ມີຄວາມເປັນໄປໄດ້ວ່າຈະບັນລຸເປົ້າໝາຍ 100 ຕື້ USDໃນປີ 2016
ຕອບຄຳສຳພາດຂອງນັກຂ່າວຢູ່ ຮ່າໂນ້ຍ, ທ່ານ ຮູສົວຈີນ, ທີ່ປືກສາຂອງສະຖານທູດ ຈີນ ປະຈຳ ຫວຽດນາມໃຫ້ຮູ້ວ່າ ເຖິງວ່າການຄ້າໂລກສືບຕໍ່ທົດຖອຍລົງ, ແຕ່ການ ພົວພັນທາງດ້ານການຄ້າ ຫວຽດນາມ-ຈີນ ຍັງຂະຫຍາຍຕົວຢ່າງໄວວາ ແລະ ໝັ້ນຄົງ. ຫວຽດນາມ ເປັນຄູ່ຮ່ວມມືການຄ້າໃຫຍ່ທີສອງຂອງ ຈີນ ຢູ່ໃນກຸ່ມອາຊຽນ ຫຼັງ ມາເລເຊຍ,ໃນເວລານີ້ ຈີນ ເປັນຕະຫຼາດນຳເຂົ້າໃຫຍ່ທີ່ສຸດ ແລະ ເປັນຕະຫຼາດສົ່ງອອກໃຫຍ່ອັນດັບທີ 4 ຂອງ ຫວຽດນາມ.
ຕາມຕົວເລກສະຖິຕິຂອງຝ່າຍ ຈີນ, ປີ 2015, ຍອດມູນຄ່າ ການນຳເຂົ້າ-ສົ່ງອອກຂອງ ຫວຽດນາມ ແລະ ຈີນ ບັນລຸໄດ້ 95,8 ຕື້ USD, ເພີ່ມຂຶ້ນ 14,6% ທຽບໃສ່ປີ 2014, ໃນນັ້ນມູນການຄ່າສົ່ງອອກຂອງ ຈີນເຂົ້າ ຫວຽດນາມ ບັນລຸໄດ້ 66,1 ຕື້ USD, ເພີ່ມຂຶ້ນ 3,8% ທຽບໃສ່ປີ 2014, ມູນຄ່ານຳເຂົ້າຂອງ ຈີນ ຈາກຫວຽດນາມ ບັນລຸໄດ້ 29,7 ຕື້ USD, ເພີ່ມຂຶ້ນ 49,1%. ປະຈຸບັນ, ມູນຄ່າການຄ້າ ຫວຽດນາມ-ຈີນ ກວມ 2,4% ໃນຍອດມູນຄ່າການນຳເຂົ້າ-ສົ່ງອອກຂອງ ຈີນ. ສະເພາະໃນເດືອນ ມັງກອນ 2016, ມູນຄ່າການຄ້າ ຫວຽດນາມ-ຈີນ ບັນລຸໄດ້7,8 ຕື້ USD, ໃນເວລາດຽວກັນມູນຄ່າແລກປ່ຽນການຄ້າສອງຝ່າຍລະຫວ່າງ ຈີນ ແລະ ມາເລເຊຍ ບັນລຸພຽງແຕ່ 6,5 ຕື້ USD ເທົ່ານັ້ນ.
ຈາກໝາກຜົນດັ່ງກ່າວ, ທ່ານ ຮູສົວຈີນ ຄາດຄະເນວ່າ ສອງປະເທດສາມາດບັນລຸເປົ້າໝາຍຍົກມູນຄ່າການຄ້າສອງຝ່າຍ ຂຶ້ນເປັນ 100 ຕື້ USD ໃນປີ 2016, ບັນລຸໄດ້ກ່ອນໜຶ່ງປີທຽບໃສ່ກຳນົດເວລາທີ່ການນຳສອງປະເທດວາງອອກ.
ທ່ານໄດ້ຢັ້ງຢືນວ່າ: “ແນ່ນອນ ຫວຽດນາມ ຈະກາຍເປັນຄູ່ຮ່ວມມືການຄ້າໃຫຍ່ທີ່ສຸດຂອງ ຈີນໃນກຸ່ມ ອາຊຽນ ໃນປີ 2016”.
ວິພາກກ່ຽວກັບບັນຫາຄວາມຂາດດຸນການຄ້າລະຫວ່າງສອງປະເທດ, ທ່ານ ຮູສົວຈີນ ເວົ້າວ່າ: “ສະພາບຂາດການ ດຸນດຽງການພົວພັນດ້ານການຄ້າ ຫວຽດນາມ-ຈີນ ກຳລັງໄດ້ແກ້ໃຫ້ດີຂຶ້ນ”.
