ວັນທີ 9 ມັງກອນ, ຢູ່ຮ່າໂນ້ຍ, ທ່ານລັດຖະມົນຕີກະຊວງຕຳຫຼວດ ຫວຽດນາມ ໂຕເລິມໄດ້ມີການພົບປະເຈລະຈາກັບທ່ານລັດຖະມົນຕີກະຊວງປ້ອງກັນຄວາມສະຫງົບ ລາວ ວິໄລ ຫຼ້າຄຳຟອງ ເຊິ່ງພວມຢ້ຽມຢາມ ແລະ ເຮັດວຽກຢູ່ ຫວຽດນາມ.
ທ່ານລັດຖະມົນຕີກະຊວງຕຳຫຼວດ ຫວຽດນາມ ໂຕເລິມ ແລະ ທ່ານລັດຖະມົນຕີກະຊວງປ້ອງກັນຄວາມສະຫງົບລາວ ວິໄລ ຫ້າຄຳຟອງ (ພາບ: VOV)
ທີ່ການພົບປະເຈລະຈາ, ທ່ານລັດຖະມົນຕີກະຊວງຕຳຫຼວດ ຫວຽດນາມ ໂຕເລິມ ແລະ ທ່ານລັດຖະມົນຕີກະຊວງປ້ອງກັນຄວາມສະຫງົບລາວ ວິໄລ ຫ້າຄຳຟອງ ໄດ້ແລກປ່ຽນທິດທາງການຮ່ວມມືຫຼັກໆລະຫວ່າງສອງກະຊວງ. ຕາມນັ້ນແລ້ວ, ສອງຝ່າຍສືບຕໍ່ຮັກສາການພົບປະແລກປ່ຽນຄະນະຜູ້ແທນຂັ້ນສູງລະຫວ່າງສອງກະຊວງ ດ້ວຍຮູບການໂດຍກົງ ແລະ ທາງໄກ, ສົມທົບກັນແກ້ໄຂບັນຫາເກີດໃໝ່ຢ່າງວ່ອງໄວ, ທັນການ, ບໍ່ປະໃຫ້ບັນດາອິດທິກຳລັງເປັນປໍລະປັກ, ອາດຊະຍະກອນເຄື່ອນໄຫວກໍ່ຜົນເສຍຫາຍຕໍ່ຄວາມສະຫງົບປອດໄພ ແລະ ຄວາມເປັນລະບຽບຮຽບຮ້ອຍລະຫວ່າງສອງປະເທດ; ເພີ່ມທະວີການແລກປ່ຽນຂໍ້ມູນຂ່າວສານ ເຊິ່ງສອງຝ່າຍລ້ວນແຕ່ມີຄວາມສົນໃຈ, ໂດຍສະເພາະແມ່ນສະພາບການໂລກ ແລະ ພາກພື້ນ ທີ່ກໍ່ຜົນກະທົບຕໍ່ຄວາມສະຫງົບ, ປອດໄພ ແລະ ຄວາມເປັນລະບຽບຮຽບຮ້ອຍຂອງ ຫວຽດນາມ, ລາວ. ສອງຝ່າຍສົມທົບກັນຜັນຂະຫຍາຍການເຄື່ອນໄຫວສະເຫຼີມສະຫຼອງປີ ສາມັກຄີ ຫວຽດນາມ - ລາວ, ລາວ - ຫວຽດນາມ 2022 ; ສະເຫຼີມສະຫຼອງວັນສ້າງຕັ້ງສາຍພົວພັນທາງການທູດຄົບຮອບ 60 ປີ ແລະ ວັນເຊັນສົນທິສັນຍາ ມິດຕະພາບ ແລະ ການຮ່ວມມື ຫວຽດນາມ - ລາວ ຄົບຮອບ 45 ປີ. ສອງກະຊວງສືບຕໍ່ຮ່ວມມື, ຊ່ວຍເຫຼືອເຊິ່ງກັນແລະກັນໃນວຽກງານປ້ອງກັນ, ຕ້ານໂລກລະບາດໂຄວິດ - 19.
ກ່ອນທີ່ສິ້ນສຸດການພົບປະເຈລະຈາ, ທ່ານລັດຖະມົນຕີກະຊວງຕຳຫຼວດ ຫວຽດນາມ ໂຕເລິມ ແລະ ທ່ານລັດຖະມົນຕີກະຊວງປ້ອງກັນຄວາມສະຫງົບ ລາວ ວິໄລ ຫຼ້າຄຳຟອງ ໄດ້ເປັນສັກຂີພິຍານໃຫ້ກົມກອງທີ່ມີໜ້າທີ່ຮັບຜິດຊອບສອງກະຊວງ ລົງນາມໃນເອກະສານຮ່ວມມືສະບັບຕ່າງໆ.
(ແຫຼ່ງຄັດຈາກ VOV)