ຖ້າວ່າ 10 ປີກ່ອນຫນ້ານີ້, ຄອງເໝືອງຍຽວລົກ-ທິແງ່ ເປັນລຳຄອງ ທີ່ເປີະເປື້ອນສົກກະປົກທີ່ສຸດຂອງໄຊງ່ອນ (ນະຄອນໂຮ່ຈີມິນ), ແມ່ນມາຮອດປັດຈຸບັນ ພາຍຫຼັງທີ່ໂຄງການດັດແປງລຳຄອງໄດ້ຖືກຈັດຕັ້ງປະຕິບັດ ລຳຄອງດ່ັງກ່າວໄດ້ຮັບການຟື້ນຟູຄືນໃໝ່ ແລະ ກາຍເປັນຄອງທີ່ມີສາຍນຳ້ໃສສະອາດ, ບັນຍາກາດອັນເຍືອກເຢັນ ແລະ ສົດຊື່ນຕາມສອງຝັ່ງຄອງເໝືອງ. ໂດຍສະເພາະແມ່ນນັບຕັ້ງແຕ່ມື້ ບໍລິສັດເຮືອ ໄຊງ່ອນຈຳກັດໄດ້ນຳເຂົ້າສູ່ລາຍການທ່ອງທ່ຽວພາຍໃນເມືອງເທິງຄອງເຫມືອງຍຽວລົກ-ທິແງ່ ນັບແຕ່ເດືອນ ກັນຍາ 2015 ເປັນຕົ້ນມາ, ສາຍການທ່ອງທ່ຽວແບບຂີ່ເຮືອຫົງ ລ່ອງ ຄອງເໝືອງ ຍຽວລົກ-ທິແງ່ ເພື່ອຄົ້ນພົບວັດທະນະທຳຂອງນະ ຄອນໂຮ່ຈີມິນ ກຳລັງເປັນຈຸດນັດໝາຍທີ່ດຶງດູດໃຈນັກທ່ອງທ່ຽວ ທັງຢູ່ພາຍໃນ ແລະ ຕ່າງປະເທດ.
ຢູ່ໃນໂລກ, ຮູບການທ່ອງທ່ຽວເທິງຄອງເໝືອງ, ລຳຄອງໃນເມືອງ ດຶງດູດນັກທ່ອງທ່ຽວທີ່ຢູ່ນະຄອນຈາກເຂດເອີຣົບທີ່ສຸດເຊັ່ນ: ຈາກເຂດ Venice (ອີຕາລີ), Pais (ຝຣັ່ງ), ລອນດອນ (ອັງກິດ) ຫຼື Vienna (ໂຕຣິດ)… ເຖິງແມ່ນວ່າຮູບການທ່ອງທ່ຽວນີ້ ຫາກໍໄດ້ ຮັບການກຳເນີດເກີດຂຶ້ນກໍຕາມ ແຕ່ກໍສາມາດ ດຶງດູດຄວາມສົນ ໃຈນັກທ່ອງທ່ຽວຢູ່ພາຍໃນ ແລະ ຕ່າງປະເທດ.
ແນວຄວາມຄິດຫັນລຳຄອງຍຽວລົກ - ທິແງ່ເປັນສະຖານທີ່ທ່ອງທ່ຽວ ທີ່ແປກໃໝ່, ປະທັບໃຈຕໍ່ນັກທ່ອງທ່ຽວ ໂດຍທ່ານ ຟານຊວນແອງ, ປະທານສະພາບໍລິສັດເຮືອໄຊງ່ອນຈຳກັດເປັນຜູ້ນຳສະເໜີ. ທ່ານ ຊວນແອງໃຫ້ຮູ້ວ່າ, ຫຼາຍປີຜ່ານມາ, ລາຍການທ່ອງທ່ຽວ ຢ້ຽມຢາມ ໃນເມືອງ (city tour) ຍັງບໍ່ມີຫຍັງແປກໃໝ່ ດັ່ງນັ້ນ ຮູບການທ່ອງທ່ຽວ ຍຽວລົກ - ທິແງ່ຈະເປັນບາດກ້າວບຸກທະລຸເພື່ອສ້າງ ຄວາມດຶງດູດໃຈ ໃຫ້ນັກທ່ອງທ່ຽວ.
