ເມື່ອບຸນປີໃໝ່ປະຈໍາຊາດ ຫຼື ບຸນເຕັດ ແລະລະດູບານໃໝ່ວຽນມາ, ຊາວຫວຽດນາມ ອາໄສຢູ່ທຸກແຖບຖິ່ນໃນທົ່ວໂລກ ກໍໄດ້ກັບເມືອບ້ານເກີດເມືອງນອນຂອງຕົນ ເພື່ອຕ້ອນຮັບບຸນປີໃໝ່ປະຈໍາຊາດ, ທຸກຄົນໄດ້ເຕົ້າໂຮມກັນ, ພ້ອມກັນເຈືອຈານເຂົ້າກັບບັນຍາກາດຂອງລະດູບານໃໝ່ຢ່າງອົບອຸ່ນ, ມ່ວນຊືນ ຕາມຮີບຄອງປະເພນີຂອງຊາດຫວຽດນາມ ແລະ ພິເສດ ແມ່ນກັບເມືອປະເທດເຂົ້າຮ່ວມລາຍການ “ຕ້ອນຮັບລະດູບານໃໝ່ຢູ່ບ້ານເກີດເມືອງນອນ” ໂດຍຄະນະກໍາມະການແຫ່ງລັດ ກ່ຽວກັບຊາວຫວຽດນາມ ອາໄສຢູ່ຕ່າງປະເທດ, ສັງກັດກະຊວງການຕ່າງປະເທດຫວຽດນາມ ສົມທົບກັບບັນດາອົງການທີ່ກ່ຽວຂ້ອງຈັດຕັ້ງຂຶ້ນ. ລາຍການດັ່ງກ່າວ ໄດ້ກາຍເປັນເຫດການໃຫຍ່ ແລະ ເປັນທີ່ຄອງຄອຍຂອງປະຊາຄົມຊາວຫວຽດນາມ ອາໄສຢູ່ຕ່າງປະເທດ ເນື່ອງໃນໂອກາດນີ້, ອັນໄດ້ປະກອບສ່ວນປຸກລຸກ ແລະ ແຜ່ຂະຫຍາຍນໍ້າໃຈຂອງຊາດຫວຽດນາມຂອງຊາວຫວຽດນາມທຸກຄົນ ທີ່ຢູ່ຫ່າງໄກຈາກບ້ານເກີດເມືອງນອນ.
ລາຍການຕ້ອນຮັບລະດູບານໃໝ່ຢູ່ບ້ານເກີດເມືອງນອນ ແມ່ນລາຍການທີີ່ມີຄວາມໝາຍສໍາລັບພໍ່ແມ່ພີ່ນ້ອງຊາວຫວຽດນາມ ທີ່ຢູ່ຫ່າງໄກຈາກບ້ານເກີດເມືອງນອນ, ຈາກປະເທດຊາດ, ບໍ່ພຽງແຕ່ແມ່ນຂອງຂວັນສໍາລັບຊາວຫວຽດນາມ ອາໄສຢູ່ຕ່າງປະເທດໃນຍາມທ້າຍປີເທົ່ານັ້ນ ຫາກຍັງຕອບສະໜອງໄດ້ຕາມຄວາມໃນໃຈ, ຄວາມມຸ່ງມາດປາດຖະໜາ ໄດ້ກັບເມືອບ້ານເກີດເມືອງນອນ ໃນຈຸດເວລາສົ່ງທ້າຍປີເກົ່າຕ້ອນຮັບປີໃໝ່ ຂອງເຂົາເຈົ້າອີກດ້ວຍ. ປີ 2020 ແມ່ນປີທີ 12 ເຊິ່ງລາຍການດັ່ງກ່າວໄດ້ຈັດຂຶ້ນ.ສ້າງຄວາມຜູກພັນໃນໝູ່ປະຊາຄົມຊາວຫວຽດນາມ
