ពិធីចម្រើនវ័យនៃជនជាតិយ៉ាវឆ្នួតការេ
ពិធីចម្រើនវ័យ នៃជនជាតិយ៉ាវឆ្នួតការេ នៅឃុំហូថូវ (Ho Thau) ស្រុកតាមដឿង (Tam Duong) ខេត្តឡាយចូវ (Lai Chau) តែងបានប្រារព្ភក្នុងបណ្ដាខែចុងឆ្នាំ។ នេះជាពិធីពិសេសសំខាន់នៅក្នុងជីវិតនៃបុរសជនជាតិយ៉ាវម្នាក់ៗ ពីព្រោះពួកគាត់មានទស្សនាទានថា ពេលណាទទួលបានចម្រើនវ័យហើយ បុរសនោះទើបបានចាត់ទុកជាមនុស្សពេញវ័យ អាចចូលរួមរំលែកការងារផ្ទះ សហគមន៍ ពេលស្លាប់ទៅទើបអាចជួបបុព្វការីជនបាន។
កាលពីដើម ពិធីចម្រើនវ័យតែងបានប្រារព្ភឡើងជាច្រើនថ្ងៃតាមការកំណត់របស់តាអាចារ្យ ប៉ុន្តែបច្ចុប្បន្ន ពិធីនេះតែងអូសបន្លាយក្នុងអំឡុងពេលប្រហែល៣ថ្ងៃ។ ក្នុងអំឡុងពេលប្រព្រឹត្តទៅពិធីកិច្ច អ្នកចម្រើនវ័យនឹងបានសិក្សា និងឆ្លងកាត់សកម្មភាពចេតភាព អមដោយអាចារ្យដែលមានបទពិសោធន៍ប្រតិបត្តិ ឬណែនាំអ្នកចម្រើនវ័យធ្វើត្រាប់តាម។ តាមរយៈសកម្មភាពនេះ អាចារ្យនឹងបង្រៀនសិស្ស ប្រតិបត្តិពិធីកិច្ច រៀនរាំ រៀនឧបករណ៍តន្រ្តី។ល។ ពិសេស សិស្សនឹងបានស្តាប់ទ្រឹស្តីអំពីករណីយកិច្ច និងបដិសណ្ឋារកិច្ចចំពោះគ្រួសារ និង សហគមន៍។
ពិធីកិច្ចដ៏សំខាន់បំផុតក្នុងពិធីចម្រើនវ័យរបស់ជនជាតិយ៉ាវឆ្នួតការេ គឺខណៈពេលកូនសិស្សប្រព្រឹត្តកិច្ចការ “ធ្លាក់ពីវេទិកា”។ នៅខណៈពេលសំខាន់មួយនេះ ក្រោមសក្ខីភាពនៃអាចារ្យ និងសហគមន៍ អ្នកចម្រើនវ័យត្រូវវារឡើងលើវេទិកាខ្ពស់ រួចផ្ងាខ្លួន ទំលាក់ខ្លួនចុះជាធម្មតាពីលើចុះក្រោមដោយមាន អាចារ្យពី៦ ដល់៧នាក់កាន់អង្រឹងចាំទ្រពីក្រោម។ នៅលើអង្រឹងមានទ្រាប់ភួយផ្កា អ្នកលោតត្រូវលោតដោយកាយវិការឱបជង្គង់ ដូចពេលនៅក្នុងផ្ទៃម្តាយ។ នៅពេលធ្លាក់ចុះដល់អង្រឹង អាចារ្យនឹងដាក់អ្នកលោតចុះផ្ទាល់ដី រួចឃ្លុំភួយជិតក្បាលជិតជើង។ ម្ចាស់ពិធីកិច្ចជាមនុស្សតែមួយគត់ ដែលមានសិទ្ធិបើកភួយ ទទួលកូនសិស្សចេញមកក្រៅ។ ចំពោះជនជាតិយ៉ាវឆ្នួការេ ពិធីកិច្ចនេះ មិនត្រឹមតែសាកល្បងចិត្តក្លាហាន នៅទាំងបានចាត់ទុកកូនសិស្សដូចជាបានប្រសូតចេញម្តងទៀត ក្រោយពេលប្រព្រឹត្តពិធីកិច្ចទម្លាក់ខ្លួនពីលើវេទិកាចុះរួច ខណៈនោះអ្នកចម្រើនវ័យបានក្លាយខ្លួនជាមនុស្សពេញវ័យជាផ្លូវការ។
ពិធីចម្រើនវ័យជាចំណុចសំខាន់មួយនៃជីវិតមនុស្សម្នាក់ៗ ក៏ជាសកម្មភាពមួយដ៏សំខាន់នៃសហគមន៍ជនជាតិយ៉ាវ។ មិនត្រឹមតែជាឱកាសលើកស្ទួយអ្នកប្រព្រឹត្តពិធីកិច្ច អ្នកចម្រើនវ័យប៉ុណ្ណោះ នៅទាំងជាឱកាសសម្រាប់ប្រជាជន អ្នកភូមិ អ្នកស្រុកផ្សារភ្ជាប់នឹងសហគមន៍។ ប្រការនេះ បានធ្វើឱ្យពិធីប្រពៃណីពិសេសបំផុត ជានិមិត្តរូបនៃសាមគ្គីភាព រុងរឿង នៃសហគមន៍ជនជាតិយ៉ាវឆ្នួតការេនៅឃុំហូវថូវ (Ho Thau)។
អត្ថបទ និង រូបថត៖ វៀតគឿង/កាសែតរូបភាពវៀតណាម
ប្រែសម្រួលដោយរីកើង