ວັນທີ 01 ສິງຫາ, ກະຊວງສາທາລະນະສຸກ ໄດ້ຈັດຕັ້ງກອງປະຊຸມທາງອອນລາຍກ່ຽວກັບການ ຍົກສູງກໍາລັງຄວາມສາມາດດ້ານວິຊາສະເພາະໃຫ້ແກ່ບັນດາຮາກຖານກວດ ແລະ ປິ່ນປົວພະຍາດໃນວຽກງານຮັບ, ຄຸ້ມຄອງ ແລະ ປິ່ນປົວໃຫ້ແກ່ຄົນເຈັບທີ່ຕິດເຊື້ອໂຄວິດ - 19 ໂດຍມີການເຊື່ອມຕໍ່ກັບ 700 ສະຖານທີ່ຢູ່ 63 ແຂວງ, ນະຄອນ, ເມືອງ, ຕາແສງໃນທົ່ວປະເທດ.
![](https://imagevietnam.vnanet.vn/Upload/2020/8/2/020820201341212723khongdesotdoituongnaolienquandencovidtaidanang_gdwf.jpg)
ທ່ານສາດສະດາຈານ, ປະລິນຍາເອກ ຫງວຽນແທັ່ງລອງ, ຮັກສາການລັດຖະມົນຕີກະຊວງສາທາລະນະສຸກ ຫວຽດນາມ (ພາບ:TTXVN)
ກ່າວຄໍາເຫັນໄຂກອງປະຊຸມ, ທ່ານສາດສະດາຈານ, ປະລິນຍາເອກ ຫງວຽນແທັ່ງລອງ, ຮັກສາການລັດຖະມົນຕີກະຊວງສາທາລະນະສຸກ ຫວຽດນາມ ໃຫ້ຮູ້ວ່າ ນັບແຕ່ເມື່ອກວດພົບກໍລະນີຕິດເຊື້ອຄົນທໍາອິດຢູ່ດ່າໜັງ, ກະຊວງສາທາລະນະສຸກຫວຽດນາມ ໄດ້ຕີລາຄາວ່າ ສະພາບການໂລກລະບາດໂຄວິດ - 19 ຄັ້ງນີ້ແມ່ນມີຄວາມສັບສົນຫຼາຍກວ່າ, ຕ້ອງຮັບມືຕອບສະໜອງໃຫ້ໄວ ແລະ ຮີບດ່ວນກວ່າ. ຈຸດໃຈກາງຂອງໂລກລະບາດໃນຄັ້ງນີ້ແມ່ນຢູ່ໂຮງໝໍ 03 ແຫ່ງຂອງດ່າໜັງ, ຕົ້ນຕໍແມ່ນໂຮງໝໍດ່າໜັງ.
ດ້ວຍຄວາມຕັດສິນໃຈສະກັດກັ້ນ ແລະ ຫຼຸດຜ່ອນກໍລະນີເສຍຊີວິດຍ້ອນໂລກລະບາດໂຄວິດ - 19 ຢູ່ດ່າໜັງໃຫ້ຢູ່ໃນລະດັບຕໍ່າສຸດ, ກະຊວງສາທາລະນະສຸກ ຫວຽດນາມ ໄດ້ມີການເຄື່ອນໄຫວຢ່າງຂ້ຽວຂາດ, ສ້າງຕັ້ງພາກສ່ວນປະຈໍາການພິເສດຂອງກະຊວງ ໄປປະຕິບັດງານຕັ້ງດ່ານສະກັດກັ້ນຢູ່ດ່າໜັງ ເພື່ອຊີ້ນໍາວຽກງານຕິດຕາມກວດກາ ແລະ ເຝົ້າລະວັງກ່ຽວກັບສະພາບການຂອງໂລກລະບາດໂຄວິດ - 19. ກະຊວງສາທາລະນະສຸກ ກໍໄດ້ຮຽກຮ້ອງໃຫ້ທ້ອງຖິ່ນຕ່າງໆສ້າງບັນຊີລາຍຊື່, ຕິດຕາມກວດກາເຝົ້າລະວັງອາການສຸຂະພາບຂອງບັນດາເປົ້າໝາຍດ່ັງກ່າວ, ພ້ອມທັງສົ່ງຂໍ້ຄວາມຕັກເຕືອນ, ແນະນໍາໃຫ້ເຂົາເຈົ້າຕິດຕາມອາການສຸຂະພາບ, ຕິດຕໍ່ກັບອົງການສາທາລະນະສຸກທ້ອງຖິ່ນ ເພື່ອໄດ້ຮັບຄໍາປຶກສາ, ຕິດຕາມກວດກາ ແລະ ກວດ, ວິໄຈຫາເຊື້ອໂຄວິດ - 19 ໃນກໍລະນີທີ່ຈໍາເປັນ.
(ແຫຼ່ງຄັດຈາກ VOV)