ລາຍການຕ້ອນຮັບລະດູບານໃໝ່ຢູ່ບ້ານເກີດເມືອງນອນປີ 2020 ໄດ້ມີການເຂົ້າຮ່ວມຂອງພໍ່ແມ່ພີ່ນ້ອງຊາວຫວຽດນາມ ອາໄສຢູ່ຕ່າງປະເທດ 1.500 ຄົນ ເຊິ່ງກັບມາຈາກເກືອບ 30 ປະເທດ ແລະ ເຂດແຄວ້ນ ເພື່ອຕ້ອນຮັບບຸນປີໃໝ່ປະຈໍາຊາດປີ ຊວດ 2020, ເຊິ່ງເປັນປີມີຈໍານວນຜູ້ເຂົ້າຮ່ວມຫຼາຍທີີ່ສຸດນັບແຕ່ກ່ອນມາຮອດປັດຈຸບັນ. ທ່ານເອກອັກຄະລັດຖະທູດ ເລືອງແທັງງິ, ຮອງຫົວໜ້າຄະນະກໍາມະການແຫ່ງລັດ ກ່ຽວກັບຊາວຫວຽດນາມ ອາໄສຢູ່ຕ່າງປະເທດ, ຢັ້ງຢືນວ່າ:
“ລາຍການຕ້ອນຮັບລະດູບານໃໝ່ຢູ່ບ້ານເກີດເມືອງນອນ ແມ່ນລາຍການທີ່ມີີຄວາມໝາຍສໍາລັບພໍ່ແມ່ພີ່ນ້ອງຊາວຫວຽດນາມ ທີ່ຢູ່ຫ່າງໄກຈາກບ້ານເກີດເມືອງນອນ, ຈາກປະເທດຊາດ. ກ່ອນອື່ນໝົດ ແມ່ນໄດ້ສະແດງໃຫ້ເຫັນເຖິງຄວາມເອົາໃຈໃສ່ຂອງພັກ ແລະ ລັດ ຫວຽດນາມ ທີ່ມີຕໍ່ປະຊາຄົມຊາວຫວຽດນາມ ອາໄສຢູ່ຕ່າງປະເທດ ບົນເນື້ອໃນຈິດໃຈ ທີ່ວ່າ: ຊາວຫວຽດນາມ ອາໄສຢູ່ຕ່າງປະເທດແມ່ນປະຊາຄົມທີ່ບໍ່ອາດຕັດແຍກອອກຈາກຊາດຫວຽດນາມໄດ້ ແລະ ທັງແມ່ນແຫຼ່ງກໍາລັງນໍາອີກ. ທີສອງ ແມ່ນໂອກາດເພື່ອໃຫ້ພໍ່ແມ່ພີ່ນ້ອງ ກັບເມືອປະເທດຕ້ອນຮັບບຸນເຕັດ, ໄດ້ເຕົ້າໂຮມພ້ອມກັບຄອບຄົວ. ທີສາມ ແມ່ນໂອກາດເພື່ອໃຫ້ເຂົາເຈົ້າໄດ້ພົບປະແລກປ່ຽນ ສ້າງສາຍສໍາພັນເຊື່ອມຕໍ່່ສະໜິດຕິດພັນ ລະຫວ່າງພໍ່ແມ່ພີ່ນ້ອງຊາວຫວຽດນາມທີ່ອາໄສຢູ່ບັນດາປະເທດໃນໂລກ. ສິ່ງພິເສດ ແມ່ນ ເຂົາເຈົ້າໄດ້ມີໂອກາດພົບປະກັບການນໍາພັກ, ລັດ, ທ້ອງຖິ່ນ ເພື່ອສະເໜີຄວາມໃນໃຈ, ຄວາມມຸ່ງມາດປາດຖະໜາຂອງຕົນ ແລະ ຊອກຮູ້ບັນດາກາລະໂອກາດລົງທຶນດໍາເນີນທຸລະກິດພາຍໃນປະເທດ”.
