រចនាសម្ពន្ធគមនាគមន៍ - “ជំហានរបកគំហើញ” ដើម្បីទីក្រុងហូជីមិញ ឈានចូលយុគសម័យ
ហេដ្ឋារចនាសម្ព័ន្ធគមនាគមន៍របស់ទីក្រុងហូជីមិញ ក្រោយឆ្នាំ១៩៧៥ មានការផ្លាស់ប្តូរយ៉ាងខ្លាំង បំពេញតម្រូវការដឹកជញ្ជូន មិនត្រឹមតែក្នុងទីក្រុងប៉ុណ្ណោះ ថែមទាំងជាតំបន់សេដ្ឋកិច្ចសំខាន់នៃភាគខាងត្បូង ក្នុងដំណើរការអភិវឌ្ឍ និងសមាហរណកម្ម ផងដែរ។ ក្នុងនោះ អាចរៀបរាប់សំណង់សំខាន់ៗ មួយចំនួន ដូចជា ផ្លូវរូងក្រោមដីធូធីម (Thu Thiem) មហាវិថី ម៉ាយ ជីថ័រ (Mai Chi Tho) ផ្លូវផាម វ៉ាន់ដុង (Pham Van Dong) ផ្លូវវ៉ វ៉ាន់គៀត (Vo Van Kiet) ផ្លូវល្បឿនលឿនសាយស្គន - ទ្រុងឡឿង (Sai gon - Trung Luong) ផ្លូវល្បឿនលឿនឡុងថាញ - យូវយៃ (Long Thanh - Dau Giay)។ល។
ជាពិសេស ផ្លូវរថភ្លើងមេត្រូលេខ១ (បេនថាញ - សួយតៀន) (Ben Thanh - Suoi Tien) ទើបបានដាក់ឲ្យដំណើរការនៅដើមខែមីនា ឆ្នាំ២០២៥ ហើយត្រូវបានចាត់ទុកថា ជាជំហានដ៏ធំមួយ នៅក្នុងគមនាគមន៍ដឹកជញ្ជូនទំនើប នៃទីក្រុង។
លោក ង្វៀន វ៉ាន់ដឿក (Nguyen Van Duoc) ប្រធានគណៈកម្មាធិការប្រជាជនទីក្រុងហូជីមិញ បានសង្កត់ធ្ងន់ថា នេះជាគម្រោងគមនាគមន៍ទំនើប មានសារៈសំខាន់ ចំពោះការអភិវឌ្ឍសេដ្ឋកិច្ច -សង្គមនៃមូលដ្ឋាន បើកឱកាសថ្មីសម្រាប់ការអភិវឌ្ឍទីក្រុង ប្រកបដោយចីរភាព។
ថ្នាក់ដឹកនាំទីក្រុងបានសង្កត់ធ្ងន់ថា "ព្រឹត្តិការណ៍ដាក់ឲ្យដំណើរការផ្លូវរថភ្លើងមេត្រូលេខ ១ គឺជាការចាប់ផ្តើមនៃកម្មវិធីថ្មី លើដំណើរការអភិវឌ្ឍគមនាគមន៍ដឹកជញ្ជូនទំនើប នៃទីក្រុងហូជីមិញ"។
ភ្ញៀវទេសចរតម្រង់ជួរ ដើម្បីជិះសាកល្បងខ្សែរថភ្លើងមេត្រូលេខ១។
រូបថត៖ ង្វៀនឡឹន / VNP
មិនត្រឹមតែជាគម្រោង ដែលមានលក្ខណៈជានិមិត្តរូប នៃហេដ្ឋារចនាសម្ព័ន្ធទំនើបប៉ុណ្ណោះទេ ផ្លូវរថភ្លើងមេត្រូលេខ ១ នៅបានគេចាត់ទុកជាគ្រឹះធាដ៏សំខាន់សម្រាប់ទីក្រុងហូជីមិញ ជំរុញទេសចរណ៍បៃតងប្រកបដោយនិរន្តរភាព តភ្ជាប់នឹងតំបន់វប្បធម៌ ប្រវត្តិសាស្ត្រ និងកម្សាន្តពិសេសនៃទីក្រុង។
លោកស្រី ង្វៀន ធីអាញហ្វ័រ (Nguyen Thi Anh Hoa) នាយកមន្ទីរទេសចរណ៍ទីក្រុងហូជីមិញ រៀបរាប់ថា ផ្លូវរថភ្លើងមេត្រូលេខ១ ទៅអនាគតជាគម្នាស់ សម្រាប់ការអភិវឌ្ឍវិស័យទេសចរណ៍ទីក្រុង។ តាមរយៈការតភ្ជាប់ដ៏ងាយស្រួល ភ្ញៀវទេសចរអាចចូលទៅកាន់តំបន់វប្បធម៌ ប្រវត្តិសាស្ត្រ និងកម្សាន្តបានដោយងាយ ផ្តល់នូវការធ្វើដំណើរពេញលេញ សម្រាប់ភ្ញៀវទេសចរជាតិ និងអន្តរជាតិ។
