ວັນທີ 18 ມີນາ, ບັນດາເຈົ້າໜ້າທີ່ຂັ້ນສູງ ກ່ຽວກັບຄວາມໝັ້ນຄົງ ແລະ ການພົວພັນຕ່າງປະເທດ ອາເມລິກາ ແລະ ຈີນ ໄດ້ເລີ່ມຕົ້ນການພົບປະທີ່ແກ່ຍາວເປັນເວລາ 2 ວັນ ຢູ່ Alaska ເພື່ອປຶກສາຫາລືກ່ຽວກັບບາງບັນຫາໃນການພົວພັນສອງຝ່າຍກໍ່ຄືສາກົນ.
ນີ້ກໍ່ແມ່ນການພົບປະສຳຄັນຄັ້ງທຳອິດລະຫວ່າງສອງປະເທດ ພາຍໃຕ້ອຳນາດການປົກຄອງຂອງ ທ່ານປະທານາທິບໍດີ ອາເມລິກາ Joe Biden ພາຍຫຼັງ 4 ປີທີ່ການພົວພັນສອງຝ່າຍຕົກເຂົ້າສູ່ລະດັບງຕ່ຳທີ່ສຸດ.
ກ່າວຄຳເຫັນເປີດສາກການພົບປະ, ທ່ານ ລັດຖະມົນຕີກະຊວງການຕ່າງປະເທດອາເມລິກາ Blinken ໄດ້ຢັ້ງຢືນວ່າ ວໍຊິງຕັນ ຈະບໍ່ຊອກຫາການປະທະກັນກັບ ປັກກິ່ງ ແຕ່ຈະກຽມພ້ອມໃຫ້ແກ່ການແກ້ງແຍ້ງກັນລະຫວ່າງ ສອງປະເທດມະຫາອຳນາດໃນໂລກ ເທົ່ານັ້ນ. ຕາມທ່ານ Blinken ແລ້ວ, ອາເມລິກາ ຈະປຶກສາຫາລືກ່ຽວກັບບັນດາຄວາມວິຕົກກັງວົນຢ່າງເລິກເຊິ່ງ ຂອງຕົນຕໍ່ບັນດາການກະທຳຂອງ ຈີນ ເຊິ່ງພວມນາບຂູ່ຕໍ່ຄວາມເປັນລະບຽບຮຽບຮ້ອຍບົນຂໍ້ກຳນົດກົດໝາຍ, ກໍ່ຄືບັນດາການກະທຳ ບັງບຽດ ດ້ານເສດຖະກິດຂອງ ປັກກິ່ງ ຕໍ່ບັນດາສຳພັນທະມິດຂອງ ອາເມລິກາ.
ສ່ວນທ່ານ ຢ໊າງເຈ໊ຍຊື໊ ສະມາຊິກສະພາແຫ່ງຊາດ ຈີນ ຖືວ່າ: ອາເມລິກາ ພວມນຳໃຊ້ກຳລັງແຮງດ້ານເສດຖະກິດ ແລະ ການທະຫານເພື່ອສ້າງກຳລັງດັນຕໍ່ປະເທດອື່ນໆ. ທ່ານກໍ່ຢັ້ງຢືນວ່າ ຈີນ ຈະເດັດດ່ຽວຄັດຄ້ານ ອາເມລິກາ ທີ່ແຊກແຊງເຂົ້າວຽກງານພາຍໃນຂອງປະເທດນີ້, ແຕ່ຍັງສະແດງຄວາມຫວັງຢາກໃຫ້ສອງຝ່າຍບໍ່ເກີດມີການປະທະກັນ, ບໍ່ສູ້ຢັນກັນ, ເຄົາລົບນັບຖືເຊິ່ງກັນ ແລະ ກັນ, ຮ່ວມມືກັນເພື່ອຕ່າງຝ່າຍຕ່າງມີໄຊຊະນະ.
(ແຫຼ່ງຄັດຈາກ VOV)