ວັນທີ 27 ພຶດສະພາ, ກອງປະຊຸມນະໂຍບາຍຄວາມໝັ້ນຄົງ ເວທີປາໄສພາກພື້ນ ອາຊຽນ ຄັ້ງທີ 18 (ASPC - 18) ໄດ້ດຳເນີນຕາມຮູບການທາງອອນລາຍ ພາຍໃຕ້ການເປັນປະທານຂອງທ່ານ ວາທີນາຍພົນ Dato Seri Pahlawan Shahri Anwar bin Haji Ma’ awiah, ເລຂານຸການຜູ້ປະຈຳການກະຊວງປ້ອງກັນປະເທດ ບຣູໄນ.
ທ່ານພົນໂທ ຮ່ວາງຊວັນຈ໊ຽນ ເຂົ້າຮ່ວມ ກອງປະຊຸມນະໂຍບາຍຄວາມໝັ້ນຄົງ ເວທີປາໄສພາກພື້ນ ອາຊຽນ ຄັ້ງທີ 18
(ພາບ: ກະຊວງປ້ອງກັນປະເທດ ຫວຽດນາມ)
ຄະນະຜູ້ແທນ ຫວຽດນາມ ເຂົ້າຮ່ວມ ASPC – 18 ເພື່ອແນໃສ່ຢັ້ງຢືນບົດບາດຂອງ ຫວຽດນາມ ແມ່ນສະມາຊິກທີ່ຕັ້ງໜ້າ, ເປັນເຈົ້າການ ແລະ ມີຄວາມຮັບຜິດຊອບຕໍ່ການຮ່ວມມືດ້ານປ້ອງກັນຊາດ ໃນຂອບເຂດ ເວທີປາໄສ ພາກພື້ນ ອາຊຽນ (ARF), ຊຸກຍູ້ການຮ່ວມມືດ້ານປ້ອງກັນຊາດລະຫວ່າງບັນດາປະເທດ ອາຊຽນ ແລະ ບັນດາຄູ່ຮ່ວມມືໃນຂອບເຂດ ARF, ສືບຕໍ່ໝາກຜົນຂອງປີ ປະທານອາຊຽນ 2020, ພ້ອມທັງສະແດງ ການສະໜັບສະໜູນຕໍ່ ບຣູໄນ ໃນປີດຳລົງຕຳແໜ່ງເປັນປະທານອາຊຽນ 2021.
ກ່າວຄຳເຫັນທີ່ ASPC – 18, ທ່ານພົນໂທ ຮ່ວາງຊວັນຈ໊ຽນ ໄດ້ແບ່ງປັນຂໍ້ສັງເກດກ່ຽວກັບສະພາບຄວາມໝັ້ນຄົງ ຢູ່ໃນໂລກ ແລະ ພາກພື້ນ, ລວມມີບັນດາສິ່ງທ້າທາຍຄວາມໝັ້ນຄົງແບບເກົ່າ ແລະ ແບບໃໝ່, ໃນນັ້ນມີຄວາມໝັ້ນຄົງທາງທະເລ, ການກໍ່ການຮ້າຍ ແລະ ຄວາມໝັ້ນຄົງທາງອິນເຕີເນັດ.
ໂດຍຢັ້ງຢືນຄວາມສຳຄັນຂອງສັນຕິພາບ, ສະຖຽນລະພາບໃນວິວັດການຟື້ນຟູພາຍຫຼັງ ໂລກລະບາດໂຄວິດ - 19 ແລະ ການເສີມຂະຫຍາຍບົດບາດຂອງຊ່ອງທາງຮ່ວມມື ດ້ານປ້ອງກັນຊາດ, ການທະຫານໃນອາຊຽນ ກໍ່ຄືລະຫວ່າງ ອາຊຽນກັບ ບັນດາຄູ່ຮ່ວມມື, ທ່ານ ພົນໂທ ຮ່ວາງຊວັນຈ໊ຽນ ໄດ້ສະແດງການສະໜັບສະໜູນຕໍ່ຂໍ້ສະເໜີຂອງ ບຣູໄນ ໃນການແບ່ງປັນຂໍ້ມູນຂ່າວສານ ກ່ຽວກັບການຮ່ວມມືດ້ານປ້ອງກັນຊາດ, ປ້ອງກັນຄວາມສະຫງົບ ໃນພາກພື້ນ ຢູ່ທີ່ການ ເຈລະຈາ ເຈົ້າໜ້າທີ່ ດ້ານການປ້ອງກັນຊາດ ARF (ARF DOD) ທີ່ຜ່ານມາບົນພື້ນຖານສືບຕໍ່ແນວຄວາມຄິດຂອງ ຫວຽດນາມ ໃນປີ 2020.
(ແຫຼ່ງຄັດຈາກ VOV)