ລາຍການຕ້ອນຮັບລະດູບານໃໝ່ຢູ່ບ້ານເກີດເມືອງນອນ ກໍແມ່ນໂອກາດເພື່ອໃຫ້ຊາວຫວຽດນາມ ອາໄສຢູ່ບັນດາປະເທດຕ່າງໆໃນທົ່ວໂລກ ໄດ້ພົບປະກັນ, ເຫັນປະຈັກຕາການປ່ຽນແປງ, ການພັດທະນາຂອງປະເທດຊາດ. ທ່ານ ເຈິ່ນຫາຍລິງ, ຊາວຫວຽດນາມ ອາໄສຢູ່ສ. ເກົາຫຼີ, ແບ່ງປັນວ່າ:
“ລາຍການຕ້ອນຮັບລະດູບານໃໝ່ຢູ່ບ້ານເກີດເມືອງນອນ ແມ່ນໂອກາດເພື່ອໃຫ້ພໍ່ແມ່ນພີ່ນ້ອງຊາວຫວຽດນາມຢູ່ທຸກແຖບຖິ່ນໃນທົ່ວໂລກໄດ້ກັບເມືອປະເທດ, ເຕົ້າໂຮມກັບຄອບຄົວ. ອາດເວົ້າໄດ້ວ່າ ນີ້ແມ່ນລາຍການທີ່ບໍ່ອາດຂາດໄດ້ສໍາລັບພໍ່ແມ່ພີ່ນ້ອງຊາວຫວຽດນາມ ອາໄສຢູ່ຕ່າງປະເທດໃນແຕ່ລະປີ. ແຕ່ລະເທື່ອກັບເມືອປະເທດ, ຂ້າພະເຈົ້າລ້ວນແຕ່ຮູ້ສຶກໄດ້ຢ່າງຊັດເຈນເຖິງການພັດທະນາຂອງປະເທດຊາດ, ເຊິ່ງໄດ້ເຮັດໃຫ້ພວກຂ້າພະເຈົ້າມີຄວາມປະຕິຊົມຊື່ນ ກໍຄືພາກພູມໃຈເມື່ອໄດ້ກັບເມືອບ້ານເກີດເມືອງນອນ. ຂ້າພະເຈົ້າເຊື່ອໝັ້ນວ່າ ຖ້າຫາກພວກເຮົານໍາໃຊ້ກໍາລັງເຫື່ອແຮງ ແລະແຫຼ່ງກໍາລັງຂອງພໍ່ແມ່ພີ່ນ້ອງຊາວຫວຽດນາມ ທີ່ອາໄສຢູ່ຕ່າງປະເທດໄດ້ຢ່າງແຮງກວ່ານີ້ອີກ ແມ່ນເຂົາເຈົ້າຈະເປັນຂົວຕໍ່ຊ່ວຍຫວຽດນາມ ພັດທະນາຢ່າງແຂງແຮງ ແລະ ເຊື່ອມໂຍງຢ່າງກວ້າງໄກກວ່າໃນໄລຍະຈະມາເຖິງ”.
ນັບແຕ່ຫຼາຍປີມານີ້, ເຖິງວ່າຈະດໍາລົງຊີວິດຢູ່ແຫ່ງຫົນໃດໃນໂລກກໍຕາມ, ແຕ່ສໍາລັບເລື່ອງ ຮ່ວມສາຍເລືອດອັນດຽວກັນ ແລະ ຄວາມສະໜິດຕິດພັນກັບບ້ານເກີດເມືອງນອນນັ້ນ, ຊາວຫວຽດນາມ ອາໄສຢູ່ຕ່າງປະເທດ ໄດ້ປະກອບສ່ວນປັບປຸງ ແລະ ພັດທະນາກຸ່ມກ້ອນມະຫາສາມັກຄີີຂອງຊາດ, ແມ່ນປັດໄຈທີ່ບໍ່ອາດຂາດໄດ້ໃນວິວັດການພັດທະນາຂອງຫວຽດນາມ.