បើតាមមន្ទីរទេសចរណ៍ទីក្រុងហូជីមិញ ផ្លូវរថភ្លើងមេត្រូលេខ១នេះ តភ្ជាប់មជ្ឈមណ្ឌល និងតំបន់ភាគខាងកើតទីក្រុង តាមរយៈនោះ នាំភ្ញៀវទេសចរខិតជិតជាង អាសយដ្ឋានទាក់ទាញល្បីៗជាច្រើន ដោយពេលវេលាធ្វើដំណើរឆាប់រហ័ស និងប្រាក់ចំណាយទាបសន្សំសំចៃ រួមជាមួយបទពិសោធន៍សម្បុរបែបជាច្រើន។ ឧទាហរណ៍ ពីស្ថានីយ៍បេនថាញ (Ben Thanh) (ខណ្ឌទី១) ដែលស្ថិតនៅចំកណ្តាលទីក្រុង ក៏ជាច្រកផ្លូវដ៏ល្អមួយសម្រាប់ភ្ញៀវទេសចរអាចទៅស្វែងយល់សំណង់ និមិត្តសញ្ញាជាច្រើននៃទីក្រុង ដូចជាផ្សារបេនថាញ (Ben Thanh) រោងមហោស្រពទីក្រុង ទីស្តីការក្រុមប្រឹក្សាប្រជាជន - គណៈ កម្មាធិការប្រជាជនទីក្រុង ផ្លូវថ្មើរជើង ង្វៀនហ្វេ (Nguyen Hue) សារមន្ទីរវិចិត្រសិល្បៈ។ល ។
ផ្លូវរថភ្លើងមេត្រូបេនថាញ - សួយតៀន (Ben Thanh - Suoi Tien) ក៏មានការតភ្ជាប់តំបន់ទេសចរណ៍ជាច្រើននៅលើភូមិសាស្រ្ត រួមមានមណ្ឌលទេសចរណ៍វប្បធម៌ សួយតៀន (Suoi Tien)។ ប្រាសាទរំលឹកស្តេចហ៊ុង (Hung) និងទីសក្ការៈបូជាមន្រ្តីមេទ័ព ង្វៀន ហូវកាញ (Nguyen Huu Canh) ជាសំណង់វប្បធម៌ - ប្រវត្តិសាស្ត្រដ៏លេចធ្លោទាំងពីរ នៅទីក្រុងធូឌឹក (Thu Duc) (ស្ថិតនៅក្នុងឧទ្យានប្រវត្តិវប្បធម៌ប្រជាជាតិ) ជាអាសយដ្ឋានទស្សនា មិនអាចបង់រំលង ពេលមកស្វែងយល់ភាគខាងត្បូងនៃប្រទេសវៀតណាម។
ផ្តើមពីភាពជោគជ័យដំបូងនៃផ្លូវរថភ្លើងមេត្រូលេ ខ១ បណ្តាញមេត្រូនៃទីក្រុងកំពុងបានស្រាវជ្រាវសិក្សា និងពង្រីកផ្លូវរថភ្លើងមេត្រូឡើងដល់ ១០ ខ្សែ ដោយមានប្រវែង ៥១០ គីឡូម៉ែត្រ វែងជាងផែនការចាស់ពីរដង បំពេញតម្រូវសេវាដឹកជញ្ជូនសាធារណៈ ៥០ - ៦០%។
ទន្ទឹមនឹងផ្លូវរថភ្លើងមេត្រូ បណ្តាញផ្លូវរថភ្លើងជាតិ ឆ្លងកាត់ទីក្រុងហូជីមិញ ក៏ត្រូវបានរៀបចំផែនការ និងធ្វើឱ្យប្រសើរឡើង ដើម្បីធានាការតភ្ជាប់ជាមួយតំបន់សេដ្ឋកិច្ចសំខាន់ នៃភាគខាងត្បូងនសប្រទេសវៀតណាម។ តាមរយៈនោះ ផ្លូវរថភ្លើងហាណូយ - ទីក្រុងហូជីមិញ (Ha Noi – Ho Chi Minh) នឹងបានពង្រីកជាផ្លូវភ្លោះ ទំហំខ្នាត ១.៤៣៥ ម៉ែត្រ។ កំណាត់ផ្លូវខ្លះក៏បានរៀបចំឱ្យរថភ្លើងធ្វើដំណើរឆ្ពោះទៅកាន់មជ្ឈមណ្ឌល ឬធ្វើដំណើរឆ្លងកាត់ទីក្រុង ដោយមានលក្ខណៈដឹកជញ្ជូភ្ញៀវក្នុងទីក្រុងតែប៉ុណ្ណោះ។
