ការវះកាតត់ប្តូរបេះដូងលើកដំបូងនៅសាកលវិទ្យាល័យវេជ្ជសាស្ត្រ និងឱសថសាស្ត្រទីក្រុងហូជីមិញ

ការប្តូរបេះដូងក្នុង​ប្រទេសវៀតណាម​អូសបន្លាយ​ក្នុងរយៈពេល ១០ ម៉ោង ដោយមានការចូលរួមពីវេជ្ជបណ្ឌិត បុគ្គលិកពេទ្យជិត ១០០ នាក់នៅមន្ទីរពេទ្យសាកលវិទ្យាល័យ​វេជ្ជសាស្ត្រ និង​ឱសថសាស្ត្រ​ទីក្រុង​ហូជីមិញទទួលបានជោគជ័យ។

នៅពាក់កណ្តាលអធ្រាត្រថ្ងៃទី ២៤ ខែសីហា និង ទៀបភ្លឺថ្ងៃទី២៥ ខែសីហា មន្ទីរពេទ្យ​សាកលវិទ្យាល័យ​វេជ្ជសាស្ត្រ និង​ឱសថទី​ក្រុង ​ហូជីមិញ បានធ្វើការវះកាត់ និងប្តូរបេះដូងជាលើកដំបូងសម្រាប់អ្នកជំងឺ L.A.H (អាយុ ៣៧ ឆ្នាំ) មកពីខេត្ត យ៉ាឡាយ (Gia Lai) ។ សាស្ត្រាចារ្យរង បណ្ឌិត វេជ្ជបណ្ឌិត ង្វៀនហ័ងឌីញ (Nguyen Hoang Dinh) នាយករងនៃមន្ទីរពេទ្យ​សាកលវិទ្យាល័យ​វេជ្ជសាស្ត្រ និង​ឱសថទី​ក្រុង ​ហូជីមិញ បានចែករំលែកថា លោក L.A.H ត្រូវបានគេធ្វើរោគវិនិច្ឆ័យថា មានជំងឺសាច់ដុំបេះដូងរីកប៉ោង ជាមួយភារៈបេះដូងខ្សោយខ្លាំង ហើយប្រសិនបើគាត់មិនបានវះកាត់និងប្តូរបេះដូងទាន់ពេលទេ គាត់នឹងមិនអាចរស់នៅបានយូរឡើយ។ អ្នកជំងឺបានចុះឈ្មោះក្នុងបញ្ជីនៃមជ្ឈមណ្ឌលពង្រាយសរីរាង្គជាតិ សំណាងល្អនៅព្រឹកថ្ងៃទី២៤ ខែសីហា យើងបានទទួលដំណឹងថា មានបេះដូងសមរម្យសម្រាប់អ្នកជំងឺ បេះដូងនេះបានមកពីមន្ទីរពេទ្យពហុព្យាបាល ស្វាញ​ប៉ូន (Xanh Pon)  រដ្ឋធានី ហាណូយ (Ha Noi) ។

 

 

ដំណើរ​នៃ​បេះដូង​ដែលបានបរិច្ចាគគឺមក​ពី​អ្នក​ជំងឺស្លាប់​​ខួរក្បាល ​បាន​ចាប់ផ្តើម​ពី​បន្ទប់​វះកាត់​នៃ​មន្ទីរពេទ្យ ស្វាញ​ប៉ូន (Xanh Pon)  រដ្ឋធានី ហាណូយ (Ha Noi) នា​ម៉ោង ៨ និង ០០ នាទីយប់​ថ្ងៃ​ទី ២៤ សីហា ដោយ​ទាក់ទាញ​ការ​ចាប់អារម្មណ៍​ពីមតិ​សាធារណក្នុង​ស្រុក។ បេះដូងត្រូវបានការពារ និងជំនួយ​ពីវេជ្ជបណ្ឌិត បុគ្គលិកពេទ្យរាប់រយនាក់ និងស្ថាប័នរដ្ឋជាច្រើន ក្នុងអំឡុងពេលធ្វើដំណើរការពី​ខាងជើង​ទៅកាន់​ទីក្រុង​ហូជីមិញ (Ho Chi Minh) ។

ការវះកាត់បាន​ប្រព្រឹត្តទៅក្នុងរយៈពេល ៥ ម៉ោង ចាប់ពីការវះកាត់ដល់ការប្តូរបេះដូងត្រូវបានបញ្ចូលទៅក្នុងខ្លួនអ្នកជំងឺ នៅពាក់កណ្តាលអធ្រាត្រថ្ងៃទី ២៤ ខែសីហា និងបញ្ចប់នៅម៉ោង ៣ ទៀបភ្លឺថ្ងៃទី ២៥ ខែសីហា។ អ្នក​ចូល​រួម​ក្នុង​ការ​វៈកាត់​នេះផ្តោតអារម្មណ៍យ៉ាងខ្លាំង រាល់នាទី សូម្បីតែរាល់វិនាទីត្រូវបានគិតគូរយ៉ាងប្រុងប្រយ័ត្ន។

 

បន្ទាប់ពីការវះកាត់ប្តូរបេះដូង លោក L.A.H ត្រូវបានត្រួតពិនិត្យ និងថែទាំដោយវេជ្ជបណ្ឌិត និងគិលានុបដ្ឋាយិកាផ្នែកថែទាំសុខភាពសកម្ម ក្នុងលក្ខខណ្ឌគ្មានមេរោគយ៉ាងតឹងរ៉ឹង។ "នេះគឺជាកាលៈទេសៈដ៏ពិសេសមួយ “គ្រួសាររបស់យើងខ្ញុំពិតជាដឹងគុណយ៉ាងជ្រាលជ្រៅចំពោះក្រុមវេជ្ជបណ្ឌិតទាំងអស់ ដោយមានជំនាញវិជ្ជាជីវៈ និងការយកចិត្តទុកដាក់ក្នុងការព្យាបាលអ្នកជំងឺ។ មន្ទីរពេទ្យបានដោះស្រាយកាលៈទេសៈនេះយ៉ាងឆាប់រហ័ស និងហ្មត់ចត់។ យើង​ខ្ញុំ​ពិតជា​រំភើបចិត្តនិង​ដឹងគុណចំពោះ​អ្នក​ដែល​បានជួយប្អូនប្រុសខ្ញុំមានបានឱកាស ដើម្បីអាច​រស់លើកទីពីរក្នុងជីវិត" បងប្រុសរបស់លោក. L.A.H ចែករំលែកអារម្មណ៍។

ការវះកាត់​និងប្តូរបេះដូងលើកដំបូងនៅមន្ទីរពេទ្យសាកលវិទ្យាល័យវេជ្ជសាស្ត្រ និងឱសថទីក្រុងហូជីមិញ គឺជាដំណើរអស្ចារ្យមួយដែលបង្ហាញពីចិត្តមេត្តា និងសេចក្តីស្រឡាញ់ចំពោះមនុស្ស និងបង្ហាញពីសមត្ថភាព និងជំនាញរបស់ក្រុមវេជ្ជសាស្ត្រទ្យវៀតណាម./.

• អនុវត្ត៖ វូហាយ​សើន ប្រែសម្រួល​ដោយង្វៀន​យ៉ាង