ໃນວິວັດການຕົ້ມນ້ຳຕານອ້ອຍ, ສຳຄັນທີ່ສຸດແມ່ນຮັກສາໄຟໃນເຕົາໃຫ້ສະໝ່ຳສະເໝີ, ເຖິງວ່າຂັັ້ນຕອນຕົ້ມນ້ຳຕານອ້ອຍບໍ່ຄຸກິຄຸກິປານໃດແຕ່ໄດ້ຮຽກຮ້ອງຕ້ອງມີຄວາມອົດທົນ, ມີປະສົບການ ແລະ ທັງຄວາມສຸດຈິດສຸດໃຈຂອງຜູ້ເຮັດ. ຍ້ອນຄວາມພິຖີພິຖັນຄືແນວນັ້ນຈຶ່ງຈະເຮັດໃຫ້ນ້ຳຕານອ້ອຍມີສີນ້ຳຕານເຫຼື້ອມທີ່ງາມຕາ, ລົດຊາດຫວານມັນ ແລະ ຄວາມໜຽວທີ່ພິເສດ. ທ່ານ ດັງວັນແທັງ, ຢູ່ຕາແສງ ຫວູກວາງ  ຜູ້ໄດ້ຕິດພັນກັບອາຊີບນີ້ມາເປັນເວລາກວ່າ 30 ປີ ໃຫ້ຮູ້ວ່າ:          

 ຂັ້ນຕອນກວັນນ້ຳຕານອ້ອຍແມ່ນຂັ້ນຕອນສຸດທ້າຍ, ຕ້ອງມີຄວາມພິຖີພິຖັນແລະ ເສຍເວລາ ແລະ ເຫື່ອແຮງຫຼາຍ. ໃນຂັ້ນຕອນນີ້, ຜູ້ຕົ້ມຕ້ອງຄົນລຽນຕິດ ແລະ ສະມ່ຳສະເໝີ. ເມື່ອເລີ່ມຟົດ, ຖ້າຕັກຝອດອອກບໍ່ທັນຈະເຮັດໃຫ້ນ້ຳຕານອ້ອຍຟົດລົ້ນອອກ, ນ້ຳຕານອ້ອຍຈະມີສີດຳ, ບໍ່ຫອມແຊບ. ເມື່ອນ້ຳຕານອ້ອຍເລີ່ມແຂ້ນ ແລະ ມີສີນ້ຳຕານແດງ, ກໍ່ຖືວ່າຂັ້ນຕອນຕົ້ມນ້ຳຕານອ້ອຍສຳເລັດ.          

ຜະລິດຕະພັນນ້ຳຕານອ້ອຍຂອງຕາແສງ ຫວູກວາງ ໄດ້ຮັບຮູ້ແມ່ນຜະລິດຕະພັນ OCOP (ພາບ: ກີມລ້ຽວ)

ປະຈຸບັນ, ບັນດາຄອບຄົວທຳການຜະລິດ ໄດ້ຮ່ວມສຳພັນກັນສ້າງຕັ້ງສະຫະກອນ ບໍລິການນ້ຳຕານອ້ອຍ ເຊີນຖໍ້, ຈັດການຜະລິດຕາມຂັ້ນຕອນເຕົ້າໂຮມ, ຊ່ວຍຍົກສູງຄຸນຄ່າເຄື່ອງໝາຍການຄ້າ ແລະ ຈຳໜ່າຍນ້ຳຕານອ້ອຍອອກສູ່ຕະຫຼາດທົ່ວປະເທດ. ເອື້ອຍ ດວ່ານທິຍ່ານ ປະທານສະຫະກອນ ບໍລິການນ້ຳຕານອ້ອຍ ເຊີນຖໍ້ ໃຫ້ຮູ້ວ່າ:           

ແຕ່ລະປີ, ທາງສະຫະກອນໄດ້ສະໜອງນ້ຳຕານອ້ອຍໃຫ້ແກ່ທ້ອງຕະຫຼາດແຕ່ 15-20.000 ລິດ. ປີນີ້, ຈຳນວນລູກຄ້າຈອງຊື້ຫຼາຍ, ດັ່ງນັ້ນ, ທາງສະຫະກອນຕ້ອງເຮັດວຽກໝົດສະມັດຕະພາບ, ເກືອບຄືວ່າເຂດຄົວຕົ້ມນ້ຳຕານອ້ອຍແມ່ນເຮັດໝົດມື້. ປະຈຸບັນ, ພວກຂ້າພະເຈົ້າໜີບອ້ອຍສົດປະມານ 3-4 ໂຕນ/ວັນ, ເທົ່າກັບຕົ້ມນ້ຳຕານອ້ອຍໄດ້ປະມານ 300 ລິດ ເພື່ອຮັບໃຊ້ຄວາມຕ້ອງການຂອງ ປຊຊ.          

ປີ 2020, ຜະລິດຕະພັນນ້ຳຕານອ້ອຍຂອງຕາແສງ ຫວູກວາງ ໄດ້ຮັບຮູ້ວ່າແມ່ນຜະລິດຕະພັນ OCOP (ໜຶ່ງຕາແສງໜຶ່ງຜະລິດຕະພັນ) ຂັ້ນແຂວງ, ຈາກນັ້ນ, ຜະລິດຕະພັນໄດ້ຢັ້ງຢືນຄຸນນະພາບ ແລະ ມີຫຼາຍໂອກາດຕື່ມອີກເພື່ອເປີດກ້ວາງຕະຫຼາດ. ໃນທ່າມກາງບັນດາການຜັນແປຂອງຈັງຫວະການດຳລົງຊີວິດທີ່ທັນສະໄໝ, ໝູ່ບ້ານນ້ຳຕານອ້ອຍ ຫວູກວາງ ຍັງຄົງຕົວແບບງຽບໆ, ປະກອບສ່ວນຮັກສາໝູ່ບ້ານທີ່ເປັນມູນເຊື້ອໃນສັງຄົມຍຸກປະຈຸບັນ./.