ໃນຂອບເຂດການຢ້ຽມຢາມ ສ.ເກົາຫຼີ ຢ່າງເປັນທາງການໃນລະຫວ່າງວັນທີ 9 ຫາ 11 ກຸມພາ, ຕອນເຊົ້າວັນທີ 10 ກຸມພາ, ທ່ານ ບຸ່ຍແທັງເຊິນ, ລັດຖະມົນຕີການຕ່າງປະເທດ ຫວຽດນາມ ໄດ້ມີການພົບປະສົນທະນາກັບ ທ່ານ Chung Eui Yong, ລັດຖະມົນຕີການຕ່າງປະເທດ ສ.ເກົາຫຼີ.

ທ່ານ ບຸ່ຍແທັງເຊິນ, ລັດຖະມົນຕີການຕ່າງປະເທດ ຫວຽດນາມ ແລະ ທ່ານ Chung Eui Yong, ລັດຖະມົນຕີການຕ່າງປະເທດ ສ.ເກົາຫຼີ (ພາບ: TTXVN)

2 ຝ່າຍໄດ້ເຫັນດີເປັນເອກະພາບຕໍ່ໜ້າທີ່ວຽກງານຈຸດສຸມໃນປີ 2022 ຄືການຜັນຂະຫຍາຍບັນດາການເຄື່ອນໄຫວສະເຫຼີມສະຫຼອງ 30 ປີແຫ່ງວັນສ້າງຕັ້ງການພົວພັນທາງການທູດ, ຍົກລະດັບການພົວພັນ 2 ປະເທດຂຶ້ນເປັນ “ຄູ່ຮ່ວມມືຍຸດທະສາດຮອບດ້ານ”, ຈັດຕັ້ງການຢ້ຽມຢາມ ແລະ ການພົບປະລະຫວ່າງການນຳຂັ້ນສຸງ 2 ປະເທດໃຫ້ເປັນຢ່າງດີ, ຜັນຂະຫຍາຍກົນໄກການຮ່ວມມືທີ່ມີຢູ່ແລ້ວໃຫ້ມີ ປະສິດທິຜົນແນໃສ່ນຳເອົາຜົນປະໂຫຍດທີ່ແທດຈິງມາໃຫ້ 2 ປະເທດ.

ທ່ານລັດຖະມົນຕີການຕ່າງປະເທດ ບຸ່ຍແທັງເຊິນ ຢັ້ງຢືນວ່າ ຫວຽດນາມ ປາດຖະໜາຢາກພັດທະນາການພົວພັນກັບ ສ.ເກົາຫຼີ ຢ່າງເລິກເຊິ່ງກວ້າງຂວາງກວ່າອີກ; ສະເໜີໃຫ້ ສ.ເກົາຫຼີ ສືບຕໍ່ພິຈາລະນາສະໜອງບ້ວງເງິນກູ້ຢືມກ້ອນໃຫຍ່, ສ້າງເງື່ອນໄຂບຸລິມະສິດໃຫ້ແກ່ໂຄງການພື້ນຖານໂຄງລ່າງຂະໜາດໃຫຍ່ ແລະ ໂຄງການໜູນຊ່ວຍການຍົກສູງກຳລັງ ຄວາມສາມາດຮັບມືກັບການປ່ຽນແປງຂອງດິນຟ້າອາກາດ; ສືບຕໍ່ຮ່ວມມືຢ່າງເລິກເຊິ່ງກວ້າງຂວາງທາງດ້ານແຮງງານ, ການທ່ອງທ່ຽວ, ການສຶກສາ ແລະ ການພົວພັນແລກປ່ຽນລະຫວ່າງປະຊາຊົນ… ທ່ານ ບຸ່ຍແທັງເຊິນ ກໍ່ສະເໜີໃຫ້ ສ.ເກົາຫຼີ ສ້າງລະບຽບການຮັບຮອງເອົາ passport ວັກຊິນຂອງ ຫວຽດນາມ ໃຫ້ສຳເລັດໂດຍໄວ, ສືບຕໍ່ໜູນຊ່ວຍ ຫວຽດນາມ ຍົກສູງກຳລັງຄວາມສາມາດປ້ອງກັນ, ຕ້ານໂລກລະບາດໂຄວິດ - 19.

ສ່ວນທ່ານລັດຖະມົນຕີ Chung Eui Yong ໄດ້ຢັ້ງຢືນວ່າ ຫວຽດນາມ ແມ່ນຄູ່ຮ່ວມມືສຳຄັນແຖວໜ້າຂອງ ສ.ເກົາຫຼີ, ພ້ອມທັງຍົກອອກຂໍ້ສະເໜີລະອຽດທີ່ເຮັດໃຫ້ການຮ່ວມມື 2 ຝ່າຍໃນຂົງເຂດການເມືອງ - ການທູດ, ການປ້ອງກັນຊາດ - ປ້ອງກັນຄວາມສະຫງົບ, ເສດຖະກິດ - ການຄ້າ, ການແພດ - ວິທະຍາສາດເຕັກນິກ, ວັດທະນະທຳ ແລະ ການພົວພັນແລກປ່ຽນ ປະຊາຊົນລະຫວ່າງ 2 ປະເທດ.

ລັດຖະມົນຕີ 2 ທ່ານກໍ່ໄດ້ປຶກສາຫາລືກ່ຽວກັບສະພາບການພາກພື້ນ ແລະ ສາກົນ, ເຫັນດີເປັນເອກະພາບເພີ່ມທະວີການສົມທົບກັນຢູ່ກົນໄກ, ເວທີປາໄສຫຼາຍຝ່າຍ, ໂດຍສະເພາະແມ່ນຢູ່ ສປຊ.

(ແຫຼ່ງຄັດຈາກ VOV)