប្រទេសវៀតណាម មានទឹកជ្រោះ ទៀន (Tien) (សង្កាត់ ហាម​ទៀន (Ham Tien)) ដែលមានចរន្តទឹកយ៉ាងត្រជាក់ហូរចេញពីចន្លោះភ្នំខ្សាច់ក្រហមទាំងពីរ។ មាន ហន​រើម (Hon Rom) នៅតែ​រក្សាទេសភាពធម្មជាតិ​​​យ៉ាងសុខសាន្ត; ភូមិនេសាទ មូយ​ណែ (Mui Ne) នាំមកនូវលក្ខណៈពេញ​លេញនៃភូមិនេសាទនៅតំបន់​សមុទ្រ។ នៅទីនេះក៏មានឆ្នេរថ្មប្រាំពីរពណ៌ឆ្នេរសមុទ្រ (ឃុំ ប៊ិញ​ថាញ (Binh Thanh) ស្រុក ទុយ​ផង (Tuy Phong)) ត្រូវបានមជ្ឈមណ្ឌលសៀវភៅកំណត់ឯកទគ្គកម្មវៀតណាមទទួលស្គាល់ថាជា "ឆ្នេរថ្មដែលមានទ្រង់ទ្រាយ និងពណ៌ច្រើនបំផុតនៅវៀតណាម"; មានបឹងទឹកសាបធម្មជាតិមួយនៅកណ្តាលវាលខ្សាច់ដ៏ធំល្វឹងល្វើយមួយឈ្មោះថា បាវត្រាំង (Bau Trang) (ឃុំ ហ័រថាំង ( Hoa Thang) ស្រុក បាក់​ប៊ិញ (Bac Binh))។ លើសពីនេះ មូយណែ (Mui Ne) ក៏ជាឆ្នេរមួយក្នុងចំណោមឆ្នេរ ទាំង ៥០ ដែលល្អបំផុត នៅលើពិភពលោកសម្រាប់កីឡាជិះទូក​ក្តោង និងជាឆ្នេរនាំមុខរបស់អាស៊ីសម្រាប់​កីឡានេះផងដែរ។ កន្លែងនេះបានរៀបចំការប្រកួតកីឡាជិះទូកក្តោង ជិះ​ក្តាររអិលសមុទ្រជាច្រើនលើកដែលទាក់ទាញកីឡាករជាច្រើនមកពីប្រទេសជាច្រើនជុំវិញពិភពលោកមកចូលរួមប្រកួត។

ល្បែងម៉ូតូឡើងភ្នំខ្សាច់ បាវត្រាំង (Bau Trang) ។ រូបថត៖ ហឹវថាញ

គ្រូអាគមនៃសហគមន៍ជនជាតិចាម (ខេត្ត ប៊ិញ​ធួន (Binh Thuan)) កំពុងរៀបចំគ្រឿង​សំណែននៅប្រាសាទបុរាណ Po Sah Inu នៅទីក្រុង ផាន​ថៀត (Phan Thiet) ក្នុងពិធីបុណ្យ Kate។ រូបថត៖ ង្វៀន​ថាំង

តំបន់ទេសចរណ៍ជាតិ មូយ​ណែ (Mui Ne) ក៏មានសមត្ថភាពតភ្ជាប់ជាមួយតំបន់ទេសចរណ៍ផ្សេងៗទៀតរបស់ខេត្ត​ ប៊ិញ​ធួន (Binh Thuan) ក៏ដូចជាក្នុងតំបន់ ដោយមានគោលដៅប្រើប្រាស់សក្តានុពលទេសចរណ៍បានល្អបំផុត ធានាប្រសិទ្ធភាពសេដ្ឋកិច្ចសង្គម លើកកម្ពស់ គុណភាព​រស់នៅរបស់ប្រជាជន នាំមូយ​ណែ (Mui Ne) ទៅជាមជ្ឈមណ្ឌលទេសចរណ៍​​ថ្នាក់អន្តរជាតិ អាស័យដ្ឋានគោលដៅនាំមុខគេនៃតំបន់អាស៊ីប៉ាស៊ីហ្វិក។

នាបច្ចុប្បន្ន ខេត្ត​ ប៊ិញ​ធួន (Binh Thuan) បានកត់ត្រាឈ្មោះរបស់ខ្លួនក្នុងបញ្ជីខេត្តទេសចរណ៍ឆ្នើមទាំង ១០ របស់ប្រទេសវៀតណាម ហើយ មូយ​ណែ (Mui Ne) បានក្លាយជាតំបន់ទេសចរណ៍ជាតិមួយក្នុងចំណោមតំបន់ទេសចរណ៍ជាតិទាំង ៦ ទូទាំងប្រទេស។ ភ្ញៀវទេសចរមកកាន់តំបន់ទេសចរណ៍ជាតិ មូយ​ណែ (Mui Ne) នឹងទទួលបានបទពិសោធន៍ទេសចរណ៍ប្លែកៗ និងគួរឲ្យចាប់អារម្មណ៍ ដូចជាការទស្សនា ការសម្រាកលំហែកាយនៅឆ្នេរសមុទ្រ ការលេងកីឡាសមុទ្រ ទេសចរណ៍សមុទ្រ និងទេសចរណ៍សាសនាលើកោះ ...

