នំសណ្តែកខៀវ ហូយអាន (Hoi An)
ជាយូរយារណាស់មកហើយ នំសណ្តែកខៀវ ហូយអាន (Hoi An) គឺជាកាដូមានតម្លៃ ដែលអ្នកណាធ្លាប់មក ហូយអាន (Hoi An) ក៏សុទ្ធតែបានជ្រើសរើសសម្រាប់ជាកាដូជូនសាច់ញាតិ និងមិត្តភក្តិរបស់គេ។ នំនេះមានភាពទាក់ទាញមិនត្រឹមតែសម្រាប់មនុស្សពេញវ័យប៉ុណ្ណោះទេ ប៉ុន្តែនោះក៏ជាអាហារសម្រន់ដែលកុមារជាច្រើនក៏ចូលចិត្តផងដែរ។ ពេលទទួលទាន អ្នកនឹងមានអារម្មណ៍ថា មានភាពស្រួយហាក់ដូចរលាយទៅដោយខ្លួនឯងក្នុងមាត់របស់អ្នក។ ពេលដែលអ្នកខាំដល់ស្នូល វាទន់ៗមានរសជាតិផ្អែម រួមជាមួយសំបកស្រួយ ដែលធ្វើឱ្យអ្នកចង់ហូបមិនចង់ឈប់ឡើយ។
នំសណ្តែកខៀវមានតាំងពីយូរយារណាស់មកហើយ រហូតមកដល់សព្វថ្ងៃនេះ នៅទីក្រុង ហូយអាន (Hoi An) នៅតែមានគ្រួសារជាច្រើនរក្សាមុខរបរធ្វើនំសណ្តែកខៀវជាមួយនឹងរូបមន្តដ៏អាថ៌កំបាំង និងពិសេសៗ របស់គ្រួសារមួយៗ ។ សំបកនំធ្វើពីសណ្តែតខៀវ ដើម្បីឱ្យសំបកឆ្ងាញ់ ទន់ និងម៉ដ្ឋ អ្នកត្រូវជ្រើសរើស សណ្តែកខៀវគ្រាប់តូច មានសាច់ពណ៌លឿង។ បន្ទាប់មក គេលាងសណ្តែកខៀវជាច្រើនដងឱ្យស្អាត រួចបកសំបក និងស្ងោរឱ្យឆ្អិន។ បន្ទាប់ពីសណ្ដែកបានចម្អិន យកសណ្តែតកិន ឬបុកឲ្យម៉ដ្ឋ បង្កើតជាម្សៅសណ្តែកខៀវសុទ្ធ។
នំសណ្តែកខៀវ ហូយអាន (Hoi An ) ត្រូវបានផ្សារភ្ជាប់ជាមួយនឹងកុមារភាពរបស់មនុស្សជាច្រើន ដែលរស់នៅក្នុងតំបន់ផ្លូវបុរាណ។ នំនីមួយៗ គឺជារឿងមួយដែលរំលឹកនឹកដល់អតីតកាល។ ពេលទទួលទាន អ្នកនឹងមានអារម្មណ៍ហាក់ដូចជាយល់ដឹងនូវមនោសញ្ចេតនា និងភាពរួសរាយរាក់ទាក់របស់ប្រជាជននៅទីនេះ ដែលបញ្ចូលក្នុងនំតូចមួយ ចិត្តស្មោះសរផង មនោសញ្ចេតនាផង ថែមទាំងសែនផ្អែមល្ហែមទៀតផង។ នំបានបញ្ចប់ដោយដៃដ៏ប៉ិនប្រសប់របស់ប្រជាជន នៅទីនេះ គឺការតភ្ជាប់នៃអ្វីៗ ដែលជាថ្លៃថ្នូរបំផុត ដែលប្រជាជន ហូយអាន (Hoi An) ផ្ញើជូនភ្ញៀវជាទីស្រលាញ់របស់ពួកគេ ដូចជាក្តីស្រលាញ់ និងការថ្លែងអំណរគុណយ៉ាងស្មោះស្ម័គ្រ ដោយបានមកទីក្រុងបុរាណ ហូយអាន (Hoi An)៕
អត្ថបទ និងរូបថត៖ ហ័ងជឿង