ທ່ານນາຍົກລັດຖະມົນຕີໄທ ປຣາຢຸດ ຈັນໂອຊາຕ້ອນຮັບ
ພົນເອກ ໂງຊວນລິກ. ພາບ:TTXVN
ຕອນບ່າຍວັນທີ 22/2 ຢູ່ສຳນັກງານນາຍົກລັດຖະມົນຕີ, ທ່ານນາຍົກລັດຖະມົນຕີ ໄທ ປຣາຢຸດ ຈັນໂອຊາ ໄດ້ໃຫ້ການຕ້ອນຮັບຄະນະຜູ້ແທນການທະຫານຂັ້ນສູງ ຫວຽດນາມ ໂດຍ ພົນເອກ ໂງຊວນລິກ, ຮອງເລຂາຄະນະພັກການທະຫານສູນກາງ, ລັດຖະມົນຕີກະຊວງປ້ອງກັນປະເທດ ນຳຫນ້າ ໄປຢ້ຽມຢາມລາຊະອານາຈັກໄທ ຢ່າງເປັນທາງການແຕ່ວັນທີ 21/--23/2. ລັດຖະມົນຕີ ໂງຊວນລິກ ແຈ້ງໃຫ້ທ່ານນາຍົກລັດຖະມົນຕີ ໄທ ຊາບ ກ່ຽວກັບໝາກຜົນການເຈລະຈາກ່ອນນັ້ນ ລະຫວ່າງກະຊວງປ້ອງກັນປະເທດສອງປະເທດ. ພົນເອກ ໂງຊວນລິກ ເນັ້ນຫນັກວ່າ: ການເພີ່ມທະວີການຮ່ວມມືຮອບດ້ານກັບໄທ, ໃນນັ້ນ ມີຂົງເຂດປ້ອງກັນຊາດ ແມ່ນຫນຶ່ງໃນບັນດາການບຸລິມະສິດຂອງຫວຽດນາມ ແລະ ສະແດງຄວາມປິຕິຊົມຊື່ນກ່ຽວກັບສາຍພົວພັນລະຫວ່າງຫວຽດນາມ ແລະ ໄທ ນັບມື້ນັບພັດທະນາຢ່າງເລິກເຊິ່ງ, ກວ້າງຂວາງ ແລະ ມີປະສິດທິຜົນ. ພົນເອກ ໂງຊວນລິກ ຢືນຢັນວ່າ: ກະຊວງປ້ອງກັນປະເທດ ຫວຽດນາມ ຈະສືບຕໍ່ ຮ່ວມມືຢ່າງແຫນ້ນແຟ້ນ, ມີປະສິດທິຜົນກັບກະຊວງປ້ອງກັນປະເທດ ໄທ ແລະ ປາດຖະຫນາວ່າ ທ່ານນາຍົກລັດຖະມົນຕີ ໄທ ປຣາຢຸດ ຈັນໂອຊາ ຈະສືບຕໍ່ສະຫນັບສະຫນູນ ແລະ ສ້າງເງື່ອນໄຂສະດວກເພື່ອໃຫ້ການພົວພັນດ້ານປ້ອງກັນຊາດສອງປະເທດພັດທະນາ, ປະກອບສ່ວນຊຸກຍູ້ການພົວພັນຄູ່ຮ່ວມມືຍຸດທະສາດລະຫວ່າງສອງປະເທດ.
ທ່ານນາຍົກລັດຖະມົນຕີໄທ ປຣາຢຸດ ຈັນໂອຊາ ຕີລາຄາສູງ ໝາກຜົນການຮ່ວມມືດ້ານປ້ອງກັນຊາດສອງປະເທດໃນໄລຍະຜ່ານມາ ແລະ ຖືວ່າ ໃນສະພາບການປະຈຸບັນ, ກອງທັບສອງປະເທດຄວນເພີ່ມທະວີການຮ່ວມມືກວ່າອີກ ບົນພື້ນຖານຜັນຂະຫຍາຍບັນດາຂົງເຂດຮ່ວມມືທີ່ມີຢູ່ແລ້ວຢ່າງມີປະສິດທິຜົນ ພ້ອມທັງຊອກຫາບັນດາຂົງເຂດໃຫມ່ທີ່ມີຄວາມສາມາດບົ່ມຊ້ອນ ແລະ ຢືນຢັນ: ຈະສະຫນັບສະຫນູນ ແລະ ສ້າງທຸກເງື່ອນໄຂສະດວກເພື່ອໃຫ້ການຮ່ວມມືດ້ານປ້ອງກັນຊາດນັບມື້ນັບ ພັດທະນາ. ທ່ານນາຍົກລັດຖະມົນຕີໄທ ໃຫ້ຮູ້ວ່າ: ຈະຊີ້ນຳບັນດາກະຊວງ, ຂະແຫນງການກ່ຽວຂ້ອງເພີ່ມທະວີການສົມທົບ,ຮ່ວມມືກັບຫວຽດນາມໃນການແກ້ໄຂບັນດາບັນຫາກ່ຽວກັບຊາວປະມົງ, ບົນພື້ນຖານກົດໝາຍສາກົນ ແລະ ການພົວພັນມິດຕະພາບລະຫວ່າງສອງປະເທດ.
(ແຫຼ່ງຄັດຈາກ VOV)