ທ່ານນາຍົກລັດຖະມົນຕີ ຫງວຽນຊວັນຟຸກ ຖ່າຍຮູບນຳພໍ່ແມ່ພີ່ນ້ອງຊາວ ຫວຽດນາມ ອາໄສຢູ່ຕ່າງປະເທດ
(ພາບ: TTXVN)
ປຸກລຸກ ແລະ ແຜ່ຂະຫຍາຍຈິດໃຈ ຫວຽດນາມ
ໃນການເດີນທາງກັບເມືອບ້ານເກີດເມືອງນອນ ປີນີ້, ຊາວ ຫວຽດນາມອາໄສຢູ່ຕ່າງປະເທດ ຢູ່ທຸກໆແຫ່ງໃນໂລກ ໄດ້ດຳລົງຊີວິດໃນທ່າມກາງບັນຍາກາດ ບຸນເຕັດອົບອຸ່ນ, ໄດ້ເຂົ້າຮ່ວມບັນດາການເຄື່ອນໄຫວຄື ການຂໍຕົວໜັງສືຫວຽດເດີມ , ຂັບລຳເຈົ່າວັນ, ການລະຫຼີ້ນພື້ນເມືອງໃນໂອກາດບຸນເຕັດ… ແລະ ພິເສດແມ່ນ ໄດ້ຊິມບັນດາເຍື່ອງອາຫານພິເສດໃນວັນບຸນ. ບັນດການເຄື່ອນໄຫວນີ້ໄດ້ປະກອບສ່ວນປຸກລຸກແຫຼ່ງອາລົມຈິດສຳລັບຊາວ ຫວຽດນາມ, ເຖິງແມ່ນວ່າ ຢູ່ຫ່າງໄກກັບປະເທດຊາດ ແຕ່ໃນຈິດໃຈຍັງຄົງຮັກສາໄດ້ມູນເຊື້ອຂອງຊາດໄວ້ໄດ້. ລຸງ ຫງວຽນດຶກທຽນ, ຊາວຫວຽດນາມ ອາໄສຢູ່ ອີຕາລີ ແບ່ງປັນວ່າ:ຈາກ ອີຕາລີ ກັບມາທີ່ນີ້, ຂ້າພະເຈົ້າມີຄວາມຮູ້ສຶກພິເສດ, ເຫັນວ່າ ຢູ່ບ່ອນໃດກໍ່ບໍ່ໄດ້ຄືປະເທດ, ບ້ານເກີດເມືອງນອນຂອງຕົນ. ໃນການເດີນທາງຄັ້ງນີ້, ຂ້າພະເຈົ້າໄດ້ເຂົ້າຮ່ວມຢ້ຽມຊົມ ວິຫານ ໂດ, ບັກນິງ, ເຂົ້າຮ່ວມພິທີປ່ອຍສັດ ນີ້ແມ່ນການເຄື່ອນໄຫວທີ່ມີຄວາມໝາຍທີ່ສຸດ.
ໃນຂະນະນັ້ນ, ອ້າຍ ຫງວຽນຮ່ວາຍຕ໊ຽນ, ຊາວຫວຽດນາມອາໄສຢູ່ ອາເມລິກາ ໃຫ້ຮູ້ວ່າ:
ແຕ່ລະປີເມື່ອໄດ້ກັບເມືອປະເທດ, ຂ້າພະເຈົ້າກໍ່ຮູ້ສຶກວ່າ ໄດ້ມີຄວາມສະໜິດຕິດພັນກັບບ້ານເກີດເມືອງນອນກ່ວາ, ເຂົ້າໃຈກ່ຽວກັບວັດທະນະທຳກໍ່ຄື ຮີດຄອງປະເພນີຂອງ ບ້ານເກີດເມືອງນອນໃຫ້ຫຼາຍກ່ວາອີກ.
