ពិសេសភាពពិធីពិព័រណ៍ការពារជាតិអន្តរជាតិវៀតណាមឆ្នាំ២០២៤

ដើម្បីបង្កើន និងពង្រីកកិច្ចសហប្រតិបត្តិការអន្តរជាតិ និងការបរទេសការពារជាតិ ព្រមទាំងចែករំលែកនូវគោលនយោបាយ និងគោលការណ៍កសាងកងទ័ព និងអភិវឌ្ឍឧស្សាហកម្មការពារជាតិរវាងវៀតណាម និងប្រទេសដទៃទៀត ក្រសួងការពារប្រទេស វៀតណាមបានរៀបចំពិធីពិព័រណ៍ការពារជាតិអន្តរជាតិវៀតណាម ឆ្នាំ២០២៤ ចាប់ពីថ្ងៃទី១៩ - ២២ ខែធ្នូ ឆ្នាំ២០២៤ នៅអាកាសយានដ្ឋាន​ យ៉ាឡឹម (Gia Lam) (ផ្លូវ ង្វៀន​សើន (Nguyen Son) សង្កាត់ ភូកដុង (Phuc Dong) ស្រុក ឡុងបៀន (Long Bien) រដ្ឋធានី ហាណូយ (Ha Noi)។

ពិធីពិព័រណ៍ការពារជាតិអន្តរជាតិវៀតណាម ឆ្នាំ២០២៤ ប្រព្រឹត្តទៅក្នុងឱកាសរំលឹកខួបអនុស្សាវរីយ៍លើកទី ៨០ ទិវាបង្កើតកងទ័ពប្រជាជនវៀតណាម និងខួបអនុស្សាវរីយ៍លើកទី៣៥ ទិវាបុណ្យការពារជាតិដោយប្រជាជនទាំង​មូល។

ថ្នាក់ដឹកនាំនៃរដ្ឋាភិបាលវៀតណាម និងបណ្តាប្រទេសនានាបានអញ្ជើញចូលរួមពិធីបើកពិព័រណ៍ការពារជាតិអន្តរជាតិវៀតណាមឆ្នាំ២០២៤។

ពិព័រណ៍​ការពារជាតិអន្តរជាតិវៀតណាមឆ្នាំ២០២៤ ត្រូវបានប្រារព្ធឡើងក្នុងឱកាសរំលឹកខួបអនុស្សាវរីយ៍លើកទី៨០ ទិវាបង្កើតកងទ័ពប្រជាជនវៀតណាម និងខួបអនុស្សាវរីយ៍លើកទី៣៥ ពិធីបុណ្យការពារជាតិដោយប្រជាជនទាំងមូល នេះជាសកម្មភាពមួយដ៏សំខាន់ បង្កើត​ចំណុច​សំខាន់​ដែល​មាន​អត្ថន័យ​ និងវិសាលភាពលំដាប់អន្តរជាតិ។

សិល្បៈពោរពេញទៅដោយលក្ខណៈវប្បធម៌វៀតណាម ដើម្បីស្វាគមន៍ពិធីបើកពិព័រណ៍ការពារជាតិអន្តរជាតិ វៀតណាម​ ឆ្នាំ២០២៤។

ពិព័រណ៍ការពារជាតិអន្តរជាតិវៀតណាម ឆ្នាំ២០២៤ ពង្រឹងនិងពង្រីកកិច្ចសហប្រតិបត្តិការអន្តរជាតិ និងការបរទេសការពារជាតិរវាងវៀតណាម និងប្រទេសដទៃទៀត។

ថ្លែងសុន្ទរកថាក្នុងពិធីបើក លោកនាយករដ្ឋមន្ត្រី ផាម​ មិញ​ជីញ  (Pham Minh Chinh) បានឲ្យដឹងថា វៀតណាមជាប្រទេសដែលស្រឡាញ់សន្តិភាព គោរពមិត្តភាព យុត្តិធម៌ក្នុងទំនាក់ទំនងសហប្រតិបត្តិការអន្តរជាតិ។ វៀតណាមអនុវត្តយ៉ាងខ្ជាប់ខ្ជួននូវគោលនយោបាយការបរទេស “ឯករាជ្យ និងខ្លួនទីពឹងខ្លួន; ពិពិធកម្មទំនាក់ទំនង; គឺជាមិត្តល្អ ជាដៃគូទំនុកចិត្តចំពោះប្រទេសទាំងអស់ និងជាសមាជិកសកម្ម និងមានទំនួលខុសត្រូវនៃសហគមន៍អន្តរជាតិ”។ 

