ຂ່າວສານ
ຫວຽດນາມ - ອຽກລັງ ເພີ່ມທະວີການຮ່ວມມືສອງຝ່າຍ ແລະ ສົມທົບກັນໃນບັນດາເວທີປາໄສຫຼາຍຝ່າຍ
ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດຫວຽດນາມ ຟ້າມບິ່ງມິນ ໂອ້ລົມຜ່ານທາງໂທລະສັບກັບທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ ອຽກລັງ Simon Coveney (ພາບປະກອບ: dangcongsan.vn)
ນະທີ່ນີ້, ທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດຫວຽດນາມ ຟ້າມບິ່ງມິນ ຢັ້ງຢືນວ່າ ຫວຽດນາມ ແມ່ນຄູ່ຮ່ວມມືມີຄວາມຮັບຜິດຊອບຂອງປະຊາຄົມສາກົນ, ຍາມໃດກໍສົມທົບກັບບັນດາຄູ່ຮ່ວມມືຢ່າງແໜ້ນແຟ້ນ ໃນນັ້ນ ມີອຽກລັງ ຢູ່ບັນດາເວທີປາໄສຫຼາຍຝ່າຍ ເພື່ອປະກອບສ່ວນຫຼາຍກວ່າອີກເຂົ້າໃນການຮັກສາສັນຕິພາບ, ສະຖຽນລະພາບ ແລະ ເຄົາລົບກົດໝາຍສາກົນ ກໍຄືໃນການຮັບມືກັບບັນດາບັນຫາທົ່ວໂລກ. ທ່ານກໍສະເໜີວ່າ ອຽກລັງ ແລະ ຫວຽດນາມ ຈະສົມທົບກັນເສີມຂະຫຍາຍ ແລະ ຍາດແຍ່ງເອົາກາລະໂອກາດ ໂດຍ ສັນຍາການຄ້າເສລີ ລະຫວ່າງຫວຽດນາມ ແລະ ອີຢູ (EVFTA), ສັນຍາອາລັກຂາການລົງທຶນ (EVIPA) ນໍາມາໃຫ້, ໜູນຊ່ວຍພື້ນຖານເສດຖະກິດຂອງສອງປະເທດຜ່ານຜ່າບັນດາສິ່ງທ້າທາຍໃນປັດຈຸບັນ. ສ່ວນທ່ານຮອງນາຍົກລັດຖະມົນຕີ, ລັດຖະມົນຕີການຕ່າງປະເທດ ອຽກລັງ Simon Coveney ສະເໜີວ່າ ສອງປະເທດສືບຕໍ່ເພີ່ມທະວີການສົມທົບໃນການຮ່ວມມືລະຫວ່າງຫວຽດນາມ - ອີຢູ, ອາຊຽນ - ອີຢູ ກໍຄືຢູ່ບັນດາເວທີປາໄສສາກົນ ໂດຍສະເພາະແມ່ນ ສປຊ ໃນບັນດາບັນຫາ ເຊິ່ງຕ່າງຝ່າຍຕ່າງມີຄວາມສົນໃຈ. ສອງຝ່າຍກໍເຫັນດີຈະສົມທົບກັນຜັນຂະຫຍາຍບັນດາການເຄື່ອນໄຫວສະເຫຼີມສະຫຼອງ ວັນສ້າງຕັ້ງສາຍພົວພັນຫວຽດນາມ - ອຽກລັງ ຄົບຮອບ 25 ປີ (1996 – 2021), ເພີ່ມທະວີການຮ່ວມມືໃນຫຼາຍດ້ານ, ພິເສດແມ່ນການຮ່ວມມືດ້ານເສດຖະກິດ, ການຄ້າ, ຮ່ວມມືພັດທະນາ, ສ້າງກໍາລັງໜູນໃໝ່ໃຫ້ແກ່ສາຍພົວພັນສອງຝ່າຍ.
(ແຫຼ່ງຄັດຈາກ VOV)
