កឹមថាញ់ (Cam Thanh) - ភូមិដែលស្រស់ស្អាតបំផុតក្នុងពិភពលោក របស់វៀតណាម
ស្ថិតនៅចន្លោះកណ្ដាលព្រៃចាក និងព្រែកប្រឡាយ ភូមិ កឹមថាញ់ (Cam Thanh) ចង្វាក់ជីវភាពតំបន់ព្រែកទន្លេ។ ទូកកញ្ឆេរធ្វើដំណើរឆ្លងកាត់ព្រៃចាក បៃមៅ (Bay Mau) អ្នកចែវទូកកំពុងបង់សំណាញ់ នៅក្រោមម្លប់នៃស្លឹកចាក... ទាំងនេះគឺជាការពិពណ៌នាដ៏រ៉ូមែនទិកចរបស់ទស្សនវដ្តី Forbes នៅពេលនិយាយអំពីភូមិអេកូ កឹមថាញ់ (Cam Thanh) របស់ប្រទេសវៀតណាម ដែលជាភូមិមួយក្នុងចំណោមភូមិចំនួន ៥០ ដែលទើបបានបោះឆ្នោតជ្រើសរើសជាភូមិស្អាតបំផុតក្នុងពិភពលោកឆ្នាំ២០២៥។
កាលពីខែកញ្ញា ឆ្នាំ២០២៥ ភូមិ កឹមថាញ់ (Cam Thanh) ត្រូវបានទស្សនាវដ្តី Forbes ដាក់បញ្ចូលក្នុងបញ្ជីភូមិស្រស់ស្អាតបំផុតក្នុងចំណោមភូមិទាំង ៥០ នៅលើពិភពលោក ក្នុងឆ្នាំ២០២៥ ដែលត្រូវបានបោះឆ្នោតជ្រើសរើសដោយក្រុមហ៊ុន Unforgettable Travel គ្រុប ដែលជាក្រុមហ៊ុនទេសចរណ៍ដ៏ល្បីល្បាញ មានការិយាល័យនៅទីក្រុង New York ទីក្រុង London និងប្រទេសជាច្រើនជុំវិញពិភពលោក។ នេះជាលើកទីមួយ ដែលភូមិអេកូទេសចរណ៍មួយនៅវៀតណាម បានលើកតម្កើង ដោយបញ្ជាក់ពីភាពទាក់ទាញពិសេសនៃធម្មជាតិ និងវប្បធម៌នៃតំបន់។
ភូមិ កឹមថាញ់ (Cam Thanh) ស្ថិតក្នុងទីក្រុង ហូយអាន (Hoi An) ខេត្ត ក្វាងណាម (Quang Nam) (បច្ចុប្បន្ននេះគឺសង្កាត់ ហូយអានដុង (Hoi An Dong) ទីក្រុង ដាណាំង (Da Nang)) ចម្ងាយប្រហែល ៣ គីឡូម៉ែត្រ ពីកណ្តាលទីក្រុងបុរាណ ហូយអាន (Hoi An)។ ភូមិ កឹមថាញ់ (Cam Thanh) មានទីតាំងភូមិសាស្រ្តដ៏កម្រ និងប្រព័ន្ធអេកូឡូស៊ី ដែលគ្មានទីកន្លែងណាប្រៀបផ្ទឹមបានឡើយ។ នោះគឺជាទីតាំងប្រសព្វនៃទន្លេធំៗ ចំនួនបីគឺ ធូបូន - ទ្រឿងយ៉ាង - ឡុកាញយ៉ាង (Thu Bon - Truong Giang - Lo Canh Giang) មុនពេលហូរចូលសមុទ្រខាងកើត ដូច្នេះតំបន់នេះបានបង្កើតឡើងនូវប្រព័ន្ធអេកូទឹកដ៏ពិសេសមួយ។
ជាមួយនឹងផ្ទៃដីសរុបជាង ៩០០ហិកតា ក្នុងនោះផ្ទៃទឹក និងប្រឡាយមានជាង ៣០០ ហិកតា ភូមិ កឹមថាញ់ (Cam Thanh) ហាក់ដូចជាគំនូរគូរទេសភាពធម្មជាតិដ៏ស្រស់ស្អាត ជាមួយនឹងព្រៃចាកបៃតងធំល្វឹងល្វើយ ព្រែកប្រឡាយ និងភូមិស្រស់ស្អាតបំព្រង ដែលស្ថិតក្រោមម្លប់ព្រៃចាក។