វៀតណាមម្ចាស់ការបើកទូលាយកិច្ចការបរទេស និងកិច្ចសហប្រតិបត្តិការលើវិស័យការពារជាតិ ដើម្បីពង្រឹងចំណងមិត្តភាព ការយោគយល់គ្នាទៅវិញទៅមក បង្ហាញភាពស្មោះត្រង់ និងកសាងទំនុកចិត្ត ព្រមទាំងរួមគ្នាដោះស្រាយរាល់បញ្ហាប្រឈមសន្តិសុខនានា សុវត្ថិភាពទូទៅ ទប់ស្កាត់នូវជម្លោះ និង​សង្គ្រាមដែលអាចកើតឡើង ស្របតាមគោលការណ៍ជាមូលដ្ឋានរបស់ច្បាប់អន្តរជាតិ; រួមចំណែកដល់សន្តិភាព រុងរឿង សហប្រតិបត្តិការ និងអភិវឌ្ឍរួមនៃបណ្ដាតំបន់ និងពិភពលោកទាំងមូល។

លោកនាយករដ្ឋមន្ត្រី ផាម​ មិញ​ជីញ  (Pham Minh Chinh) បានសង្កត់ធ្ងន់ថា ពិព័រណ៍ ការពារជាតិអន្តរជាតិវៀតណាមឆ្នាំ២០២៤ មាន​តួនាទី​និង​ការ​រួម​ចំណែក​របស់​វៀតណាម​ក្នុង​កិច្ច​សហប្រតិបត្តិការការពារអន្តរជាតិ ដែលជានិមិត្តសញ្ញានៃទំនុកចិត្ត ការគោរព និងសុច្ឆន្ទៈក្នុងកិច្ចសហប្រតិបត្តិការរវាងប្រទេសនានា ដើម្បីពិភពលោកសន្តិភាព ស្ថិរភាព និងរុងរឿង ហើយជាភស្តុតាងរស់រវើកនៃការគាំទ្រដ៏មានអត្ថន័យ និងសេចក្តីស្រឡាញ់របស់មិត្តអន្តរជាតិចំពោះប្រទេស ប្រជាជន និងកងទ័ពប្រជាជនវៀតណាម - កងទ័ពអង់អាចក្លាហានរបស់ប្រជាជាតិវីរភាព តែងតែបង្ហាញភាពស្មោះត្រង់ ទំនុកចិត្ត និងទំនួលខុសត្រូវចំពោះមិត្តអន្តរជាតិ។

លោកនាយករដ្ឋមន្ត្រី ផាម​ មិញ​ជីញ (Pham Minh Chinh) បានសម្ដែងក្ដីសង្ឃឹមថា ពិព័រណ៍ការពារជាតិអន្តរជាតិវៀតណាម ឆ្នាំ២០២៤ នាំមកនូវឱកាសជាច្រើន ដើម្បីផ្លាស់ប្តូរ ចែករំលែកបទពិសោធន៍ ផ្លាស់ប្តូរវឌ្ឍនភាពវិទ្យាសាស្ត្រ និងបច្ចេកវិទ្យា ផ្លាស់ប្តូរការច្នៃប្រឌិត ការធ្វើបរិវត្តកម្មឌីជីថល ជំរុញការអភិវឌ្ឍវិស័យ​យោធា ពាណិជ្ជកម្ម បើកអនាគតនៃកិច្ចសហប្រតិបត្តិការ ពោរពេញ​ទៅដោយទស្សនវិស័យ និងសមស្រប​នឹងស្មារតី "សន្តិភាព មិត្តភាព សហប្រតិបត្តិការរួមអភិវឌ្ឍ"។

ថ្នាក់ដឹកនាំក្រសួងការពារជាតិវៀតណាមបានជួបជាមួយថ្នាក់ដឹកនាំក្រសួងការពារជាតិនៃប្រទេសមិត្ត បង្ហាញពីទំនាក់ទំនងការបរទេសអន្តរជាតិ និងការពារជាតិ។

