ອາຫານວ່າງຢູ່ ໄຊງ່ອນ (ນະຄອນ ໂຮ່ຈີມິນ) ມີຢູ່ບໍ່ອຶດ, ແຕ່ເຂົ້າໜົມໄກ ຍັງເປັນລາຍການອາຫານ ເປັນທີ່ນິຍົມ ຮັບປະທານ ຂອງ ນັກທ່ອງທ່ຽວ ຢູ່ສະເໝີ  ຍ້ອນລົດ ຊາດເຜັດໆ ແລະ ຫອມກອບ ຂອງມັນ. ເຂົ້າໜົມໄກ ບໍ່ ພຽງແຕ່ເປັນອາຫານວ່າງ ເທົ່ານັ້ນ ແຕ່ຍັງໄດ້ ຮັບເລືອກ ເປັນລາຍການ ອາຫານສຳຮອງ ເມື່ອຄອບຄົວ ຈັດ ງານ ລ້ຽງພີ່ນ້ອງ, ໝູ່ເພື່ອນ ຍ້ອນມີການ ປຸງແຕ່ງງ່າຍ, ກິນແຊບ ທັງເປັນ ອາຫານ ທີ່ມີຄວາມງາມສະດຸດຕາ ເມື່ອປຸງສຳເລັດອີກດ້ວຍ. 

ຢູ່ຫຼາຍມູມຂອງຖະໜົນສາຍຕ່າງໆ ຢູ່ ໄຊງ່ອນ ເຊັ່ນ: ເຈິ່ນກວກຖາວ, ຕະຫຼາດ ບ່າຈ໊ຽວ... ນັກທ່ອງທ່ຽວ ສາມາດພົບເຫັນໄດ້ງ່າຍ ຮູບພາບ ຂອງ ຜູ້ຂາຍ ອາຫານ ມືໜຶ່ງປັ້ນເຂົ້າໜົມ, ອີກມືໜຶ່ງ ຄົນເຂົ້າໜົມໄກ ຢູ່ໝໍ້ນຳ້ມັນທີ່ຟົດ ຊຶ່ງສົ່ງກິ່ນຫອມ ຢ່າງໄວເປັນຈັງຫວະ.

ຮັບປະທານເຂົ້າໜົມໄກ ໝົດສອງຈານໃນຄັ້ງໜຶ່ງ ຂອງ ບັນດານ້ອງນັກຮຽນ ເມື່ອເລີກຮຽນ ກາຍເປັນເລື່ອງທຳ ມະດາ. ຮູບພາບ ນັກຮຽນກິນ ເຂົ້າໜົມ ທັງໂອ້ລົມກັນ ດ້ວຍຄວາມຍິ້ມແຍ້ມແຈ້ມໃສ ຢູ່ຂ້າງຫາບຂາຍ ອາຫານເຄື່ອນທີ່ ກຳລັງສົ່ງກິ່ນ ຫອມກຸ່ນໆ ໄດ້ກາຍເປັນ ອະນຸສອນ ທີ່ບໍ່ອາດຈະລືມ ໄດ້ ໃນຄວາມຊົງຈຳ ຂອງຫຼາຍຄົນ ໃນສະໄໝ ທີ່ເປັນ ນັກຮຽນ ຢູ່ນະຄອນ ໄຊງ່ອນ...


ວັດຖຸດິບຕົ້ນຕໍ ເພື່ອປຸງແຕ່ງເຂົ້າໜົມນີ້ລວມມີ ແປ້ງ ມັນຕົ້ນ ແລະ ແປ້ງເຂົ້າຈ້າວ. ວິທີການທຳ ຄື: ປອກ ເປືອກຫົວມັນ ແລ້ວນຳໄປແຊ່ນຳ້ ລ້າງໃຫ້ສະອາດ ແລະ ຂູດເອົາສ່ວນແປ້ງ. ແປ້ງນີ້ນຳໄປປົນກັບແປ້ງໝີ່, ໝາກເຜັດຜົງ, ໃບຜັກບົ່ວ, ຜັກຊີ ແລ້ວປັ້ນເປັນ ກ້ອນ ນ້ອຍໆ ຮູບມົນ ຫຼື ຮູບຍາວແລ້ວແຕ່ຄວາມມັກ ແລ້ວ ນຳລົງໄປຈືນໃນ ໝໍ້ນຳ້ມັນທ່ີຟົດ ເມື່ອເຫັນມີສີເຫຼືອງ ສະເໝີກັນ ຈຶ່ງຕັກອອກ.

ເຂົ້າໜົມໄກ ໄຊງ່ອນ ເປັນລາຍການອາຫານ ທີ່ໄດ້ຮັບ ຄວາມນິຍົມມັກ ຈາກບັນດານັກທ່ອງທ່ຽວຕ່າງປະເທດ, ພິເສດແມ່ນວົງການໄວໜຸ່ມ ສ ເກົາຫຼີ, ຍີ່ປຸ່ນ... ຜູ້ມັກ ຄົ້ນຄວ້າກ່ຽວກັບ ວັດທະນະທຳ ການກິນດື່ມ ຫວຽດ ນາມ.

ປະຕິບັດ: ຫງວຽນລວນ