អស្ចារ្យផ្សារ ង៉ៀនឡន (Nghien Loan)
ចំពោះប្រទេសដែលមានខឿនកសិកម្មស្រូវជើងទឹក តាំងពីយូរយារមកដូចជាវៀតណាម ក្របី និង គោ ជាសត្វចិញ្ចឹមដែលមានសារៈសំខាន់បំផុត។ ហេតុនេះ តាំងពីអតីតកាល បុព្វបុរសបានបង្កើតមានផ្សារក្របី គោ ល្បីឈ្មោះដូចជា៖ ផ្សារអូ - U (ខេត្តងែអាន - Nghe An) ផ្សារបាន - Ban (ខេត្តថាញហ្វ័រ- Thanh Hoa) បាក់ហា - Bac Ha កាយកូវ - Cai Cau (ខេត្តឡាវកាយ- Lao Cai) ត្រាលិញ - Tra Linh (ខេត្តកាវបាំង- Cao Bang)។ល។ ក៏ប៉ុន្តែ ផ្សារក្របីង៉ៀនឡន(Nghien Loan)(ស្រុកផាណាំ - Pac Nam ខេត្តបាក់កាន- Bac Kan) ជាផ្សារពិសេសបំផុត ពីព្រោះនៅរក្សាបានលក្ខណៈវប្បធម៌ពិសេស និងជាផ្សារមានក្របីគោ ត្រូវបានលក់នៅពេលប្រជុំផ្សារច្រើនបំផុតក្នុងទូទាំងប្រទេស។
ផ្សារក្របី គោ ឃុំង៉ៀនឡន (Nghien Loan) ស្រុកផាកណាំ (Pac nam) ខេត្តបាក់កាន (Bac Kan) ស្ថិតនៅជ្រលងភ្នំមួយ ចំណុះភូមិឌិញ (Dinh) និង ភូមិខូយអ៊ូន (Khuoi Un) នៅចម្ងាយពីផ្លូវខេត្ត២៥៨B ប្រហែល៥០០ម៉ែត្រ ដូចនេះងាយស្រួលសម្រាប់ការធ្វើដំណើរទៅមក ប្រមូលទំនិញ ជួញដូរ និងដឹកជញ្ជូន។
នេះជាផ្សារក្របី គោ ម៉ូយសំខាន់នៅខេត្តបាក់កាន (Bac Kan) និងទូទាំងតំបន់ភូមិភាគខាងជើង។ ភាគច្រើនក្របី គោ នៅទីនេះបានលក់ក្នុងផ្សារនេះ នឹងបាននាំយកទៅតាមខេត្ត ក្រុងដូចជា ខេត្តថៃង្វៀន (Thai Nguyen) ក្រុងហាណូយ ខេត្តណាមដិញ (Nam Dinh) ខេត្តឡាងសើន (Lang Son)។ល។ រដូវខែ១២ ផ្សារកុះករបំផុត ពីព្រោះគេទិញក្របីគោសម្រាប់ធ្វើសាច់ក្នុងរដូវបុណ្យចូលឆ្នាំថ្មី មានពេលខ្លះចំនួនក្របីគោដែលបានលក់ដូរឡើងដល់រាប់ពាន់ក្បាល។
សកម្មភាពលក់ទិញនៅផ្សារប្រព្រឹត្តទៅដោយសាមញ្ញ អ្នកលក់ចេញតម្លៃ អ្នកទិញមានសិទ្ធិតថ្លៃតាមចិត្ត រហូតដល់គូភាគីយល់ព្រម រាប់លុយ និងដឹកក្របីទៅ។ លោកតា ម៉ាកៀនលឺវ (Ma Kien Luu) មកពីខេត្តកាវបាង (Cao Bang) រៀបរាប់ថា៖ “ខ្ញុំតែងតែមកផ្សារនេះ ដើម្បីទិញក្របី និងគោ។ នៅទីនេះលក់ទិញងាយ និងរហ័ស។ អ្នកស្រុកស្មោះត្រង់ មិននិយាយកាត់ថ្លៃណាស់ណាទេ។ ពេលប្រជុំផ្សារម្តងៗ ខ្ញុំសុទ្ធតែទិញបានក្របី និងគោពី៩ - ១០ក្បាល។ រៀងរាល់ខែ ខ្ញុំទិញក្របី និងគោនៅផ្សារនេះ ប្រហែល១០០ក្បាល”។