ពិព័រណ៍ការពារជាតិអន្តរជាតិវៀតណាម ឆ្នាំ២០២៤ បង្ហាញសព្វាវុធ និងឧបករណ៍ចំនួន ៦៨ ក្នុង​ក្របខ័ណ្ឌរបស់កងទ័ពប្រជាជន​វៀតណាម។ ការតាំងពិព័រណ៌មានការចូលរួមរបស់គណៈប្រតិភូអន្តរជាតិចំនួន ៦៦ ដោយមានសហគ្រាសឧស្សាហកម្មការពារជាតិជាង ២៤០ មកពី ៤៩ ប្រទេស បានបង្ហាញកិត្យានុភាព និងម៉ាកយីហោក្នុងការរៀបចំការតាំងពិពណ៌ការពារជាតិនៅវៀតណាម។

កន្លែងដាក់តាំងផលិតផលរបស់ក្រុមហ៊ុន Viettel វៀតណាម។

ផលិតផលដែលដាក់បង្ហាញក្នុង​ពិព័រណ៌លើកនេះមានដូចជា ប្រព័ន្ធ និងឧបករណ៍ការពារដែនអាកាសរបស់កងទ័ពអាកាស ប្រព័ន្ធបរិក្ខារសន្តិសុខដែលមានផលិតផលចម្រុះជាច្រើន... លើសពីនេះ បណ្តាប្រទេសនានាក៏នាំយកមកនូវគ្រឿងបរិក្ខាររបស់កងទ័ពជើងគោក រួមមាន សព្វាវុធ ឧបករណ៍ទំនាក់ទំនង ប្រព័ន្ធប្រយុទ្ធតាមអ៊ីនធឺណិត ប្រព័ន្ធហ្វឹកហ្វឺន... ការតាំងពិព័រណ៍ក៏ដាក់បង្ហាញបច្ចេកវិជ្ជា​បញ្ចាំងប្រកបដោយភាពច្នៃប្រឌិត ដោយប្រើបច្ចេកវិទ្យា 3D mapping គំរូផែនទីយុទ្ធនាការ ដៀនបៀនភូ (Dien Bien Phu) យុទ្ធនាការ ហូជីមិញ (Ho Chi Minh) បច្ចេកវិទ្យាពិតនិម្មិត (VR) ពិពណ៌នាបណ្តាដំណាក់កាលក្នុងយុទ្ធនាការ ដៀនបៀនភូ (Dien Bien Phu) ជាមួយនឹងការវាយប្រហាររបស់កងទ័ពវៀតណាមនៅវាលស្រែ មឿង​ថាញ (Muong Thanh) យន្តហោះទម្លាក់គ្រាប់បែកនៅអាកាសយានដ្ឋាន តឹន​សើនញ៉ឹត (Tan Son Nhat) គំរូរថក្រោះលេខ ៨៤៣ និង ៣៩០ វាយចូលវិមានឯករាជ្យក្នុងយុទ្ធនាការហូជីមិញ (Ho Chi Minh) ...

សិល្បៈពោរពេញទៅដោយលក្ខណៈវប្បធម៌វៀតណាម ស្វាគមន៍ពិធីបើកអង្គតាំងពិព័រណ៍អន្តរជាតិការពារជាតិ​វៀតណាមឆ្នាំ២០២៤។

ក្នុង​ក្របខ័ណ្ឌ​នៃ​ការ​តាំង​ពិព័រណ៍​នេះ ក៏​បាន​រៀបចំសិក្ខាសាលា​ស្តី​ពី​ប្រធានបទ៖ «សព្វាវុធ​ ​ឧបករណ៍​បច្ចេកវិទ្យា​ខ្ពស់ ឧបករណ៍គ្មានមនុស្សបើក - កម្មវិធីអនុវត្តក្នុងសកម្មភាពយោធាបច្ចុប្បន្ន និងអនាគត” កិច្ចសហប្រតិបត្តិការឧស្សាហកម្មការពារជាតិរវាងវៀតណាម និងប្រទេសដទៃទៀត។ ពិព័រណ៍ការពារអន្តរជាតិវៀតណាមឆ្នាំ២០២៤ ក៏ជាឱកាសសម្រាប់វៀតណាមស្វាគមន៍ និងថ្លែងអំណរគុណចំពោះមិត្តអន្តរជាតិ ដូច្នេះក្នុងក្របខ័ណ្ឌនៃកម្មវិធីក៏មានកន្លែងចែករំលែកវប្បធម៌ សិល្បៈ ម្ហូបអាហារ ណែនាំអំពីប្រទេស និងប្រជាជនវៀតណាមផងដែរ។ /.

អត្ថបទ៖ ង៉ឹន​ហា រូបថត៖ ខាញ់ឡុង

ប្រែសម្រួលដោយង្វៀនយ៉ាង