ຊາຍແດນ ຫວຽດນາມ - ລາວ ມີລວງຍາວປະມານ 2.337 ກມ, ຕິດກັບ 10 ແຂວງຂອງ ຫວຽດນາມ ແລະ 10 ແຂວງຂອງລາວ
ທ່ານ ເລຮ່ວາຍຈູງ, ຮອງລັດຖະມົນຕີການຕ່າງປະເທດ ຫວຽດນາມ, ຫົວໜ້າຄະນະກຳມະການຊາຍແດນແຫ່ງຊາດ
ໃນການຕອບສຳພາດຕໍ່ວົງການນັກຂ່າວ ເນື່ອງໃນໂອກາດກອງປະຊຸມສະຫລຸບແຜນການສັງລວມປະຕິບັດວຽກງານປັກຫຼັກໝາຍຖີ່ ແລະ ບູລະນະປະຕິສັງຂອນລະບົບຫຼັກໝາຍຊາຍແດນ ຫວຽດນາມ - ລາວ, ທ່ານ ເລຮ່ວາຍຈູງ, ຮອງລັດຖະມົນຕີການຕ່າງປະເທດ ຫວຽດນາມ, ຫົວໜ້າຄະນະກຳມະການຊາຍແດນແຫ່ງຊາດ, ໃຫ້ຮູ້ວ່າ: ຊາຍແດນ ຫວຽດນາມ - ລາວ ມີລວງຍາວປະມານ 2.337 ກມ, ຕິດກັບ 10 ແຂວງຂອງ ຫວຽດນາມ ແລະ 10 ແຂວງຂອງລາວ. ປະຈຸບັນ, ລະບົບຫຼັກໝາຍແຫ່ງຊາດລະຫວ່າງ 2 ປະເທດ ມີ 1002 ຫຼັກໝາຍ ແລະ ມີຫຼັກຂີດໝາຍຢູ່ 905 ທີ່ຕັ້ງ, ເຊິ່ງໄດ້ຮັບຮູ້ລາຍລະອຽດ ໃນອະນຸສັນຍາກ່ຽວກັບຊາຍແດນ ແລະ ຫຼັກໝາຍຊາຍແດນ ຫວຽດນາມ - ລາວ ລົງວັນທີ 16 ມີນາ 2016. ທ່ານຮອງລັດຖະມົນຕີ ເລຮ່ວາຍຈູງ ຢືນຢັນວ່າ: ເຂດຊາຍແດນ ຫວຽດນາມ - ລາວ ມີທີ່ຕັ້ງບົດບາດຍຸດທະສາດສຳຄັນສຳລັບການປ້ອງກັນຄວາມສະຫງົບ ແລະ ເສດຖະກິດສັງຄົມຂອງ 2 ປະເທດ. ເຂດຊາຍແດນມີສະຖຽນລະພາບ ແລະ ພັດທະນາຈະປະກອບສ່ວນເພີ່ມທະວີ ແລະ ປັບປຸງນຳ້ໃຈສາມັກຄີ, ສະໜິດຕິດພັນລະຫວ່າງປະຊາຊົນ ຢູ່ 2 ເຂດຊາຍແດນ, ຊຸກຍູ້ການພັດທະນາເສດຖະກິດ, ວັດທະນະທຳ, ສັງຄົມຂອງບັນດາທ້ອງຖິ່ນ ມີຊາຍແດນຮ່ວມ, ປະກອບສ່ວນສຳຄັນເຂົ້າໃນຄວາມສະຖຽນລະພາບ ແລະ ການພັດທະນາຂອງແຕ່ລະປະເທດ ແລະ ເພີ່ມທະວີນ້ຳໃຈມິດຕະພາບ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ຫວຽດນາມ -ລາວ.
ທ່ານຮອງລັດຖະມົນຕີ ເລຮ່ວາຍຈູງ ໃຫ້ຮູ້ວ່າ: ໄລຍະຈະມາເຖິງ, 2 ປະເທດຈະເພີ່ມທະວີການຮ່ວມມືຢ່າງແໜ້ນແຟ້ນ ໃນວຽກງານຮັກສາຄວາມໝັ້ນຄົງ, ຄວາມເປັນລະບຽບຮຽບຮ້ອຍຢູ່ເຂດຊາຍແດນ; ຍົກສູງສະຕິລະວັງຕົວໃນການຕໍ່ສູ້ປ້ອງກັນ, ຕ້ານອາຊະຍາກຳຂ້າມຊາດ, ທັບມ້າງທຸກໆກົນອຸບາຍມ້າງເພທຳລາຍສອງລັດຂອງບັນດາກຳລັງທີ່ເປັນປໍລະປັກ, ຮັກສາສະຖຽນລະພາບຢູ່ເຂດຊາຍແດນ. ຫວຽດນາມ ແລະ ລາວ ກໍ່ສ້າງກົນໄກ, ນະໂຍບາຍເພີ່ມທະວີດຶງດູດການລົງທຶນພາຍໃຕ້ຫຼາຍຮູບແບບ ເພື່ອແນໃສ່ປັບປຸງ, ຍົກລະດັບພື້ນຖານໂຄງລ່າງດ້ານເຕັກນິກໂດຍໄວ, ພິເສດແມ່ນພື້ນຖານຄົມມະນາຄົມ, ການພັດທະນາເສດຖະກິດ, ການຄ້າ, ວັດທະນະທຳ, ການທ່ອງທ່ຽວເຂດຊາຍແດນ, ຊຸກຍູ້ການພັດທະນາເສດຖະກິດ - ສັງຄົມ.
(ແຫຼ່ງຄັດຈາກ VOV)