ເດືອນເມສາ 2014, ທ່ານຟານຊວນແອງ ໄດ້ຂຶ້ນແຜນ ແລະ ສະເຫນີຕໍ່ອຳນາດການປົກຄອງນະຄອນໂຮ່ຈີມິນ ຂໍໃບອະນຸຍາດ ດຳເນີນການທ່ອງທ່ຽວພາຍໃນເມືອງເທິງ ຄອງເໝືອງຍຽວລົກ - ທິແງ່. ບໍລິສັດເຮືອໄຊງ່ອນຈຳກັດ ໄດ້ລົງທຶນໄລຍະເບື້ອງຕົ້ນ ເພື່ອດຳເນີນ ການນຳທ່ຽວທາງນ້ຳໃນເມືອງດ້ວຍກ້ອນເງິນ 10 ຕື້ດົ່ງ.
ຈາກການເປັນລຳຄອງທີ່ມີມົນພາວະເປັນພິດໃນອະດີດ, ມາບັດນີ້, ຍຽວລົກ-ທິແງ່ ໄດ້ກາຍເປັນເຄືອຂ່າຍການທ່ອງທ່ຽວທາງນ້ຳ ໃນເມືອງ
ທີ່ ຈັບອົກຈັບໃຈນັກທ່ອງທ່ຽວທັງພາຍໃນ ແລະ ຕ່າງປະເທດ ເມື່ອມາຢ້ຽມຢາມນະຄອນໂຮ່ຈີມິນ. ພາບ: ທົງຫາຍ/VNP
ນັກທ່ອງທ່ຽວຕ່າງປະເທດໃນຂະບວນການຢ້ຽມຊົມຄອງເໝືອງຍຽວ ລົກ-ທິແງ່ດ້ວຍເຮືອ. ພາບ: ທົງຫາຍ/VNP
ໃນລາຍການທ່ອງທ່ຽວທີ່ນີ້, ບັນດາທ່ານຈະໄດ້ຢ້ຽມຊົມທິວທັດ ທຳມະຊາດ ຢູ່ສອງຝັ່ງແມ່ນ້ຳ
ແລະ ໄດ້ຮັບຟັງສຽງດົນຕີ ພື້ນເມືອງ. ພາບ: ທົງຫາຍ/VNP
ເຮືອຫົງໄດ້ພານັກທ່ອງທ່ຽວຜ່ານເຂດວັດຫາຍດຶກ ຕັ້ງຢູ່ແຄມຝັ່ງ ຄອງເໝືອງຍຽວລົກ - ທິແງ່. ພາບ: ທົງຫາຍ/VNP
ຍາມແສງຕາເວັນລົງແລງໃນເຂດຄອງເໝືອງຍຽວລົກທິແງ່. ພາບ: ອານຮ໋ຽວ
ຄອງເໝືອງຍຽວລົກ - ທິແງ່ໄດ້ຟື້ນຊີບຄືນໃໝ່ ແລະ ກາຍເປັນ ເຄືອຂ່າຍການທ່ອງທ່ຽວແບບໃໝ່ທີ່ດຶງດູດໃຈ
ແຂກມາທ່ຽວທັງພາຍໃນ ແລະ ຕ່າງປະເທດເມື່ອມາແວ່ຢາມນະຄອນໂຮ່ຈີມິນ. ພາບ: ທົງຫາຍ/VNP
ນັກທ່ອງທ່ຽວບັນທຶກພາບໄວ້ໃນກອງຖ່າຍຮູບຂອງຕົນ ກ່ຽວກັບວິຖີການດຳລົງຊີວິດ
ຂອງຊາວເມືອງໄຊງ່ອນຢູ່ສອງຝັ່ງຄອງເໝືອງ. ພາບ: ທົງຫາຍ/VNP
ພາຫະນະຮັບໃຊ້ເພື່ອນຳພາແຂກໄປທ່ຽວຄອງເໝືອງຍຽວລົກ - ທິແງ່ ແມ່ນເຮືອຫົງ
ສາມາດຮັບແຂກໄດ້ 2 ຫາ 6 ຄົນພ້ອມກັບສີພາຍ. ພາບ: ທົງຫາຍ/VNP
ໄລຍະທາງທ່ອງທ່ຽວຍຽວລົກ - ທິແງ່ມີຄວາມຍາວ 4,5 ກິໂລແມັດ ໄປຜ່ານເຂດພື້ນທີ່
ເມືອງ 1, 3, ເມືອງບິ່ງແທ້ງ ແລະ ເມືອງ ຟູ໋ຍ້ວນ. ພາບ: ທົງຫາຍ/VNP
|
