ຫໍພິພິທະພັນ ໂຮ່ຈີມິນ - ບ່ອນເກັບຮັກສາເອກະສານ, ວັດຖຸພັນທີ່ມີຄ່າກ່ຽວກັບປະທານໂຮ່ຈີມິນ 

ຫໍພິພິທະພັນແມ່ນຕຶກອາຄານ 3 ຊັ້ນ ແລະ ໄດ້ອອກແບບຕາມຮູບຊົງຂອງດອກບົວຂາວ ເຊິ່ງເປັນສັນຍາລັກຂອງບ້ານແຊນ, ບ້ານເກີດເມືອງນອນຂອງປະທານໂຮ່ຈີມິນ. ເມື່ອກ້າວເຂົ້າທາງໃນຂອງຫໍພິພິທະພັນ, ແຂກທ່ອງທ່ຽວຈະເຫັນຮູບປະທານໂຮ່ຈີມິນທີ່ແສນເຄົາລົບຮັກ ໄດ້ຫຼອມດ້ວຍທອງ, ມີຄວາມສູງ 3,6 ແມັດ ແລະ ມີນ້ຳໜັກເຖິງ 3 ໂຕນ ຕັ້ງຢູ່ໃຈກາງຫໍພິພິທະພັນ ມີພາບພື້ນຫຼັງເປັນຮູບຕົ້ນໂພ ແລະ ຮູບຕາເວັນ ເຊິ່ງເປັນສັນຍະລັກແກ່ແສງສະຫວ່າງ ແລະ ຄວາມຍືນຍົງຄົງຕົວຂອງຊາດ.

ໂດຍໄດ້ຮັບຖືວ່າແມ່ນບ່ອນແຫ່ງສະທ້ອນໃຫ້ເຫັນຂອງປະທານໂຮ່ຈີມິນຄືນໃໝ່ນັ້ນ, ຫໍພິພິທະພັນມີເອກະສານທີ່ລ້ຳຄ່າຫຼາຍຢ່າງ ເຊິ່ງບໍ່ແມ່ນຢູ່ບ່ອນໃດຢູ່ ຫວຽດນາມ ກໍມີ, ນັບແຕ່ເຄື່ອງໃຊ້ສອຍປະຈຳວັນ ຕະຫຼອດຮອດບ່ອນເຮັດວຽກ, ທັງໝົດເຫຼົ່ານັ້ນລ້ວນແຕ່ໄດ້ວາງສະແດງຢ່າງລະອຽດ ແລະ ລຽບງ່າຍ, ຜ່ານນັ້ນ ກໍຊ່ວຍໃຫ້ແຂກທ່ອງທ່ຽວຄຳນຶງໄດ້ເຖິງວິຖີດຳລົງຊີວິດແບບລຽບງ່າຍຂອງປະທານ ໂຮ່ຈີມິນ. ທ່ານນາງ ຫງວຽນທິຮັ່ງ, ຫົວໜ້າຫ້ອງສຶກສາ ຫໍພິພິທະພັນ ໂຮ່ຈີມິນ ໃຫ້ຮູ້ວ່າ:

“ການວາງສະແດງຫໍພິພິທະພັນ ໂຮ່ຈີມິນ ກໍມີຈຸດທີ່ເປັນເອກະລັກສະເພາະຢູ່ແລ້ວ. 8 ພາກວາງສະແດງ ລ້ວນແຕ່ໄດ້ຕິດພັນກັບການດຳລົງຊີວິດ ແລະ ພາລະກິດປະຕິວັດຂອງປະທານ ໂຮ່ຈີມິນ ນັບແຕ່ຊຸມວັນທຳອິດທີ່ເພິ່ນເຄື່ອນໄຫວການປະຕິວັດຕະຫຼອດຮອດວັນເພິ່ນລ່ວງລັບໄປ ແລະ ປັດຈຸບັນນີ້ ປະຊາຊົນ ຫວຽດນາມ ສືບຕໍ່ປະຕິບັດພິໄນກຳຂອງເພິ່ນ. ໃນຕະຫຼອດຂະບວນວິວັດນັ້ນ, ພວກເຮົາຈະພົບເຫັນຫຼາຍເອກະສານ, ວັດຖຸພັນທີ່ຕິດພັນກັບຊີວິດຂອງເພິ່ນຄື: ໂສ້ງເສື້ອ, ເຄື່ອງໃຊ້ສອຍໃນຊີວິດປະຈຳວັນ… ຜ່ານນັ້ນ ພວກເຮົາຈະມີຄວາມເຂົ້າໃຈຢ່າງເລິກເຊິ່ງກ່ຽວກັບປະທານ ໂຮ່ຈີມິນ ຜູ້ທີ່ໄດ້ອຸທິດທັງຊີວິດຂອງຕົນເພື່ອປະຊາຊົນ, ເພື່ອປະເທດຊາດ.”