លើសពីនេះ ទីក្រុងនឹងបង្កើតផ្លូវរថភ្លើងថ្មីចំនួន ៦ ខ្សែ តភ្ជាប់តំបន់ និងមណ្ឌល រួមមាន៖ ផ្លូវរថភ្លើងល្បឿនលឿន នៅលើអ័ក្សខាងជើងទៅខាងត្បូងប្រទេស ផ្លូវរថភ្លើងទីក្រុងហូជីមិញ - កឹនធើ (Can Tho) (តភ្ជាប់បណ្តាខេត្តនៅវាលទំនាបទន្លេគឺឡុង) ផ្លូវទីក្រុងហូជីមិញ - តីនិញ (Tay Ninh) (បើកឱកាសតភ្ជាប់ពាណិជ្ជកម្មអន្តរជាតិ) ផ្លូវរថភ្លើង ធូធីម - ឡុងថាញ (Thu Thiem - Long Thanh) (តភ្ជាប់ជាមួយអាកាសយានដ្ឋានអន្តរជាតិឡុងថាញ) ផ្លូវរថភ្លើងទីក្រុងហូជីមិញ - ឡុកនិញ (Loc Ninh) (តភ្ជាប់ប្រទេសកម្ពុជា រួមចំណែកអភិវឌ្ឍប្រព័ន្ធផ្លូវរថភ្លើងអន្តរទ្វីបអាស៊ី) ផ្លូវរថភ្លើងឯកទេសតភ្ជាប់កំពង់ផែហ៊ីបផឿក (Hiep Phuoc) ស្រុកញ៉ាប៊ែ (Nha Be)។
ទីក្រុងហូជីមិញ កំណត់សាងសង់គម្រោងសំខាន់ៗចំនួន៧០។ ក្នុងនោះ មានគម្រោងសំណង់គំរូជាច្រើន ដូចជា៖ ផ្លូវល្បឿនលឿនក្រុងហូជីមិញ - ម៉ុកបៃ (Moc Bai) ផ្លូវក្រវាត់ក្រុងទី២ ផ្លូវក្រវាត់ក្រុងទី ៣ ផ្លូវក្រវាត់ក្រុងទី៤ ស្ពាន កឹនយើ (Can Gio) ស្ពានធូធីម (Thu Thiem) ទី៤ ស្ពានដុងណាយ (Dong Nai) ទី២ ស្ពានភូមី (Phu My) ទី២។ល។
ក្នុងនោះ គម្រោងផ្លូវក្រវាត់ក្រុងទី៣ តភ្ជាប់តំបន់ក្រុងរណប កាត់បន្ថយសម្ពាធចរាចរណ៍ទីក្រុង។ ផ្លូវល្បឿនលឿនទីក្រុងហូជីមិញ - ឡុងថាញ - យ៉ូវយ៉ី ផ្លូវល្បឿនលឿនទីក្រុងហូជីមិញ - (ម៉ុកបៃ) Moc Bai និងផ្លូវរថភ្លើងល្បឿនលឿនទីក្រុងហូជីមិញ - ញ៉ាត្រាង (Nha Trang) កំពុងត្រូវបានពន្លឿន ដើម្បីកែលម្អការតភ្ជាប់អន្តរតំបន់។ ផ្លូវគមនាគមន៍ដឹកជញ្ជូនទាំងនេះ មិនត្រឹមតែកាត់បន្ថយពេលវេលាធ្វើដំណើរប៉ុណ្ណោះ ថែមទាំងជំរុញការអភិវឌ្ឍសេដ្ឋកិច្ច ទាក់ទាញការវិនិយោគ និងពង្រីកពាណិជ្ជកម្ម រវាងទីក្រុងហូជីមិញ និងខេត្តជិតខាងទៀតផង។
ក៏តាមលោក លឿង មិញភុក (Luong Minh Phuc) នាយកគណៈកម្មការគ្រប់គ្រងនៃគម្រោងវិនិយោគសំណង់គមនាគមន៍ទីក្រុងហូជីមិញ (គណៈចរាចរណ៍) បានឱ្យដឹងថា ឆ្នាំ២០២៥ ត្រូវបានកំណត់ថា ជាឆ្នាំនៃគម្រោងតភ្ជាប់អន្តរតំបន់។ ដូច្នោះ គម្រោងជាបន្តបន្ទាប់នឹងត្រូវបានធ្វើសម្រេច ដាក់ឱ្យដំណើរការ ដូចជាកែលម្អគម្រោងទាំងមូល ពង្រីកផ្លូវជាតិលេខ៥០ ដើម្បីជួយតភ្ជាប់ទីក្រុងហូជីមិញ ជាមួយខេត្តតៀនយ៉ាង (Tien Giang)។ គម្រោងផ្លូវប្រសព្វ អានភូ (An Phu) នឹងបើកលំហូរច្រកទ្វារខាងកើត តភ្ជាប់ផ្លូវល្បឿនលឿនទីក្រុងហូជីមិញ - ឡុងថាញ (Long Thanh) នឹងអាកាសយានដ្ឋានឡុងថាញ (Long Thanh) ។ល។
