កោះត្វឹនចូវ (Tuan Chau) - ឋានសួគ៌ទេសចរណ៍នៅឈូងសមុទ្រហាឡុង
កោះត្វឹនចូវ (Tuan Chau) មានទីតាំងចម្ងាយពីទីក្រុងហាឡុងប្រហែល២គីឡូម៉ែត្រមានផ្ទៃដីឡើងដល់៤០០ហិកតា។ ដោយសារមានលក្ខណៈងាយស្រួល ផ្នែកខាងផ្លូវទឹក និងផ្លូវគោក ហេតុនេះការធ្វើដំណើរទៅកាន់កោះនេះមានសភាពងាយស្រួលបង្គួរ។ ទីនេះ ត្រូវបានវាយតម្លៃថាជាអាសយដ្ឋានមួយ ក្នុងចំណោមអាសយដ្ឋានទេសចរណ៍សំខាន់របស់ទីក្រុងសមុទ្រហាឡុង ខេត្តក្វាងនិញ (Quang Ninh)។
ធម្មជាតិអំណោយផលជូនតំបន់ដីរ៉ែ ដោយនូវទេសភាពស្រស់ស្អាត។ ក្នុងចំណោមរម្មណីយដ្ឋានទាំងនេះ មិនអាចណាមិនរំលឹកដល់កោះត្វឹនចូវ (Tuan Chau) ទេ។ ទីនេះបានប្រៀបដូចជាកោះគជ់ ដែលមានឆ្នេរខ្សាច់សអូសបន្លាយ ទឹកសមុទ្រថ្លាឈ្វេង។ កាលពីដើមឡើយ កោះត្វឹនចូវ (Tuan Chau) ជាកោះមួយដាច់ដោយឡែក ប៉ុន្តែបច្ចុប្បន្ន បានកសាងផ្លូវតភ្ជាប់រួចហើយ។
ទោះបីជាសមុទ្រសិប្បនិម្មិត តែកោះត្វឹនចូវ (Tuan Chau) គ្មានពេលណាស្ងាត់ភ្ញៀវទេសចរក្នុង និងក្រៅស្រុកឡើយ។ ឆ្នេរសមុទ្រវែងអន្លាយជាមួយនឹងវាលខ្សាច់ស សមស្របសម្រាប់ភ្ញៀវទេសចរមកកម្សាន្ត ចូលរួមសកម្មភាពនៅឆ្នេរសមុទ្រដ៏ចំណាប់អារម្មណ៍នេះ។ ជាងនេះទៅទៀត ភ្ញៀវទេសចរហាឡុង ក៏មិនអាចឈរស្ងៀមនៅចំពោះមុខទេសភាពដ៏ស្រស់បំព្រង អមតាមដងផ្លូវប្រវែង២គីឡូម៉ែត្រ ដែលតភ្ជាប់កោះជាមួយនឹងដីគោក។
កោះត្វឹនចូវ (Tuan Chau) កំពុងជាអាសយដ្ឋានដ៏ចំណាប់អារម្មណ៍ចំពោះភ្ញៀវទេសចរជាច្រើន ខណៈពេលមកកាន់ទីក្រុងហាឡុង។ ប្រសិនបើធ្វើដំណើរតាមផ្លូវល្បឿនលឿន កោះត្វឹនចូវនៅចម្ងាយពីរដ្ឋធានីហាណូយ១២០គីឡូម៉ែត្រ។ ទីនេះជាឋានសួគ៌សម្រាកលំហែកាយជាមួយនឹង resort លំដាប់ផ្កាយ៥ និងសណ្ឋាគារប្រណីតៗជាច្រើន។ ជាពិសេស នៅទីនេះមានកំពង់ផែទេសចរណ៍ធំបំផុតតំបន់អាស៊ីអាគ្នេយ៍ មណ្ឌលលេងកម្សាន្តធំទូលាយ។ ទីនេះក៏ជាទីកន្លែងដែលនាវាទេសចរណ៍ទាំងឡាយចាកចេញស្វែងយល់អំពីឈូងសមុទ្រហាឡុង។
ជាអាសយដ្ឋានមួយដែលមិនអាចរំលងបាន ខណៈពេលមកដល់កោះត្វឹនចូវ (Tuan Chau) គឺមណ្ឌលកម្សាន្ត។ នៅទីនេះ មានល្បែងសប្បាយៗជាច្រើន អ្នកអាចចូលរួមលេងពេញមួយថ្ងៃ ក៏មិនជិនណាយដែរ។ មណ្ឌលកម្សាន្តក្រោមលំហអាកាសមានផ្ទៃដីឡើងដល់៥ហិកតា សាងសងត្រាប់តាមវត្ថុអច្ឆារិយៈពិភពលោក។ ក្រៅពីនោះ ពេលមកដល់កោះត្វឹនចូវ (Tuan Chau) ភ្ញៀវទេសចរក៏មិនអាចណារំលងចោលឈុតសម្តែងសៀកត្រីផ្សោត តោសមុទ្រ ឆ្កែសមុទ្រដ៏ចំណាប់អារម្មណ៍នេះជាសកម្មភាពដែលទាក់ទាញចំណូលចិត្តភ្ញៀវទេសចរច្រើនជាងគេ ជាពិសេសគឺកុមារៗ។
ជាមួយនឹងអ្នកចូលចិត្តផ្សងព្រេង ក៏អាចសាកល្បងជាមួយនឹងល្បែងកីឡាលើផ្ទៃទឹក។ ជាក់ស្តែងដូចជាជិះក្តារលើទឹករលក ម៉ូតូទឹក ចែវទូក kayak កាណូតឆត្រ។ល។