ແຂກທ່ອງທ່ຽວສາມາດຮັບຊົມເອກະສານ, ວັດຖຸພັນທີ່ກ່ຽວຂ້ອງເຖິງຊີວິດ ແລະ ພາລະກິດຂອງປະທານ ໂຮ່ຈີມິນ ນັບແຕ່ໄວເດັກ, ໄລຍະອອກເດີນທາງໄປຊອກຫາເສັ້ນທາງກູ້ຊາດ, ໄລຍະເຊື່ອມຊຶມລັດທິມາກເລນິນ…

ຫໍພິພິທະພັນ ໂຮ່ຈີມິນ ໄດ້ວາງສະແດງຕາມ 3 ເນື້ອໃນຕົ້ນຕໍຄື: ພາກທຳອິດແມ່ນແນະນຳກ່ຽວກັບຊີວິດ, ພາລະກິດປະຕິວັດຂອງປະທານໂຮ່ຈີມິນ ແລະ ປະຊາຊົນ ຫວຽດນາມ ໃນການປະຕິບັດຄຳພິໄນກຳຂອງເພິ່ນ. ນີ້ແມ່ນເນື້ອໃນຕົ້ນຕໍ ແລະ ກໍແມ່ນລາຍການທ່ຽວຊົມຕົ້ນຕໍຂອງຫໍພິພິທະພັນ. ແຂກທ່ອງທ່ຽວສາມາດຮັບຊົມເອກະສານ, ວັດຖຸພັນທີ່ກ່ຽວຂ້ອງເຖິງຊີວິດ ແລະ ພາລະກິດຂອງປະທານ ໂຮ່ຈີມິນ ນັບແຕ່ໄວເດັກ, ໄລຍະອອກເດີນທາງໄປຊອກຫາເສັ້ນທາງກູ້ຊາດ, ໄລຍະເຊື່ອມຊຶມລັດທິມາກເລນິນ… ທັງໝົດເຫຼົ່ານັ້ນໄດ້ວາງສະແດງຢ່າງມີຊີວິດຊີວາຜ່ານການຈຳລອງຂອງຫໍພິພິທະພັນ ເປັນຕົ້ນແມ່ນ: ການຈຳລອງເຮືອນແບບດອກບົວ; ການຈຳລອງກອງປະຊຸມສ້າງຕັ້ງພັກກອມມູນິດ ຫວຽດນາມ; ການຈຳລອງເຂດປູຊະນີຍະສະຖານ ປັກບໍ - ເຕິນຈ່າວ ເຊິ່ງເປັນບ່ອນທີ່ປະທານ ໂຮ່ຈີມິນ ສ້າງຕັ້ງແນວໂຮມ ຫວຽດມິງ….

