(ພາບປະກອບ: THX/ TTXVN )
ຕາມຂໍ້ມູນທີ່ໄດ້ປະກາດໃນວັນທີ 19 ກຸມພາ, ຈີນໄດ້ກວດພົບກໍລະນີຕິດເຊື້ອພະຍາດ Covid – 19 ໃໝ່ຕື່ມອີກ 1.749 ຄົນ ແລະ ຜູ້ເສຍຊີວິດຕື່ມອີກ 136 ຄົນ. ສະພາບການຮ້າຍແຮງແມ່ນຍັງຢູ່ແຂວງຫູເປິ່ຍ ດ້ວຍຜູ້ເສຍຊີວິດໃໝ່່ແມ່ນ 93 ກໍລະນີ. ເຖິງຢ່າງໃດກໍຕາມ, ສັນຍານຕັ້ງໜ້າແມ່ນຈໍານວນຜູ້ຕິດເຊື້ອພະຍາດຕື່ມອີກຢູ່ນອກແຂວງຫູເປີ່ຍ ໄດ້ຫຼຸດລົງເປັນມື້ 14 ຢ່າງລຽນຕິດ.
ວັນທີ 18 ກຸມພາ, ທ່ານປະທານປະເທດ ຈີນ ສີຈີ້ນຜິງ ໃຫ້ຮູ້ວ່າ ບັນດາມາດຕະການຂອງປະເທດນີ້ ເພື່ອແນໃສ່ສະກັດກັ້ນ ແລະ ຄວບຄຸມເຊື້ອພະຍາດ Covid – 19 ພວມບັນລຸໄດ້ຄວາມຄືບໜ້າທີ່ເຫັນໄດ້ຊັດ. ອໍານາດການປົກຄອງ ຈີນ ກໍໄດ້ມານະພະຍາຍາມຟື້ນຟູການເຄື່ອນໄຫວຄົມມະນາຄົມ ແລະ ເສດຖະກິດໃຫ້ກັບຄືນສູ່ສະພາບປົກກະຕິ ໄປຄຽງຄູ່ກັບການຍູ້ແຮງຄວາມມານະພະຍາຍາມຄວບຄຸມການແຜ່ລາມຂອງເຊື້ອພະຍາດດັ່ງກ່າວ.ກ່ຽວຂ້ອງເຖິງເຊື້ອພະຍາດດັ່ງກ່າວ, ໃນວັນດຽວກັນ ກະຊວງສາທາລະນະສຸກ ຍີ່ປຸ່ນ ກໍປະກາດວ່າ ມີ 88 ກໍລະນີຕື່ມອີກ ໄດ້ຮັບການຢັ້ງຢືນວ່າ ຕິດເຊື້ອພະຍາດ Covid – 19 ໃນກໍ່່າປັ່ນທ່ອງທ່ຽວ Diamond Princess, ເຮັດໃຫ້ຈໍານວນຜູ້ຕິດເຊື້ອພະຍາດໃນກໍ່າປັ່ນລໍາດັ່ງກ່າວຂຶ້ນເປັນ 524 ຄົນ. ໄລ່ຮອດວັນທີ 19 ກຸມພາ, ຈໍານວນຜູ້ຕິດເຊື້ອພະຍາດດັ່ງກ່າວໃນທົ່ວໂລກ ແມ່ນ 75.184 ຄົນ ແລະ ຈໍານວນຜູ້ເສຍຊີວິດ ແມ່ນ 2.009 ຄົນ.
ຂ່່າວດີໃນວັນທີ 18 ກຸມພາ, ວົງການສາທາລະນະສຸກ ຈີນ ປະກາດວ່າ ວິທີປິ່ນປົວພະຍາດດັ່ງກ່າວ ດ້ວຍການສົ່ງເລືອດລາຍ (palasma) ຂອງຜູ້ທີ່ຕິດເຊື້ອພະຍາດ Covid – 19 ທີ່ໄດ້ປົວຫາຍດີເປັນປົກກະຕິແລ້ວ ໃຫ້ຜູ້ຕິດເຊື້ອພະຍາດໃໝ່, ໃນເບື້ອງຕົ້ນ ແມ່ນໄດ້ຮັບໝາກຜົນທີ່ເປັນໜ້າຊື່ນຊົມ. ນອກຈາກນັ້ນ ບັນດາແພດໝໍ ຈີນ ກໍໄດ້ທົດລອງຢາຕ້ານເຊື້ອໄວຣັດ 2 ຊະນິດ ເຊິ່ງຄາດວ່າຈະປະກາດຜົນໃນ 2 – 3 ອາທິດຈະມາເຖິງ.
(ແຫຼ່ງຄັດຈາກ VOV)
