ຕັ້ງແຕ່ຫຼາຍເສັ່ນຄົນມາແລ້ວ, ຊາວຊົນເຜົ່າບານາເຄີຍດຳລົງຊີວິດສອດຄ່ອງປອງດອງກັບທຳມະຊາດ ແລະ ອີງໃສ່ທຳມະຊາດ. ດ້ວຍເຫດນັ້ນ, ຊຸດອາພອນຂອງຊາວເຜົ່າບານາໄດ້ສະແດງໃຫ້ເຫັນປັດໃຈທຳມະຊາດບໍ່ຫຼາຍກໍໜ້ອຍ. ຊາວເຜົ່າບານາປູກຕົ້ນຝ້າຍເພື່ອເອົາດອກຝ້າຍເຂັນ ເປັນເສັ້ນດ້າຍ ແລ້ວຍ້ອມສີ ແລະ ຕຳ່ເປັນຊຸດອາພອນປະຈຳເຜົ່າ. ປະຈຸບັນ, ຊາວເຜົ່າບານາສາມາດຊື້ເສັ້ນໄໝຫຍິບມາແຕ່ ຕະຫຼາດແທນ ໃຫ້ແກ່ການໃຊ້ເສັ້ນດ້າຍຈາກຕົ້ນຝ້າຍ ແລະ ຍັງຄົງຍ້ອມສີຕາມແບບເດີມ ເພື່ອສ້າງສີສັນແບບທຳມະຊາດແລ້ວຈຶ່ງນຳໄປຕຳ່ຫູກ.
ເມື່ອເບິ່ງທາງນອກ, ຊຸດປະຈຳເຜົ່າຂອງຍິງສາວຊາວເຜົ່າບານາຄືວ່າງ່າຍດາຍກວ່າຊຸດປະຈຳເຜົ່າຂອງຊາວຊົນເຜົ່າຈຳນວນໜຶ່ງຢູ່ໄຕງວຽນ. ແຕ່ໃນຄວາມຈິງ ມັນກໍຮຽກຮ້ອງຄວາມລະອຽດ ແລະ ພິຖີພິຖັນຂອງຊ່າງຕຳ່ຫູກ ໂດຍໄດ້ສະແດງອອກຜ່ານສີສັນ ແລະ ລວດລາຍຕ່າງໆ ຢູ່ສ່ວນບ່າ, ເອິກ ແລະ ຕີນເສື້ອ. ຢູ່ແຂບເສື້ອ, ສິ້ນ ແລະ ແຂນເສື້ອທັງສອງເບື້ອງ ໄດ້ຮັບການຕົບແຕ່ງລາຍດອກຕາມແບບຮູບຮ່າງເລຂາຄະນິດ ແລະ ມີປັດໃຈທຳມະຊາດ. ສາຍແອວໄດ້ປັກແສ່ວລາຍດອກ ແລະ ຍອຍຜ້າ. ຜູ້ຍິງຊາວເຜົ່າບານາກໍມັກຖືສາຍຄໍດ້ວຍເມັດແກ້ວ ທີ່ນາໆສີສັນ ແລະ ປອກ ຄໍເງິນ, ທອງ.
ຍິງສາວຊາວເຜົ່າບານາໃນຊຸດປະຈຳຊົນເຜົ່າ. |
ຍິງສາວຊາວເຜົ່າບານາມັກຈົ່ງຜົມຕັ້ງບ່າ
ແລະ ໃຊ້ຜ້າແພຄຽນຫົວ. |
ຊຸດປະຈຳຊົນເຜົ່າປະກອບສ່ວນສ້າງຂຶ້ນຄວາມງາມແບບ
ເຂັ້ມແຂງໃຫ້ແກ່ຍິງສາວຊາວເຜົ່າບານາ. |
ຍິງສາວຊາວເຜົ່າບານາເຄີຍນຳໃຊ້ສາຍຄໍຕິດເມັດແກ້ວທີ່ຫຼາກຫຼາຍສີສັນ ແລະ ປອກແຂນ, ປອກຄໍທີ່ຕິດເງິນ, ທອງ…
ຍິງສາວຊາວເຜົ່າບານາບໍ່ນຳໃຊ້ແຂນເສື້ອໃນຊຸດປະຈຳຊົນເຜົ່າຂອງຕົນເພື່ອອວດອ້າງຮູບຮ່າງຄວາມງາມຂອງຕົນ. |
ມີຈຸດພິເສດອັນໜຶ່ງໃນຊຸດປະຈຳເຜົ່າຂອງຊາວເຜົ່າບານາ ນັ້ນແມ່ນ ເສື້ອມີແຂນ ແຕ່ບໍ່ຄ່ອຍໄດ້ນຳໃຊ້ ຫາກຈະປະຢູ່ລ້າໆ ຊຶ່ງສ້າງຄວາມມີສະເໜ ແລະ ລະມຸ່ນລະມ່ອມໃນແຕ່ລະບາດກ້າວ. ນອກຈາກນັ້ນ, ສິ້ນຂອງເຂົາຈະສັ້ນກວ່າສິ້ນຂອງຜູ້ຍິງຊາວເຜົ່າເອເດ ຫຼືຊາວເຜົ່າອື່ນໆ ແລະ ມີສ່ວນ ຂາຖືກເຜີຍອອກ ອັນໄດ້ສ້າງຄວາມງາມທາງຮູບຮ່າງຂອງຜູ້ນຸ່ງຖື.