ເພື່ອຈະຄົ້ນຫາຄວາມສວຍງາມໃນຄອງເໝືອງ ຍຽວລົກ-ທິແງ່ດັ່ງກ່າວ, ທ່ານສາມາດຊື້ປີ້ຢູ່ 2 ຈຸດຄື: ຈຸດທີ 1 ຢູ່ເມືອງ 1 ຕັ້ງຢູ່ຖະໜົນ ຮວ່າງຊາ ແລະ ຈຸດທີ 2 ຢູ່ ເມືອງ 3 ຖະໜົນ ຮວ່າງຊາ ເຊັ່ນດຽວກັນ. ດ້ວຍລາຄາປີ້ລະ 220.000 ດົ່ງ/ຄົນ, ເຮືອຫົງຈະພາ ນັກທ່ອງທ່ຽວ ລ່ອງໄປຕາມກະແສນ້ຳລ່ອງຄອງເໝືອງ ຍຽວລົກ-ທິແງ່ ທີ່ມີຄວາມຍາວ 4,5 ກິໂລແມັດ, ຜ່ານເຂດເມືອງ 1, 3, ເມືອງ ບິ່ງແທ້ງ ແລະ ເມືອງ ຝູ໋ຍ້ວນ. ເມື່ອໄປເຖິງແຕ່ລະເມືອງ ຫຼື ເຂດສະຖານທີ່ ປະຫວັດສາດ, ຜູ້ນຳທ່ຽວໃນຊຸດເສື້ອສີຂຽວບ່າບາ (ຊຸດອາພອນທີ່ໄດ້ຮັບ ການນຳໃຊ້ທົ່ວໄປທີ່ເຂດບ້ານນາ, ໂດຍສະເພາະແມ່ນທາງພາກໃຕ້ ຫວຽດນາມ) ຈະໃຫ້ການບັນລະຍາຍຕໍ່ ນັກທ່ອງທ່ຽວດ້ວຍສອງ ພາສາ ຫວຽດນາມ-ອັງກິດ ກ່ຽວກັບປະຫວັດສາດ ແລະ ການປ່ຽນ ແປງຂອງລຳຄອງດັ່ງກ່າວ.
ເຮືອລຳຕ່າງໆຂຶ້ນລ່ອງຕາມຄອງເໝືອງພານັກທ່ອງທ່ຽວ ຊົມສະຖານທີ່ພາບທີ່ມີຊື່ສຽງເລົ່າລືເຊັ່ນ ວັດ Chantaransay, ວັດ ຟາບ ຮວາ… ຫຼື ວິຖີການດຳລົງຊີວິດຂອງຜູ້ຄົນນະຄອນໄຊງ່ອນຕົວຈິງ ຢູ່ສອງຝັ່ງຄອງເໝືອງ. ຢູ່ໃຕ້ນ້ຳມີຝູງປາເປັນຈຳນວນ ຫຼວງຫຼາຍ ອ້ອມຮອບລຳເຮືອເຮັດໃຫ້ນັກທ່ອງທ່ຽວພໍອົກພໍໃຈເປັນທີ່ສຸດ. ພ້ອມ ນັ້ນຍັງໄດ້ຟັງສຽງຂັບລຳເພັງພື້ນເມືອງ, ສຽງແຄນ Harmonica ແວ້ວມາຕາມສາຍລົມ. ພິເສດທ່ານຈະໄດ້ ລື້ນເລີງກັບສຽງດົນຕີ ພື້ນເມືອງຕ່າງໆຄື: ເດີນກາຕາຍຕື້, ດົນຕີພື້ນເມືອງ, ສຽງຂຸ່ຍ, ສຽງພິນ ແລະ ອື່ນໆໃນລະຫວ່າງການທ່ຽວຊົມ.
ທ່ານ Kevin ຫງວຽນ, ເປັນຊາວຫວຽດນາມອາໄສຢູ່ອາເມລິກາ ເມື່ອໄດ້ມາຢ້ຽມຊົມ ແລະ ຮັບຟັງຜູ້ນຳທ່ຽວບັນລະຍາຍກ່ຽວກັບ ການປ່ຽນແປງຂອງລຳຄອງເໝືອງຍຽວລົກ - ທິແງ່ ໄດ້ສະແດງ ຄວາມຮູ້ສຶກອອກມາວ່າ: “ເປັນສິ່ງຍອດຍິ່ງ ແລະ ສະໜຸກສະໜານໃຈທີ່ສຸດ! ປຽບເໝືອນຕົນເອງກຳລັງທ່ຽວຊົມ ທັດສະນີຍະພາບຢູ່ນະຄອນ ເວນີສ ທີ່ລືຊື່ຂອງອີຕາລີພູ້ນແຫຼະ”.
ບົດ: ຫງວຽນແອງ - ພາບ: ທົງຫາຍ/VNP - ອານຮ໋ຽວ