ທ່ານ ດ່າວງອັກຢຸງ ລັດຖະມົນຕີກະຊວງແຮງງານ - ທະຫານເສຍອົງຄະ ແລະ ສັງຄົມຫວຽດນາມ ເປັນປະທານກອງປະຊຸມ (ພາບ: baodansinh.vn)

   ທີ່ກອງປະຊຸມຜັນຂະຫຍາຍບັນດາການເຄື່ອນໄຫວສະເຫຼີມສະຫຼອງ 73 ປີ ແຫ່ງວັນທະຫານເສຍອົງຄະ - ນັກຮົບເສຍສະຫຼະຊີວິດເພື່ອຊາດ (ວັນທີ 27 ກໍລະກົດ 1947 – 27 ກໍລະກົດ 2020 ທີ່ຖືກດໍາເນີນໃນວັນທີີ 13 ກໍລະກົດ ຢູ່ຮ່າໂນ້ຍ, ທ່ານ ດ່າວງອັກຢຸງ ລັດຖະມົນຕີກະຊວງແຮງງານ - ທະຫານເສຍອົງຄະ ແລະ ສັງຄົມຫວຽດນາມ ໃຫ້ຮູ້ວ່າ: ຈຸດພົ້ນເດ່ັນໃນບັນດາການເຄື່ອນໄຫວສະເຫຼີມສະຫຼອງແມ່ນລາຍການ “ພົບປະຜູ້ແທນແມ່ຫວຽດນາມວິລະຊົນທົ່ວປະເທດປີ 2020”, ເຊິ່ງຄາດວ່່າຈະດໍາເນີນໃນລະຫວ່າງວັນທີ 23 – 25 ກໍລະກົດ ຢູ່ຮ່າໂນ້ຍ; ພິທີມອບ ໃບຈາລຶກຄຸນງາມຄວາມດີ, ເຊິ່ງຄາດວ່າ ຈະດໍາເນີນໃນວັນທີ 21 ກໍລະກົດ ຈະມາເຖິງຢູ່ແຂວງ ກວ໋າງນາມ. ທີ່ພິທີມອບໃບຈາລຶກຄຸນງາມຄວາມດີ, ການນໍາພັກ, ລັດ ຈະມອບຂອງຂວັນໃຫ້ແກ່ຄອບຄົວເປົ້າໝາຍນະໂຍບາຍ, ຍາດຕິພີ່ນ້ອງນັກຮົບເສຍສະຫຼະຊີວິດເພື່ອຊາດ, ນັກປະຕິວັດຜູ້ອາວຸໂສ, ນັກຮົບວິລະຊົນກໍາລັງປະກອບອາວຸດ; ມອບເຮືອນແຫ່ງສາຍຈິດມິດໃຈຈໍານວນ 20 ຫຼັງ ໃຫ້ແກ່ຄອບຄົວຜູ້ມີຄຸນງາມຄວາມດີ, ຍາດຕິພີ່ນ້ອງນັກຮົບເສຍສະຫຼະຊີວິດເພື່ອຊາດແຂວງ ກວ໋າງນາມ ແລະ ມອບທຶນການສຶກສາຈໍານວນ 100 ພູດໃຫ້ແກ່ນັກຮຽນຜູ້ທຸກຍາກ ແຂວງກວ໋າງນາມ.

        ພິເສດ, ຕອນເຊົ້າວັນທີ 27 ກໍລະກົດ, ການນໍາພັກ, ລັດ ແລະ ບັນດາກະຊວງ, ຂະແໜງການ, ໝູ່ຄະນະຂັ້ນສູນກາງ ຈະໄປຖະຫວາຍຈູດທູບໃຕ້ທຽນ ອາໄລຫາບັນດານັກຮົບວິລະຊົນເສຍສະຫຼະຊີວິດເພື່ອຊາດ ຢູ່ ອະນຸສາວະລີບັນດານັກຮົບວິລະຊົນເສຍສະຫຼະຊີວິດເພື່ອຊາດ ບັກເຊີນ ແລະ ເຂົ້າສຸສານອາໄລຫາປະທານໂຮ່ຈີມິນ. ນອກຈາກນັ້ນ, ການນໍາພັກ, ລັດ ກໍຈະໄປຢ້ຽມຢາມ ແລະ ມອບຂອງຂວັນໃຫ້ແກ່ຄອບຄົວຜູ້ມີຄຸນງາມຄວາມດີຕໍ່ການປະຕິວັດ ອີກດ້ວຍ.

(ແຫຼ່ງຄັດຈາກ VOV)