អ្នកស្រុកនិយាយថា ព្រៃចាកនេះមានអាយុកាលជាង ២០០ ឆ្នាំមកហើយ។ ពូជចាកនៅទីនេះត្រូវបាននាំយកមកដោយជនចំណាកស្រុក មកពីភាគខាងលិចនៃតំបន់ ណាមបូ (Nam Bo)។ ពូជចាកនេះ នៅ ពេលដែលយកមក នៅតំបន់ឆ្នេរនៃភាគកណ្តាល ត្រូវ បានដុះ និងលូតលាស់តាមបែបធម្មជាតិ ហើយបង្កើតទៅជាព្រៃ។ កាលពីដើម ព្រៃចាកមានទំហំត្រឹមតែ ៧ ហិចតា ដូច្នេះហើយ អ្នកស្រុកតែងតែហៅតំបន់នេះថា ព្រៃចាកប្រាំពីរហិចតា (បៃមៅ (Bay Mau)) ប៉ុន្តែ ឥឡូវនេះ ព្រៃចាកបានលូតលាស់ និងមានទំហំជាង ១០០ ហិកតា។
ភ្ញៀវទេសចរណ៍ទទួលអារម្មណ៍ខណៈពេលចែវទូកកញ្ឆេរ។ រូបថត៖ ថាញ់ហ្វ័រ / VNP
ជាច្រើនជំនាន់មកហើយ ព្រៃចាកមិនត្រឹមតែបានការពារ និងផ្តល់ជម្រកដល់ប្រជាជននៃភូមិ កឹមថាញ (Cam Thanh) ពីខ្យល់ព្យុះសមុទ្រប៉ុណ្ណោះទេ ថែមទាំងជាជម្រកនៃជលផលជាច្រើនប្រភេទផងដែរ។
មកដល់ភូមិ កឹមថាញ (Cam Thanh) ភ្ញៀវនឹងរីករាយនៅពេលឆ្លងកាត់បទពិសោធន៍ ដែលមិនអាចបំភ្លេចបាន អំពីជីវិតដ៏សុខសាន្ត និងស្រស់ស្អាតដូចក្នុងកំណាព្យ ដោយការចែវទូកកញ្ឆេរ អណ្តែតលើទឹក ក្រោមម្លប់ដ៏ត្រជាក់នៃព្រៃចាក និងរីករាយកម្សាន្តនូវការស្តាប់អ្នកចែវទូកច្រៀងបទចម្រៀងប្រជាប្រិយដ៏ផ្អែមល្ហែមនៃតំបន់ក្វាង (Quang) មើលអ្នកស្រុកបង់សំណាញ់ ឬស្ទូចត្រី ចាប់ត្រីនិងក្តាម នៅក្រោមដើមចាក ជាពិសេសទស្សនាការសម្តែងចែវទូកកញ្ឆេរ ។ ដោយដៃដ៏ប៉ិនប្រសប់នៃអ្នកចែវទូក ទូកកញ្ឆេរបង្វិលយ៉ាងលឿន ធ្វើឱ្យអ្នកអង្គុយលើទូក ជាប់ល្អិតនឹងគែមទូក ហើយស្រែកសើចដោយរំភើបជាខ្លាំង ហាក់បីដូចជាកំពុងលេងរទេះភ្លើងហោះផ្សងព្រេងនៅទីខ្ពស់។
សព្វថ្ងៃនេះ ភូមិ កឹមថាញ (Cam Thanh) គឺជា គោលដៅទាក់ទាញភ្ញៀវទេសចរ រួមទាំងភ្ញៀវទេសចរបរទេសជាច្រើននាក់ ជាពិសេសនៅរដូវក្តៅ។ ភូមិ កឹមថាញ (Cam Thanh) មិនត្រឹមតែនាំមកជូនភ្ញៀវ នូវពេលវេលាដ៏អស្ចារ្យនៃបទពិសោធន៍ជាមួយទេសភាពធម្មជាតិ ស្រស់បំព្រង ល្បែងប្រជាប្រិយប៉ុណ្ណោះទេ ថែមទាំងមានអាហារគ្រឿងសមុទ្រដ៏ឈ្ងុយឆ្ងាញ់ និងទាក់ទាញ ដែលកែច្នៃដោយអ្នកភូមិ ប្រកបដោយភាពរួសរាយរាក់ទាក់ និងជិតស្និទ្ធនៃភូមិដ៏ស្រស់ស្អាតបំផុតលើពិភពលោក៕
- អនុវត្ត៖ ថាញ់ហ្វ័រ តាតសឺន កុងដាត / VNP ប្រែសម្រួលដោយង្វៀនយ៉ាង