ជំនោររលកនៅពាមបែកជាប្រាំ ង៉ាណាំ (Nga Nam)
ប្រជុំផ្សារនៅលើផ្ទៃទឹក ជាលក្ខណៈវប្បធម៌ពិសេសមួយនៃតំបន់ទឹកទន្លេនៃភូមិភាគតីណាមបូ បច្ចុប្បន្ន ទោះបីរូបភាព “ខាងលើកំពង់ ខាងក្រោមទូក”ធ្លាប់បានឃើញនោះ កំពុងតែសាបរលាបទៅ ដោយនិន្នាការនៃជីវភាពរស់នៅ មិនមានភាពផុសផុលដូចកាលពីមុនទៀតឡើយ ក៏ប៉ុន្តែជីវភាពរស់នៅនៃផ្សារអណ្តែត នៅតែរឹងមាំតាមដំណើរទូកដ ចុះឡើង បម្រើជីវភាពរស់នៅរបស់ប្រជាជននៅបណ្ដោយមាត់ព្រែក ក៏ដូចជាទូកទំនិញពីចម្ងាយ។ ហើយកម្លាំងរស់នៃផ្សារអណ្ដែតង៉ាណាំ (Nga Nam) ខេត្តសុកត្រាំង (Soc Trang) នៅតែកុះករដដែលលើជំនោររលកនៃពាមបែកជាប្រាំង៉ាណាំ (Nga Nam)។
ផ្សារអណ្តែតង៉ាណាំ (Nga Nam) ស្ថិតនៅទីរួមខេត្តង៉ាណាំ (Nga Nam) ខេត្តសុកត្រាំង (Soc Trang) ជាឈ្មោះមួយធ្លាប់ឮ ធ្លាប់ហៅសម្រាប់សម្គាល់ផ្សារអណ្តែត នៅពាមបំបែកជា៥ - ជាកន្លែងប្រសព្វនៃដៃព្រែកទាំង៥។ ដៃព្រែកវិញក្វើយ (Vinh Quoi) ថាញទ្រី (Thanh Tri) (ខេត្តសុកត្រាំង - Soc Trang) ឡុងមី (Long My) ភុងហេប (Phung Hiep) (ខេត្តហូវយ៉ាង - Huu Giang) និង កាម៉ៅ (Ca Mau)។ ផ្សារអណ្តែតង៉ាណាំ (Nga Nam) ជាផ្សារមួយក្នុងចំណោមផ្សារអណ្តែត ដែលមានមកតាំងពីយូរហើយជាផ្សារអណ្ដែតដែលស្ថិតនៅមកដល់បច្ចុប្បន្ននៃភូមិភាគខាងលិច នៃភាគខាងត្បូងវៀតណាម។ ហើយផ្សារនេះ ក៏បានចាត់ទុកជាផ្សារអណ្តែត “ភូមិខាងលិចសុទ្ធសាធ” ជាពិសេសគឺនៅរក្សាបានលក្ខណៈជីវភាពរស់នៅលើផ្ទៃទឹក ដែលមានលក្ខណៈពិសេសតែមួយគត់ នៅតំបន់វាលទំនាបទន្លេ គឺវឡុង (Cuu Long)។
ប្រសិនបើកាលមុននេះ ប្រជុំផ្សារនៅលើផ្ទៃទឹក ជាសកម្មភាពជួញដូរចម្បងនៃទីរួមខេត្តនេះ តែតាំងពីមានប្រព័ន្ធគមនាគមន៍ផ្លូវគោកមូលដ្ឋានរីកចម្រើន ក៏ដូចជាក្រោយពីផលប៉ះពាល់នៃជំងឺកូវិដ - ១៩ អ្នកស្រុកបានបង្វែទៅផ្សារលក់ដុំង៉ាណាំ (Nga Nam) នៅក្បែរមាត់ព្រែក ដើម្បីងាយស្រួលដោះដូរជាង។ សព្វថ្ងៃ សកម្មភាពចម្បងនៃផ្សារអណ្តែតគឺសម្រាប់តែការងារដឹកជញ្ជូនទំនិញកសិផលទៅប្រមូលផ្តុំនៅផ្សារលក់ដុំ ឬទូកដឹកអ្នកស្រុក សិស្សសាលា ពីត្រើយម្ខាងទៅម្ខាង។ ក្រៅពីនោះ ក៏មានរូបភាពទូកអុំលក់ឥវ៉ាន់ ស្បៀងអាហារ គ្រឿងប្រើប្រាស់ចាំបាច់ កាហ្វេ ទឹក អាហារសម្រន់។ល។ សម្រាប់លក់ជូនគ្រួសារដែលរស់នៅក្បែរមាត់ព្រែកដៃទន្លេនោះផងដែរ។ ក្រៅពីនោះ នៅមានទូកសេវាកម្មទេសចរណ៍ ដឹកភ្ញៀវទេសចរទស្សនាស្វែងយល់ផ្សារអណ្តែតង៉ាណាំ (Nga Nam) ទស្សនាជីវភាពរស់នៅរបស់អ្នកស្រុកនៅតំបន់ទឹកទន្លេ ពិសាអាហារលើផ្ទៃទឹក ឬទស្សនាបឹងឈូកធម្មជាតិ នៅចម្ងាយពីនោះប្រហែល១គីឡូម៉ែត្រ។ បងស្រី ធូផឿង (Thu Phuong) អ្នកប្រកបមុខរបរចម្លងទូកដ នៅផ្សារអណ្តែតង៉ាណាំ (Nga Nam) ជាង៣០ឆ្នាំ បាននាំយើងខ្ញុំទៅទស្សនាផ្សារអណ្តែតមួយជុំ គាត់ហាក់ដូចជាអ្នកណែនាំភ្ញៀវទេសចរជំនាញម្នាក់ផង រួសរាយឧទ្ទេសនាមទីកន្លែងទស្សនា ពេលធ្វើដំណើរដោយទូក ជុំវិញផ្សារអណ្តែត មុនពេលជួបបងស្រី យើងខ្ញុំបានស្វែងយល់អំពីព័ត៌មាននៅលើបណ្តាញអ៊ីនធើណែត ក៏ប៉ុន្តែពុំមានអ្វីសោះ។ “កាលពីដើម ឆាប់ប្រជុំផ្សារណាស់ ចង្កៀងគោមបំភ្លឺ សំឡេងកក់ហៅលាន់ឮពេញដងព្រែក ឥឡូវរប៉េះរប៉ោះណាស់ អ្នកស្រុកទៅផ្សារយឺត ប្រហែលម៉ោង៧ - ៨ ទើបមានមនុស្ស។ មកដល់ទីនេះ គួរតែចុះទៅបឹងឈូកគយគន់ ថតរូប និងពិសាម្ហូបអាហារលើទូក ពិសោធន៍ជីវភាពរស់នៅនៃអ្នកស្រុកតំបន់ទឹកទន្លេ ទើបវាគ្រាន់”។ បងស្រីផឿង (Phuong) ស្វាហាប់រៀបរាប់។
អង្គុយក្រេបរសជាតិកាហ្វេ នៅហាងតូចមួយក្បែរផ្សារអណ្តែតង៉ាណាំ (Nga Nam) យើងខ្ញុំមានឱកាសជួបជាមួយលោក ដ័ន វ៉ាន់វឿង (Doan Van Vuong) អាយុ៧៤ឆ្នាំ ជាអ្នកស្រុកមានដើមកំណើតនៅទីនេះ បានរៀបរាប់ប្រាប់ថា៖ ព្រឹកណា គាត់ក៏តែងមកពិសាកាហ្វេនៅទីនេះ អង្គុយមាត់ព្រែក "ស្តាប់” វាយោបក់កួចពីព្រែក គយគន់អ្នកស្រុកទៅផ្សារ ស្រស់ស្រូបពេលព្រឹក អាចកម្ម៉ង់នំបញ្ចុកទឹកសម្ល គុយទីវឆ្អឹង ឬគុយទីវគ្រឿងសមុទ្រ ដែលបងៗគាត់ចែវទូកលក់តាមព្រែក។ អាចនិយាយបានថា មកដល់សព្វថ្ងៃ ទីនេះនៅតែរក្សាបានលក្ខណៈជីវភាពរស់នៅនៃផ្សារអណ្ដែត ជាលក្ខណៈពិសេសមួយ នៃតំបន់វាលទំនាបទន្លេគឺវឡុង។ល។!
បច្ចុប្បន្ន ជីវភាពរស់នៅនៃអ្នកស្រុកទីរួមខេត្តង៉ាណាំ (Nga Nam) មួយថ្ងៃកាន់តែរីកចម្រើនឡើង ប្រព័ន្ធផ្សារកសិផលង៉ាណាំ (Nga Nam) (ទីរួមខេត្តង៉ាណាំ - Nga Nam) ឬផ្សារប្រពៃណីនៅសង្កាត់ទី១ ទីរួមខេត្តង៉ាណាំ ក្បែរផ្សារអណ្តែតង៉ាណាំ (Nga Nam) តែងមានសភាពកុះករ ជំនួសភារកិច្ចដោះដូរទំនិញនៃផ្សារអណ្តែតង៉ាណាំ (Nga Nam) ជាបណ្ដើរៗហើយ។ ក៏ប៉ុន្តែ លក្ខណៈជីវភាពរស់នៅបែបផ្សារអណ្តែត “ខាងលើកំពង់ ខាងក្រោមទូក” នៅតែរក្សាបានតាមវេលាកាល តាមជំនោរទឹករលកបោកបាច់ ពេលទូកឆ្លងកាត់ផ្សារង៉ាណាំ(Nga Nam) ម្តងៗ៕