នៅផ្សារង៉ៀនឡន (Nghien Loan) ក្របី និងគោបច្ចុប្បន្នបានថ្លៃ ក្របីធំធាត់ អាយុ៣-៤ឆ្នាំ អាចលក់បានដោយតម្លៃជិត៤០លានដុង។ យោងតាមក្របីតូចធំនឹងមានតម្លៃផ្សេងគ្នា ដូចកូនក្របីអាយុ១ឆ្នាំ មានតម្លៃជាង១០លានដុង។ តាមធម្មតា អ្នកស្រុកទៅផ្សារ ដើម្បីទិញកូនគោ កូនក្របី ឬក្របីគោស្គម យកទៅបំប៉នទុកសម្រាប់លក់យកចំណេញនៅពេលប្រជុំផ្សារខាងមុខ។ ប៉ុន្តែក៏មានមនុស្សខ្លះ មកផ្សារនេះដើម្បីជ្រើសទិញក្របីគោសម្រាប់ធ្វើស្រែ និងតពូជដែរ។ លោកតា យឿង វ៉ាន់គី (Duong Van Ky) ជនជាតិម៉ុង (Mong) នៅភូមិណាផាយ (Na Phay) ឃុំង៉ៀនឡន (Nghien Loan) រៀបរាប់៖ “ពីរនាក់ប្តីប្រពន្ធខ្ញុំ មកផ្សារនេះដើម្បីគោមេ។ ផ្ទះខ្ញុំមានគោ៥ក្បាលហើយ ប៉ុន្តែខ្ញុំចង់ទិញបន្ថែមមួយក្បាលទៀត សម្រាប់កើតកូន។ ខ្ញុំទើបលក់គោបាមួយក្បាលជាង២០លានដុង ដូចនេះទើបមានប្រាក់ទិញកូនថ្មី”។
លោកតា ង្វៀន វ៉ាន់ វិច (Nguyen Van Vich) ភូមិលោមមែវ (Lom Meo) ឃុំជូហឿង (Chu Huong) ស្រុកបាបែ (Ba Be) ធ្វើដំណើរជិត២០គីឡូម៉ែត្រ ដើម្បីលក់គោ៥ក្បាល។ គោធំបំផុត អាយុ៤ឆ្នាំ មានតម្លៃ១៦,៥លានដុង គោតូចបំផុត ជាកូនគោអាយុបាន១ឆ្នាំ មានតម្លៃ៨លានដុង។ លោកតា វិច (Vich) រៀបរាប់ថា៖ “ខ្ញុំជាអ្នកប្រកបរបរលក់គោ នៅពេលប្រជុំផ្សារគាត់តែងដឹកគោពី៥ - ៦ក្បាលទៅផ្សារ ខ្ញុំចេះតែទិញពីអ្នកស្រុក រួចនាំយកទៅផ្សារលក់។ សំណាងចំណេញបាន១លានដុង ២លានដុងក្នុងមួយក្បាល ជួនមានចំណេញពី២០០.០០០ដុង - ៣០០.០០០ដុងក្នុងមួយក្បាលក៏លក់ដែរ”។
នៅផ្សារនេះ មានក្របីស្គមជាច្រើន ក្របីទាំងនេះតែងបានគ្រួសារអ្នកមាន និងឈ្មួញជ្រើសទិញ យកទៅបំប៉នសាច់ បន្ទាប់មកយកទៅលក់។ លោកតា ឡឿង វ៉ាន់ធ្វឹត (Luong Van Thuat) នៅឃុំខាងនិញ (Khang Ninh) ស្រុកបាបែ (Ba Be) ចំណាយជិត៦០លានដុង ទិញក្របី៣ក្បាល មានរាងធំតែស្គម។ លោកធ្វឹត (Thuat) ឱ្យដឹងថា៖ “ខ្ញុំមានវាលព្រលែង ទិញយកទៅចិញ្ចឹមប្រហែល១ - ២ខែ យកទៅផ្សារលក់វិញ ក៏ចំណេញបានរាប់លានដុងក្នុង១ក្បាលដែរ”៕
- អត្ថបទ៖ ដូក្វាងតឹនហ្វាង ហ្វាងយ៉ាង
- រូបថត៖ ដូក្វាងតឹនហ្វាង ហ្វាងយ៉ាង
- បច្ចេកទេស ក្រាហ្វិក៖ ត្រាងញ៉ុង
- ប្រែសម្រួល៖ រីកើង