សម្រស់ពណ៌មាស តាមកុក (Tam Coc)
តាមកុក - បិចដុង (Tam Coc – Bich Dong) ចំណុះភូមិសាស្រ្ត ឃុំនិញហាយ (Ninh Hai) ស្រុកហ្វ័រលឺ (Hoa Lu) ខេត្តនិញប៊ិញ (Ninh Binh) នៅចម្ងាយពីមជ្ឈមណ្ឌលទីក្រុងនិញប៊ិញ (Ninh Binh) ប្រហែល៧គីឡូម៉ែត្រ។ តាមកុក (Tam Coc) មានន័យថាល្អាង៣ រួមមាន៖ ល្អាងកា (Ca) ល្អាងហាយ (Hai) និងល្អាងបា (Ba) ជាមួយនឹងដងស្ទឹង ងោដុង (Ngo Dong) ស្ងប់ស្ងាត់អណ្តែតរសាត់ខ្លួនហូតកាត់កណ្តាលព្រៃភ្នំ។ ដើម្បីទស្សនាបានសម្រស់តាមកុក (Tam Coc) ភ្ញៀវទេសចរត្រូវចំណាយរយៈពេលធ្វើដំណើរពី២ទៅដល់៣ម៉ោង ដោយអង្គុយទូករសាត់បណ្តោយតាមដងស្ទឹង ងោដុង (Ngo Dong) លិចអណ្តែតស្រពិចស្រពិលក្បែរជញ្ជាំងភ្នំ។
តាមកុក (Tam Coc) នៅរដូវកាលណាក៏ស្អាតទាំងអស់ ជាពិសេសរដូវប្រាំងជាពេលដែលតាមកុក (Tam Coc) មានសម្រស់ស្រស់ស្អាតបំផុត ដណ្តប់ទៅដោយពណ៌មាសភ្លឺផ្លេកនៃវាលស្រែស្រូវទុំ វែងអន្លាយតាមដងស្ទឹង ងោដុង (Ngo Dong)។ ក្រោមរស្មីចែងចាំងនារដូវប្រាំង តាមកុក (Tam Coc) រំលេចសម្រស់ប្រៀបដូចឋានសួគ៌។ សម្រស់ព្រំវាលស្រែស្រូវទុំ ព្រៃភ្នំ ពពកលាយចម្រុះបន្ទាបពីលើ ធ្វើឱ្យទីនេះដូចជាផ្ទាំងគំនូរធម្មជាតិ ពោរពេញទៅសម្រស់ពណ៌ឆើតឆាយ។
ជាពិសេស ឆ្នាំនេះ ភ្ញៀវទេសចរអញ្ជើញមកទស្សនាតាមកុក (Tam Coc) នឹងបានគយគន់វាលស្រែ ដែលមានលក្ខណៈរូបទង់ ឆ្លាក់អក្សរអណ្តែត “សម្រស់ពណ៌មាសតាមកុក (Tam Coc)”។ នេះជាវាលស្រែស្រូវសិល្បៈដំបូង នៅភូមិភាគខាងជើង ជាការរួមគ្នាព្រួតដៃសាងឡើង រវាងសហគ្រាសនិងរដ្ឋអំណាច ព្រមជាមួយនឹងប្រជាជនមូលដ្ឋាន បានបញ្ចូលព្រលឹងមកលើដើមធុញ្ញជាតិ បង្កើតជាស្នាដៃសិល្បៈពិសេស ជាចំណាប់អារម្មណ៍បំផុសគំនិតមួយ ដែលគ្មានព្រំដែនសម្រាប់អ្នកថតរូប ពេលអញ្ជើញទៅដល់តាមកុក (Tam Coc) ជាដោយឡែក និងដែនដីព្រៃភ្នំខេត្តនិញប៊ិញ (Ninh Binh) ដ៏មនោរម្យជាទូទៅ។
រូបភាពដងស្ទឹងងោដុង (Ngo Dong) ដូចជាសំពត់ស្រទន់ល្វិតល្វន់ បតបែនដណ្តប់លើវាលស្រែស្រូវទុំពណ៌មាស ក្រសោបស្រវាឱបដងភ្នំ នៅតាមកុក (Tam Coc) ជាទីតែងខាប់យកព្រលឹងអ្នកទេសចរ ដែលអញ្ជើញមកទស្សនានិងស្វែងយល់។
កន្លងទៅ ពេលជំងឺកូវិដ - ១៩ បានគ្រប់គ្រង ខេត្តនិញប៊ិញ (Ninh Binh) បានរៀបចំសប្តាហ៍ទេសចរណ៍ក្រោមប្រធានបទ “សម្រស់ពណ៌មាសតាមកុក (Tam Coc) - ត្រាងអាន (Trang An)” រួមមានសកម្មភាពទាក់ទាញដូចជា៖ វិថីថ្មើរជើង ទីផ្សារម្ហូងអាហារតាមកុក ដំណើរទេសចរណ៍ថតរូបនារដូវស្រូវទុំតាមកុក កម្មវិធីសិក្សាស្វែងយល់ ឧទ្ទេសនាមផលិតផលទេសចរណ៍ខេត្តនិញប៊ិញ (Ninh Binh) តាំងពិព័រណ៍សិល្បៈក្រោមប្រធានបទ “រដូវពណ៌មាសតាមកុក (Tam Coc) - ត្រាងអាន (Trang An)” កម្មវិធីសម្តែងអាយ៉ងទឹក ចម្រៀងចែវ ចម្រៀងសឹម និងទំនុកចម្រៀងភូមិភាគទាំង៣។ល។
ខេត្តនិញប៊ិញ (Ninh Binh) ខិតខំនាំយកសប្តាហ៍ទេសចរណ៍ “សម្រស់ពណ៌មាសតាមកុក (Tam Coc) - ត្រាងអាន (Trang An)” ឱ្យក្លាយជាព្រឹត្តិការណ៍ទេសចរណ៍ប្រចាំឆ្នាំ និងផលិតផលទេសចរណ៍ពិសេសទាក់ទាញ់ របស់មូលដ្ឋាន៕
អនុវត្ត៖ កុងដាត/កាសែតរូបភាពវៀតណាម
ប្រែសម្រួល៖ រីកើង