ຕາມການສະຖິຕິຂອງ ຝ່າຍ ຈີນ, ປີ 2015, ມູນຄ່າການຄ້າຫວຽດນາມ-ຈີນ ເພີ່ມຂຶ້ນ 14,6%, ໃນນັ້ນ, ມູນຄ່າການສົ່ງອອກຂອງ ຈີນເຂົ້າຫວຽດນາມ ເພີ່ມຂຶ້ນ 3,8%, ມູນຄ່າການ ສົ່ງອອກຂອງ ຫວຽດນາມ ໄປ ຈີນ ເພີ່ມຂຶ້ນ 49,1%. ໃນປີ 2015, ຫວຽດນາມຂາດດຸນການຄ້າກັບຈີນໄດ້ຫລຸດລົງ 7,4ຕື້ USD ທຽບໃສ່ປີ 2014. ແຕ່ເຖິງຢ່າງໃດກໍ່ດີ, ທ່ານ ຮູສົວຈີນຍອມຮັບວ່າ ສະພາບ ການຂາດດຸນການຄ້າ ຫວຽດນາມ-ຈີນ ບໍ່ສາມາດແກ້ໄຂໄດ້ ໃນເວລາສັ້ນ.
ຕາມທ່ານ ຮູສົວຈີນ ແລ້ວ, ເພື່ອເຮັດໃຫ້ການພົວພັນ ທາງດ້ານການຄ້າ ຫວຽດນາມ-ຈີນ ພັດທະນາຍືນຍົງ ກວ່າເກົ່າ, ສອງປະເທດໄດ້ນຳໃຊ້ຫຼາຍມາດຕາການເພື່ອເຮັດໃຫ້ຄວາມດຸນດຽງທາງດ້ານການຄ້າໄດ້ກັບຄືນດີຂຶ້ນ. ຫວຽດນາມ ໄດ້ເພີ່ມທະວີຄວາມອາດສາມາດໃນການສົ່ງອອກ ແລະ ສົ່ງອອກຜະລິດ ຕະພັນເອເລັກໂຕນິກ, ເຄື່ອງຈັກ ແລະ ບັນດາຜະລິດຕະພັນສ້າງມູນຄ່າເພີ່ມອອກໄປ ຈີນ, ໃນເວລາດຽວກັນຈີນ ກໍ່ເພີ່ມທະວີການນຳເຂົ້າຈາກ ຫວຽດນາມ.
ພົວພັນເຖິງບັນຫາການຄ້າເຂດຊາຍແດນ, ການນຳ ຈີນໃຫ້ທັດສະນະວ່າ ການຄ້າຊາຍແດນເປັນ “ພາກສ່ວນໜຶ່ງ ທີ່ສຳຄັນ” ໃນການພົວພັນການຄ້າ ຫວຽດນາມ-ຈີນ. ຍ້ອນບັນຫາການຄ້າຊາຍແດນພົວພັນເຖິງຊີວິດການເປັນຢູ່ຂອງປະຊາຊົນເຂດຊາຍແດນສອງປະເທດ, ສະນັ້ນລັດຖະບານສອງປະເທດໄດ້ຖືເປັນບັນຫາສຳຄັນ.
ທ່ານ ຮູສົວຈີນ ຍັງໃຫ້ຮູ້ຕື່ມອີກວ່າ ຫວຽດນາມ-ຈີນ ກຳລັງປະຕິບັດການເຈລະຈາກ່ຽວກັບສັນຍາການຄ້າຊາຍແດນສອງຝ່າຍເພື່ອສາມາດລົງນາມສັນຍາການຄ້າຊາຍແດນສະບັບ
ໃໝ່ໃນປີນີ້. ກ່ຽວກັບສະພາບການລົງທຶນຂອງ ຫວຽດນາມ, ທ່ານ ຮູສົວຈີນ ໃຫ້ຮູ້ວ່າ ປີ 1988 ຫວຽດນາມ ໄດ້ປະກາດກົດໝາຍລົງທຶນຕ່າງປະເທດ. ເວລານັ້ນ, ກົດໝາຍສະບັບນີ້ ເປັນກົດໝາຍ ເປີດປະຕູລົງທຶນທີ່ເປີດເຜີຍທີ່ສຸດໃນພາກພື້ນອາຊີຕາເວັນອອກສ່ຽງໃຕ້. ຫຼັງຈາກນັ້ນ, ຫວຽດນາມ ໄດ້ມີການປັບປຸງ, ປ່ຽນແປງ ແລະ ເຮັດໃຫ້ກົດໝາຍລົງທຶນຕ່າງປະເທດດີຂຶ້ນ.
ທ່ານ ຮູສົວຈີນ ໃຫ້ຮູ້ວ່າ: “ພວກຂ້າພະຈົ້າ ຄິດວ່າ ກົດໝາຍລົງທຶນຕ່າງປະເທດຂອງ ຫວຽດນາມ ແມ່ນ ເພື່ອຈຸດປະສົງສ້າງສະພາບແວດລ້ອມຂອງຄວາມສະເໝີພາບ, ຍຸຕິທຳ ແລະ ໂປ່ງໃສຕໍ່ບັນດາວິສາຫະກິດລົງທຶນຕ່າງປະເທດ. ແລະ ກົດໝາຍລົງທຶນຂອງ ຫວຽດນາມຂ້ອນຂ້າງ ມີຄວາມຄ່ອງຕົວ”.
ປະຈຸບັນ, ຈີນ ຢືນອັນດັບທີ່ 9 ໃນຈຳນວນປະເທດ, ເຂດພາກພື້ນຕ່າງໆ ທີ່ມີມູນຄ່າລົງທຶນຈາກຕ່າງປະເທດ (FDI) ເຂົ້າຫວຽດນາມ.