ແບ່ງປັນກັບພໍ່ແມ່ພີ່ນ້ອງຊາວ ຫວຽດນາມ ອາໄສຢູ່ຕ່າງປະເທດ, ທ່ານນາງ ຮອງປະທານປະເທດ ດັ້ງທິງອກທິ້ງ ເນັ້ນໜັກວ່າ: “ປະເທດຊາດ - ແມ່ນສິ່ງທີ່ສັກກະລະບູຊາ, ບ້ານເກີດເມືອງນອນ ແຫ່ງສາຍຈິດສາຍໃຈ ຍາມໃດກໍ່ຝັງເລິກໃນໃຈຂອງພວກເຮົາທຸກຄົນ, ເຖິງວ່າໄປຢູ່ໃສກໍ່ຕາມ ພວກເຮົາລ້ວນແຕ່ແມ່ນ “ຊາວ ຫວຽດນາມ”, ມີສາຍເລືອດດຽວກັນ, ຈິດໃຈ ຫວຽດນາມ, ສີສັນວັດທະນະທຳ, ມີຄວາມເອກອ້າງທະນົງໃຈ ຫວຽດນາມ.
ຂ້າພະເຈົ້າຮຽກຮ້ອງ ຊາວ ຫວຽດນາມ ທັງຢູ່ ພາຍໃນ ແລະ ຕ່າງປະເທດ, ຈົ່ງພ້ອມກັນເຊີດຊູຈິດໃຈຮັກຊາດ, ນ້ຳໃຈສາມັກຄີ, ນ້ຳໃຈເຊີດຊູຊາດຕົນເອງ, ແຂ່ງຂັນກັນ, ສູ້ຊົນມຸ່ງໄປສູ່ ການສ້າງສາປະເທດຫວຽດນາມ ວັດທະນາຖາວອນ, ໝັ້ນຄົງເຂັ້ມແຂງ, ຄຽງບ່າຄຽງໄຫຼ່່ກັບເພື່ອນມິດສາກົນຄືຄຳຮຽກຮ້ອງຂອງທ່ານປະທານ ໂຮ່ຈີມິນໃນເມື່ອກ່ອນ: “ປະຊາຊົນເຮົາຕ້ອງເປັນຈິດໜຶ່ງໃຈດຽວ: ເຫັນດີເຫັນພ້ອມ - ຮ່ວມແຮງຮ່ວມໃຈ - ຮ່ວມສຳພັນ. ສາມັກຄີ, ສາມັກຄີ, ມະຫາສາມັກຄີ, ສຳເລັດຜົນ, ສຳເລັດຜົນ, ມະຫາສຳເລັດຜົນ!”
ບຸນເຕັດແມ່ນ ຈຸດເວລາສັກກະລະບູຊາທີ່ສຸດ, ແມ່ນວັນແຫ່ງການເຕົ້າໂຮມ, ວັນກັບເມືອ ຫາກົກເຄົ້າເຫງົ້າກໍ. ປັດຈຸບັດ, ຊາວ ຫວຽດນາມ ເຖິງວ່າ ດຳລົງຊີວິດຢູ່ຫ່າງໄກຈາກບ້ານເກີດເມືອງນອນ, ບໍ່ວ່າຢູ່ ແຫ່ງຫົນໃດ ກໍ່ຕາມ ລ້ວນແຕ່ມຸ່ງໄປເຖິງກົກເຄົ້າເຫງົ້າກໍ, ບັນພະບຸລຸດຂອງຕົນ. ເມື່ອໄດ້ຕ້ອນຮັບບຸນເຕັດຢູ່ບ້ານເກີດເມືອງນອນ, ບ່ອນຕັດສາຍແຮ່ ແຜ່ສາຍບື ແລະ ໄດ້ເຫັນປະຈັກຕາການປ່ຽນແປງໃໝ່, ການພັດທະນາຂອງປະເທດຊາດນັ້ນ ແມ່ນຄວາມຜາສຸກຂອງ ຊາວຫວຽດນາມອາໄສຢູ່ຕ່າງປະເທດທຸກໆຄົນໃນຊຸມວັນນີ້.
(ແຫຼ່ງຄັດຈາກ VOV)