លោក ប៊ុយ​ថេញ៉ឹន (Bui The Nhan) នាយកមន្ទី​វប្បធម៌ កីឡា និងទេសចរណ៍ ខេត្ត ប៊ិញ​ធួន (Binh Thuan) បានឲ្យដឹងថា វិស័យទេសចរណ៍របស់ ខេត្ត ប៊ិញ​ធួន (Binh Thuan) បានខិតខំប្រឹងប្រែងអស់ពីកម្លាំងកាយចិត្ត ដើម្បីកសាងម៉ាកយីហោទេសចរណ៍សមុទ្រ រួមជាមួយនឹងការរៀបចំព្រឹត្តិការណ៍អន្តរជាតិនានាដែល​មាន​លក្ខណៈពិសេស​ដាច់​ដោយឡែក ក្នុង​រយៈពេល​ច្រើន​ឆ្នាំ។  ហេតុ​ដូច្នេះ ក្នុង​រយៈពេល ៦ ខែដើមឆ្នាំ២០២២ ខណៈពេលរោគរាតត្បាតនៃជំងឺកូវីដ១៩ ត្រូវបានគ្រប់គ្រងដោយជោគជ័យ ចំនួនភ្ញៀវទេសចរដែលមកលេងកម្សាន្តនៅទីក្រុង ផានថៀត (Phan Thiet) បានកើនឡើងដល់ជាង ១,៩ លាននាក់ កើនឡើង ៣០% ធៀបនឹងរយៈពេលដូចគ្នាក្នុងឆ្នាំ ២០២១។ ក្នុងនោះ ភ្ញៀវបរទេសប្រហែល ២០.៦៤០នាក់ កើនឡើង ២០%; ប្រាក់ចំណូលត្រូវបានប៉ាន់ប្រមាណ ៣.៧០០ ពាន់លានដុង កើនឡើង៣% ធៀបនឹងរយៈពេលដូចគ្នាក្នុងឆ្នាំ២០២១។

បន្ទាប់ពី ៣០ ឆ្នាំចាប់តាំងពីការបំបែកចេញពីខេត្ត ធួន​ហាយ (Thuan Hai) (១៩៩២) វិស័យទេសចរណ៍ ខេត្ត ប៊ិញ​ធួន (Binh Thuan) មានការអភិវឌ្ឍយ៉ាងខ្លាំងក្លា បញ្ជាក់នូវម៉ាកយីហោ និងបន្តរក្សាសន្ទុះនៃកំណើនរបស់ខ្លួន មិនត្រឹមតែជាចំណុចភ្លឺស្វាងលើផែនទីទេសចរណ៍របស់វៀតណាមនៅភាគខាងត្បូងប៉ុណ្ណោះទេ មូយណែ (Mui Ne) នៅទាំងបានបង្កើនការអភិវឌ្ឍដ៏អស្ចារ្យ ក្លាយជាគោលដៅទេសចរណ៍ឆ្នេរសមុទ្រដ៏ល្បីលើពិភពលោក ដែលសក្តិសមនឹងកិត្តិនាមថា "ឋានសួគ៌សម្រាក​លំហែកាយ​ "./.

នៅរដូវខ្យល់បក់មកពីខាងជើង កីឡាជិះក្តាររអិល​សមុទ្រ បានទាក់ទាញអ្នកទេសចរយ៉ាងច្រើន ជាពិសេសជិះស្គីតោងខ្លែង និងជិះទូក​ក្តោង។ រូបថត៖ ហឹវ​ថាញ

នៅថ្ងៃទី ២៤ ខែតុលា ឆ្នាំ ១៩៩៥ ទីក្រុង ផាម​ថៀត(Phan Thiet)  ចៃដន្យទទួលស្វាគមន៍ភ្ញៀវទេសចររាប់សែននាក់ បន្ទាប់ពីទីក្រុងនេះត្រូវបានអ្នកវិទ្យាសាស្ត្រកំណត់ថា ជាកន្លែងដ៏ល្អបំផុតដើម្បីសង្កេតមើលសូរ្យគ្រាសទាំងមូលខាងចុងនៃសតវត្សទី ២០។ ដោយសារព្រឹត្តិការណ៍នេះ សក្ដានុពលទេសចរណ៍របស់ទីក្រុង ផាន​ថៀត (Phan Thiet) ត្រូវបានរកឃើញដោយភ្ញៀវទេសចរក្នុងស្រុក និងបរទេសជាច្រើន ត្រូវបាន​វិនិយោគិនអង្កេតពិនិត្យ ហើយបានចាប់ផ្តើមរលកនៃការវិនិយោគ resort ទ្រង់ទ្រាយធំនៅទីនេះ។ ចាប់តាំងពីពេលនោះមក មូយ​ណែ (Mui Ne)  -  ទីក្រុង ផាន​ថៀត (Phan Thiet) ត្រូវបានគេចាត់ទុកថាជា "ទីតាំងប្រមូល​ផ្តុំ resort ​" របស់វៀតណាម។

អត្ថបទ៖VNP/ សើន​ងា​  -  រូបថត៖ ង្វៀន​ថាំង ហឹវ​ថាញ ហ័ងហា ឡេ​មិញ

ប្រែសម្រួល​ដោយ​ង្វៀន​យ៉ាង