ຖັດຈາກນັ້ນແມ່ນພາກວາງສະແດງກ່ຽວກັບປະເທດ ຫວຽດນາມ, ການຕໍ່ສູ້ ແລະ ໄຊຊະນະຂອງປະຊາຊົນ ຫວຽດນາມ ໃນສະໄໝປະທານ ໂຮ່ຈີມິນ. ໃນພາກນີ້, ພວກເຮົາຈະໄດ້ຮັບຊົມຮູບຈຳລອງຂີດໝາຍປະຫວັດສາດຕ່າງໆທີ່ສຳຄັນຄື: ການລຸກຮື້ຂຶ້ນຄັ້ງໃຫຍ່ເດືອນສິງຫາ ແລະ ປະທານ ໂຮ່ຈີມິນ ປະກາດເອກະລາດວັນທີ 2 ກັນຍາ ປີ 1945, ນອກຈາກນັ້ນຍັງມີເອກະສານ, ວັດຖຸພັນທີ່ມີຄຸນຄ່າຄື: ລັດຖະທຳມະນູນສະບັບທຳອິດ ແຫ່ງສາທາລະນະລັດ ປະຊາທິປະໄຕ ຫວຽດນາມ ປີ 1946; ຄຳພິໄນກຳຂອງ ປະທານໂຮ່ຈີມິນ ທີ່ໄດ້ພິມອອກຢູ່ ໄຊງ່ອນ ເມື່ອປີ 1970…

ພາກສຸດທ້າຍ ແມ່ນການວາງສະແດງເອກະສານກ່ຽວກັບເຫດການປະຫວັດສາດໂລກທີ່ສົ່ງຜົນກະທົບຕໍ່ການເຄື່ອນໄຫວປະຕິວັດຂອງປະທານໂຮ່ຈີມິນ ແລະ ການປະຕິວັດ ຫວຽດນາມ….ທ່ານປະລິນຍາເອກ ຫວູແມ້ງຮ່າ, ຜູ້ອຳນວຍການຫໍພິພິທະພັນ ໂຮ່ຈີມິນ ໃຫ້ຮູ້ວ່າ: ຫໍພິພິທະພັນ ໂຮ່ຈີມິນ ແມ່ນ ຫໍພິພິທະພັນທີ່ໄດ້ສະສົມເອກະສານ, ວັດຖຸພັນກ່ຽວກັບປະທານໂຮ່ຈີມິນ ຄົບຖ້ວນທີ່ສຸດໃນທົ່ວປະເທດ. ທ່ານກວ່າວ່າ

“ຫໍພິພິທະພັນ ໂຮ່ຈີມິນ ມີໜ້າທີ່ອະນຸລັກຮັກສາ, ວາງສະແດງເອກະສານ, ວັດຖຸພັນກ່ຽວກັບແນວຄິດ, ຊີວິດ, ພາລະກິດ, ຄຸນສົມບັດປະຕິວັດຂອງປະທານ ໂຮ່ຈີມິນ, ຄົ້ນຄວ້າ, ສຶກສາ ຜ່ານເອກະສານ, ວັດຖຸພັນ ແລະ ປູຊະນີຍະສະຖານທີ່ກ່ຽວຂ້ອງເຖິງປະທານ ໂຮ່ຈີມິນໃນຂອບເຂດທົ່ວປະເທດ. ພິເສດ, ຢູ່ ຫວຽດນາມ ມີລະບົບສາຂາຫໍພິພິທະພັນ ໂຮ່ຈີມິນ ໃນທົ່ວປະເທດ ນັບແຕ່ພາກເໜືອ, ພາກກາງ ແລະ ພາກໃຕ້ ແລະ ຜ່ານຫໍພິພິທະພັນແຫ່ງຕ່າງໆນັ້ນ ເພື່ອຈັດຕັ້ງການເຄື່ອນໄຫວສຶກສາໂຄສະນາກ່ຽວກັບແບບແຜນ, ແນວຄິດ, ຄຸນສົມບັດຂອງປະທານ ໂຮ່ຈີມິນ.”