ចូលជ្រៅខាងក្នុង គឺមណ្ឌលម្ហូបអាហារជាមួយនឹងមុខម្ហូបសម្បូរបែប រួមមានមុខម្ហូបអ៊ឺរ៉ុប និងអាស៊ី ភោជនីយដ្ឋានបានរចនាតាមបែបស្ថាបត្យកម្មរាជវាំង នឹងធ្វើឱ្យអ្នកពេញចិត្តជាមិនខាន។ ជាពិសេសគឺខណៈពេលចូលដល់មជ្ឈមណ្ឌលក្រុង អ្នកនឹងមានចំណូលចិត្តជាមួយនឹងសកម្មភាពកម្សាន្តទំនើប និងពិសេសនៅទីនេះ ។
ពេលវេលាល្អបំផុតសម្រាប់ការទស្សនាកោះត្វឹនចូវ (Tuan Chau) ឈូងសមុទ្រហាឡុង គឺចាប់ពីដើមខែឧសភា រហូតដល់ចុងខែកញ្ញា។ អំឡុងពេលវេលានេះ អាកាសធាតុត្រជាក់ត្រជុំ សមស្របនឹងសកម្មភាពដូចជាគយគន់ទេសភាព ដើរកម្សាន្តតាមឆ្នេរសមុទ្រ។ នេះក៏ជារយៈពេលទេសចរណ៍សំចៃ សម្រាប់ដំណើរទស្សនាកោះត្វឹនចូវ (Tuan Chau) ផងដែរ។
ស្ថិតនៅក្បែរឈូងសមុទ្រហាឡុង កោះត្វឹនចូវ (Tuan Chau) ជាអាសយដ្ឋានចេញដំណើរដំបូងក្នុងមួយថ្ងៃ សម្រាប់ស្វែងយល់ឈូងសមុទ្រហាឡុង ប៉ុន្តែមិនមែនតាមបែបប្រពៃណីធម្មតាទេ គឺជាការគយគន់ទេសភាពកោះកំបោលរាប់ពាន់កោះដ៏ស្រស់ស្អាតនិងសម្បូរបែប តាមដំណើរនាវាទេសចរណ៍។ នាវាទេសចរណ៍រាប់សិបគ្រឿងចូលចត់កំពង់ផែ បំពាក់សម្ភារៈគ្រប់គ្រាន់ដ៏ប្រណីត ត្រៀមជាស្រេចដើម្បីនាំអ្នកចេញទៅលំហសមុទ្រ។ ក្រោកពីដំណេកនៅលើនាវាទេសចរណ៍អណ្តែតរសាត់លើឈូងសមុទ្រ រង់ចាំព្រះអាទិត្យរះអើតចាកផ្ទៃគង្គា ព្រមជាមួយការពិសាគ្រឿងសមុទ្រស្រស់ៗ សុទ្ធតែជាការពិសោធន៍មានតែមួយលើក ក្នុងមួយឆាកជីវិត៕
ពីចំណត់ឡានមីឌិញ (My Dinh) ទៅដល់កោះត្វឹនចូវ (Tuan Chau) ហាឡុង រត់តាមផ្លូវល្បឿនលឿនហាណូយ - ក្វាងនិញ (Quang Ninh) ចំណាយពេលប្រហែល២ម៉ោង ៥នាទី។ មានក្រុមហ៊ុនឡាន limousine ឡាន vip ជាច្រើន ដែលមានតម្លៃពី១៨០ពាន់ដុង រហូតដល់២៥០ពាន់ដុង។ ពីផ្លូវធំធ្វើដំណើរចូលទៅកាន់កោះ មធ្យោបាយធ្វើដំណើរសុវត្ថិភាពបំផុតប្រហែលជាឡានតាក់ស៊ី បង់ថ្លៃប្រហែលរាប់សិបពាន់ដុងតែប៉ុណ្ណោះអ្នកអាចទៅដល់កោះដ៏ស្រស់ស្អាតនៃឈូងសមុទ្រហាឡុងនេះហើយ។
ប្រសិនបើអ្នកចេញដំណើរពីទីក្រុងហូជីមិញ អ្នកអាចធ្វើដំណើរតាមយន្តហោះ ចុះព្រលានយន្តកាត់ប៊ី (Cat Bi) - ហាយភុង (Hai Phong) ឬព្រលានយន្តវ៉ឹនដូន (Van Don) - ក្វាងនិញ (Quang Ninh) បន្ទាប់មកធ្វើដំណើរដោយឡានតាក់ស៊ី ឬឡានក្រុង តាមផ្លូវល្បឿនលឿនហាឡុង - ត្វឹនចូវ (Tuan Chau)។
កាត់ប៊ី (Cat Bi) - ហាឡុង ធ្វើដំណើរតាមផ្លូវល្បឿនលឿនប្រហែល២៥គីឡូម៉ែត្រ ចំណាយពេលប្រហែល៣០នាទី។
វ៉ឹនដូន (Van Don) - ហាឡុង ធ្វើដំណើរតាមផ្លូវល្បឿនលឿន ប្រហែល៥០គីឡូម៉ែត្រ ចំណាយពេលធ្វើដំណើរជាង១ម៉ោង។
អត្ថបទ៖ វីថាវ រូបថត៖ កាសែតរូបភាពវៀតណាម
ប្រែសម្រួល៖ រីកើង