ຕອນບ່າຍວັນທີ 12 ສິງຫາ, ທ່ານນາຍົກລັດຖະມົນຕີຫວຽດນາມ ຫງວຽນຊວັນຟຸກໄດ້ເປັນປະທານກອງປະຊຸມອອນລາຍຄະນະປະຈຳລັດຖະບານ ກັບບັນດາກະຊວງ, ຂະແໜງການ ແລະ 15 ທ້ອງຖິ່ນກ່ຽວກັບສະພາບການ ແລະ ບັນດາມາດຕະການໃໝ່ໃນການປ້ອງກັນ, ສະກັດກັ້ນໂລກລະບາດໂຄວິດ - 19.
ທ່ານນາຍົກລັດຖະມົນຕີ ຫງວຽນຊວັນຟຸກ ກ່າວຄຳເຫັນທີ່ກອງປະຊຸມ (ພາບ: VGP)
ທ່ານນາຍົກລັດຖະມົນຕີ ຫງວຽນຊວັນຟຸກ ຊີ້ແຈ້ງວ່າ ພວກເຮົາສາມາດຖອດຖອນຫຼັກສູດໃນການປ້ອງກັນ, ສະກັດກັ້ນໂລກລະບາດໄດ້ເປັນຢ່າງດີ ນັ້ນແມ່ນ ກວດພົບ - ກວດພົບໄວ, ແຍກຕົວ - ແຍກຕົວໄວ, ກວດຫາເຊື້ອ - ກວດຫາເຊື້ອໂດຍໄວໃນວົງກວ່າ”. ທ່ານນາຍົກລັດຖະມົນຕີ ຮຽກຮ້ອງໃຫ້ກະຊວງສາທາລະນະສຸກໜູນຊ່ວຍບັນດາທ້ອງຖິ່ນປະຕິບັດກົດມາດຖານໂຮງໝໍປອດໄພຢ່າງເຂັ້ມງວດ, ບໍ່ປະໃຫ້ໂລກລະບາດລະເບີດຈາກຮາກຖານສາທາລະນະສຸກ, ພິເສດແມ່ນຕ້ອງມີຂັ້ນຕອນແກ້ໄຂບັນດາກໍລະນີຕິດເຊື້ອໂຄວິດ - 19 ທີ່ບັນລຸມາດຕະຖານ ເພື່ອສະກັດກັ້ນການແຜ່ລະບາດໃນຊຸມຊົນໄດ້ຢ່າງທັນການ. ສຳລັບບັນດາທ້ອງຖິ່ນ, ທ່ານນາຍົກລັດຖະມົນຕີ ຫງວຽນຊວັນຟຸກ ຊີ້ນຳວ່າ:
“ແຕ່ລະທ້ອງຖິ່ນຕ້ອງຄິດອອກຍຸດທະສາດປ້ອງກັນ, ສະກັດກັ້ນໂລກລະບາດຢ່າງມີປະສິດທິຜົນ ນັບທັງດ້ານເສດຖະກິດ ແລະ ສາທາລະນະສຸກ. ພວກເຮົາຕ້ອງຍົກສູງວຽກງານປ້ອງກັນ, ສະກັດກັ້ນໂລກລະບາດ, ບໍ່ຄວນປະໝາດ, ຂາດສະຕິລະວັງຕົວ, ແຕ່ການປິດປະຕູຢ່າງເຄັ່ງຄັດໃນວົງກວ້າງນັ້ນ ບໍ່ພຽງແຕ່ເຮັດໃຫ້ທຸກການເຄື່ອນໄຫວເສດຖະກິດ - ສັງຄົມ ຖືກຢຸດສະຫງັກເທົ່ານັ້ນ ຫາກຍັງສົ່ງຜົນກະທົບເຖິງຈິດວິທະຍາ ແລະ ອາລົມຈິດຂອງຂອງປະຊາຊົນ ແລະ ສັງຄົມອີກດ້ວຍ. ແຕ່ລະທ້ອງຖິ່ນຕ້ອງມີສະຕິລະວັງຕົວ, ຮູ້ວິທີເຮັດທີ່ເໝາະສົມ, ບໍ່ຄວນຖືເບົາຊີວິດອິນຊີຂອງປະຊາຊົນ, ແຕ່ບໍ່ອາດປິດປະຕູທຸກການເຄື່ອນໄຫວໄດ້.”
(ແຫຼ່ງຄັດຈາກ VOV)