ຖ້າຫາກວ່າຊຸດປະຈຳເຜົ່າຂອງຜູ້ຍິງຊາວເຜົ່າບານາມັກອ່ຽງໄປທາງລາຍແຕ້ມປະດັບປະດາ ແລະ ຄວາມມີສະເໜ່ ອ່ອນຊ້ອຍ ຫາກຊຸດອາພອນ ປະຈຳເຜົ່າຂອງຜູ້ຊາຍພັດສະແດງຄວາມເຂັ້ມແຂງ ແລະ ໄດ້ນຳໃຊ້ໃນພິທີຕ່າງໆ ໂດຍມີຄຸນຄ່າທາງດ້ານສາສະໜາ ແລະ ຖານະຕຳແໜ່ງ ຂອງ ຜູ້ນຸ່ງຖື. ເສື້ອບໍ່ມີແຂນ, ສ່ວນຕີນເສື້ອໄດ້ຕົບແຕ່ງຮູບງ້າວ, ຮູບນົກ ຫຼືວ່າຮູບເຄື່ອງມືທຳການຜະລິດ ແລະ ໄດ້ຮັບການອອກແບບຢ່າງຄ່ອງແຄ້ວ ເພ່ືອເຮັດໃຫ້ຜູ້ນຸ່ງຖືບໍ່ຖືກປິດບັງສ່ວນເນື້ອກ້າມ.
ຜູ້ຊາຍຊາວເຜົ່ຍບານາສະແດງຄ້ອງກອງໃນຊຸດປະຈຳຊົນເຜົ່າ.
ຜ້າບີງຄຽນເປັນຮູບໄຂ່ວຢູ່ໜ້າເອິກ ຊຶ່ງສະແດງຄວາມງາມຂອງຜູ້ຊາຍຊາວເຜົ່າບານາ. |
ສາຍຄໍດ້ວຍເມັດແກ້ວໄດ້ຍິ່ງເພີ່ມຂຶ້ນຄວາມງາມຂອງ
ຜູ້ຊາຍຊາວເຜົ່າບານາ. |
ຂົນນົກຍຸງປັກຢູ່ເທິງເກົ້າຜົມເປັນສິ່ງຂອງທີ່ບໍ່ສາມາດຂາດໄດ້ໃນຊຸດປະຈຳ ເຜົ່າຂອງຜູ້ຊາຍຊາວຊົນເຜົ່າບານາໃນໂອກາດຈັດງານບຸນແຕ່ລະເທື່ອ. |
ການສະແດງຄ້ອງກອງໃນໂອກາດຈັດງານບຸນຂອງຊາວເຜົ່າບານາ. |
ໃນໂອກາດຈັດງານບຸນ, ຜູ້ຊາຍຊາວເຜົ່າບານາເບິ່ງສຸດທີ່ແຂງແຮງ ລຳສັນໃນຊຸດປະຈຳເຜົ່າຂອງຕົນ. ເຂົາເຈົ້ານຸ່ງກະຕ່ຽວ, ເສື້ອຜ້າດ້າຍດິບ ສີໝາກະເບົາ ຫຼື ສີດຳ, ຜ້າຄຽນເປັນຮູບໄຂ່ວຢູ່ໜ້າເອິກ, ຫົວເກົ້າຜົມ ແລະ ປັກໃສ່ຂົນນົກຍູງ, ມືຈັບດາບ, ເຂນ ຟ້ອນລຳໃນທຳນອງສຽງ ຄ້ອງສຽງກອງ.
ພ້ອມກັບການຂະຫຍາຍຕົວຂອງສັງຄົມ, ຄວາມຮຽກຮ້ອງຕ້ອງການໄປມາກໍຫຼາຍກວ່າເມື່ອກ່ອນ ດັ່ງນັ້ນ, ຊາວເຜົ່າບານາພຽງນຸ່ງຊຸດປະຈຳເຜົ່າ ໃນໂອກາດຈັດງານບຸນ ຄື: ບຸນແທງຄວາຍ, ບຸນອອກບູຊາຜີສາງ, ບຸນຂຶ້ນເຮືອນຣົງໃໝ່, ງານດອງ ແລະ ອື່ນໆ… ຊຶ່ງປະກອບສ່ວນອະນຸລັກ ຮັກສາຈຸດວັດທະນະທຳທີ່ເປັນເອກະລັກຂອງຊາວເຜົ່າບານາ.
ບົດ: ຖູກຮ່ຽນ - ພາບ: ຈິ້ງວັນໂບ້
|