ຫໍພິພິທະພັນຍັງໄດ້ຮັບຖືວ່າ ແມ່ນ “ສະຖານທີ່ແດງ” ສະໜອງຂໍ້ມູນໃຫ້ນັກຮຽນ, ນັກສຶກສາຊອກຮູ້, ຄົ້ນຄວ້າກ່ຽວກັບປະທານ ໂຮ່ຈີມິນ

ບໍ່ພຽງແຕ່ເປັນສະຖານທີ່ທ່ອງທ່ຽວເທົ່ານັ້ນ, ຫໍພິພິທະພັນຍັງໄດ້ຮັບຖືວ່າ ແມ່ນ “ສະຖານທີ່ແດງ” ສະໜອງຂໍ້ມູນໃຫ້ນັກຮຽນ, ນັກສຶກສາທີ່ມີຄວາມຕ້ອງການຢາກຊອກຮູ້, ຄົ້ນຄວ້າກ່ຽວກັບປະທານ ໂຮ່ຈີມິນ, ເປັນບ່ອນໂຄສະນາເຜີຍແຜ່ ແລະ ສຶກສາກ່ຽວກັບແບບຢ່າງ, ແນວຄິດ, ຄຸນສົມບັດຂອງປະທານໂຮ່ຈີມິນ ໃຫ້ຄົນລຸ້ນຫຼັງອີກດ້ວຍ. ເອື້ອຍຄູ ຢຸງ ຢູ່ໂຮງຮຽນມັດທະຍົມຕອນຕົ້ນ ເລເລີ້ຍ, ເທດສະບານ ເຊີນເຕີຍ, ນະຄອນ ຮ່າໂນ້ຍ ໃຫ້ຮູ້ວ່າ:

“ແຕ່ລະປີ, ທາງໂຮງຮຽນພວກຂ້າພະເຈົ້າ ລ້ວນແຕ່ຈັດຕັ້ງໃຫ້ນ້ອງໆນັກຮຽນໄປທັດສະນະສຶກສາຕົວຈິງຢູ່ ຫໍພິພິທະພັນ ໂຮ່ຈີມິນ ດ້ວຍຈຸດປະສົງ ສ້າງໂອກາດໃຫ້ພວກນ້ອງມີຄວາມເຂົ້າໃຈແຈ້ງກວ່າກ່ຽວກັບຊີວິດ, ແບບແຜນການດຳລົງຊີວິດຂອງປະທານ ໂຮ່ຈີມິນ, ກໍຄືຄວາມຫຍຸ້ງຍາກລຳບາກ, ການອຸທິດສ່ວນອັນສູງສົ່ງ ຂອງປະຊາຊົນເຮົາ ເພື່ອບັນລຸໄດ້ເອກະລາດ, ເສລີພາບຄືໃນວັນນີ້”.

 ຜ່ານການສ້າງສາ ແລະ ພັດທະນາເປັນເວລາ 20 ກວ່າປີ (19 ພຶດສະພາ 1990) ມາຮອດປັດຈຸບັນ, ຈຳນວນແຂກທ່ອງທ່ຽວມາຢ້ຽມຊົມຫໍພິພິທະພັນ ນັບມື້ນັບຫຼາຍ. ພິເສດໃນໂອກາດວັນບຸນ, ວັນພັກການ, ບາງມື້ມີແຂກມາທ່ຽວຊົມເຖິງ 20.000 ເທື່ອຄົນ. ສິ່ງດັ່ງກ່າວໄດ້ສະແດງໃຫ້ເຫັນວ່າ ຫໍພິພິທະພັນ ໂຮ່ຈີມິນ ບໍ່ພຽງແຕ່ແມ່ນກິດຈະກຳສະຖາປັດຕະຍາກຳໃຫຍ່ລະດັບຊາດເທົ່ານັ້ນ, ຫາກຍັງແມ່ນສະຖານທີ່ສະສົມມູນເຊື້ອວັດທະນະທຳນັບພັນປີຂອງປະຊາຊົນ ຫວຽດນາມ ແລະ ຄວາມຮູ້ບຸນຄຸນຢ່າງເລິກເຊິ່ງຂອງທັງຊາດ ຫວຽດນາມ ທີ່ມີຕໍ່ປະທານໂຮ່ຈີມິນ - ການນຳຜູ້ຍິ່ງໃຫຍ່ອີກດ້ວຍ./.

(ແຫຼ່ງຄັດຈາກ VOV)