កម្មករកំពុងធ្វើការបន្ថែមម៉ោង ធ្វើទាំងយប់ទាំងថ្ងៃ ដើម្បីបញ្ចប់ការសាងសង់តាមផែនការ។ រូបថត៖ ឡេលីញ
លើសពីនេះ គម្រោងពង្រីកផ្លូវជាតិលេខ ៥០ ក៏មានតួនាទីសំខាន់ដូចគ្នាដែរ។ ការកែលម្អផ្លូវនេះ នឹងធ្វើឱ្យសមត្ថភាពដឹកជញ្ជូន តភ្ជាប់ រវាងទីក្រុងហូជីមិញ ជាមួយតំបន់ដីសណ្តទន្លេ គឺវឡុង (Cuu Long) បានប្រសើរឡើង។ គម្រោងនេះ នឹងជំរុញការអភិវឌ្ឍសេដ្ឋកិច្ច - សង្គមនៃតំបន់ដីសណ្តទន្លេ គឺវឡុង (Cuu Long) ទាំងមូល ព្រមទាំងរួមចំណែកកាត់បន្ថយការកកស្ទះចរាចរណ៍ផងដែរ។
ផ្លូវល្បឿនលឿនទីក្រុងហូជីមិញ - ម៉ុកបៃ (Moc Bai) នឹងតភ្ជាប់ជាមួយខេត្តតីនិញ (Tay Ninh) ព្រមទាំងបើកទូលាយពាណិជ្ជកម្មជាមួយប្រទេសកម្ពុជាទៀត។ នេះជាគម្រោងដែលមានលក្ខណៈយុទ្ធសាស្ត្រ រួមចំណែកជំរុញការអភិវឌ្ឍសេដ្ឋកិច្ច នៅតាមតំបន់ព្រំដែន និងបង្កើតអ័ក្សគមនាគមន៍អន្តរជាតិដ៏សំខាន់។
ទន្ទឹមនោះ ផ្លូវក្រវាត់ក្រុងលេខ ៤ នឹងបន្ថែមច្រករបៀងគមនាគមន៍ដ៏សំខាន់មួយ តភ្ជាប់នឹងទីក្រុងហូជីមិញ ជាមួយខេត្តជិតខាង ដូចជាខេត្តឡុងអាន (Long An), ខេត្តប៊ិញយឿង (Binh Duong) ខេត្តដុងណាយ (Dong Nai) និង ខេត្តបារៀ - វូងតាវ (Ba Ria - Vung Tau)។ ផ្លូវមួយនេះនឹងកាត់បន្ថយការផ្ទុកយ៉ាងច្រើនសម្រាប់ផ្លូវក្រវាត់ក្រុងទី៣ ជួយសម្រួលចរាចរទំនិញ និងអ្នកដំណើរ មានភាពងាយស្រួល ម្យ៉ាងទៀតនឹងបង្កើនការតភ្ជាប់តំបន់ រវាងទីក្រុងហូជីមិញ និង ភាគខាងកើតនៃភូមិភាគខាងត្បូង (ដុងណាមបូ)។
គម្រោងគមនាគមន៍ដឹកជញ្ជូនសំខាន់ៗទាំងនេះ ត្រូវបានគេរំពឹងថា នឹងនាំមកនូវអត្ថប្រយោជន៍ដ៏ធំធេង មិនត្រឹមតែពង្រឹងការតភ្ជាប់រវាងទីក្រុងហូជីមិញ នឹង តំបន់ជិតខាងប៉ុណ្ណោះ នៅទាំងជំរុញការអភិវឌ្ឍវិស័យឧស្សាហកម្ម ពាណិជ្ជកម្ម សេវាកម្ម និងទេសចរណ៍ផងដែរ។ ទន្ទឹមនឹងនោះ នឹងចូលរួមចំណែកដល់ការលើកកម្ពស់គុណភាពជីវភាពប្រជាជន បង្កើតរូបរាងថ្មីសម្រាប់ហេដ្ឋារចនាសម្ព័ន្ធគមនាគមន៍ក្រុង ព្រមទាំងជំរុញទីក្រុងហូជីមិញអភិវឌ្ឍប្រកបដោយចីរភាព នាពេលអនាគត៕
អត្ថបទ៖ ថុងហាយ រូបថត៖ ង្វៀនឡឹន - ថុងហាយ និង ឯកសារ
ប្រែសម្រួលដោយរីកើង