ຫວຽດນາມ ໄດ້ປະຕິບັດສຳເລັດໜ້າທີ່ເປັນປະທານໃນເດືອນມັງກອນ, ມີຫຼາຍວຽກງານເກີດຂຶ້ນ ແລະ ສະພາຄວາມໝັ້ນຄົງສະຫະປະຊາຊາດ ກໍ່ມີປະຕິກິລິຍາຢ່າງວ່ອງໄວ, ມີຄຳຕັດສິນຢ່າງທັນການ.
![](https://imagevietnam.vnanet.vn/Upload/2020/2/2/02022020131416231nhieunuocdanhgiacaovntailhq_jore.jpg)
(ພາບປະກອບ: TTXVN)
ຕອນບ່າຍວັນທີ 31 ມັງກອນ, ຫວຽດນາມ ໄດ້ສິ້ນສຸດໜ້າທີ່ເປັນປະທານສະພາຄວາມໝັ້ນຄົງສະຫະປະຊາຊາດດ້ວຍຜົນສຳເລັດຢ່າງຈົບງາມ, ເປີດສາກໃຫ້ອາຍຸການກຳມະການບໍ່ປະຈຳການສະພາຄວາມໝັ້ນຄົງສະຫະປະຊາຊາດ 2020 – 2021. ເມື່ອຕອບສຳພາດຕໍ່ນັກຂ່າວ VOV, ທ່ານເອກອັກຄະລັດຖະທູດຫວຽດນາມ ດັ້ງດິ່ງກຸ໊ຍ, ຫົວໜ້າຄະນະຜູ້ຕາງໜ້າຫວຽດນາມ ປະຈຳສະຫະປະຊາຊາດ, ເນັ້ນໜັກວ່າ: ຫວຽດນາມ ໄດ້ປະຕິບັດສຳເລັດໜ້າທີ່ເປັນປະທານໃນເດືອນມັງກອນ, ມີຫຼາຍວຽກງານເກີດຂຶ້ນ ແລະ ສະພາຄວາມໝັ້ນຄົງສະຫະປະຊາຊາດ ກໍ່ມີປະຕິກິລິຍາຢ່າງວ່ອງໄວ, ມີຄຳຕັດສິນຢ່າງທັນການ. ພວກເຮົາກໍ່ນຳໃຊ້ບົດບາດເປັນປະທານອາຊຽນ ຢູ່ຮ່າໂນ້ຍ ພ້ອມກັບເປັນປະທານສະພາຄວາມໝັ້ນຄົງສະຫະປະຊາຊາດ ເດືອນ ມັງກອນ 2020 ຢູ່ທີ່ນີ້ ເພື່ອຍົກສູງຄວາມສຳຄັນຂອງການຮ່ວມມືລະຫວ່າງສະຫະປະຊາຊາດ ແລະ ບັນດາອົງການຈັດຕັ້ງຢູ່ພາກພື້ນ ແລະ ເຂດອະນຸພາກພື້ນ, ໃນນັ້ນຖືອາຊຽນ ແມ່ນແບບຢ່າງ. ທ່ານເອກອັກຄະລັດຖະທູດ ດັ້ງດິ່ງກຸ໊ຍ ກໍ່ໃຫ້ຮູ້ວ່າ: ຫວຽດນາມ ຈະກະກຽມໃຫ້ແກ່ການດຳລົງຕຳແໜ່ງເປັນປະທານຄັ້ງຕໍ່ໄປ ໃນເດືອນ ເມສາ 2021 ໃຫ້ເປັນຢ່າງດີ.
“ຂ້າພະເຈົ້າຄິດວ່າມີ 3 ຈຸດ. ທີໜຶ່ງແມ່ນກຳແໜ້ນການຊີ້ນຳຂອງລັດ. ທີສອງແມ່ນມີປະຕິກິລິຍາຢ່າງມີໄຫວພິບ ແລະ ທັນການ. ທີສາມແມ່ນຮັບຟັງທຸກໆປະເທດສະມາຊິກຂອງສະພາຄວາມໝັ້ນຄົງສະຫະປະຊາຊາດ ແລະ ສ້າງຄວາມໄວ້ເນື້ອເຊື່ອໃຈ ແລະ ການຮ່ວມມືຂອງທຸກຄົນໃນສະຫະປະຊາຊາດ ຈຶ່ງແກ້ໄຂໄດ້. ສິ່ງສຳຄັນທີ່ສຸດແມ່ນ ຫວຽດນາມ ໄດ້ຮັບການສະໜັບສະໜູນຂອງທຸກໆປະເທດສະມາຊິກຂອງສະພາຄວາມໝັ້ນຄົງສະຫະປະຊາຊາດ”.
ໃນວັນດຽວກັນ, ເມື່ອຕອບສຳພາດຕໍ່ນັກຂ່າວສຳນັກຂ່າວສານຫວຽດນາມກ່ຽວກັບເຫດການນີ້, ທ່ານ Marc Pecsteen de Buytswerve, ເອກອັກຄະລັດຖະທູດ, ຫົວໜ້າຄະນະຜູ້ຕາງໜ້າປະເທດ ແບນຊິກ ປະຈຳສະຫະປະຊາຊາດ ໃຫ້ຮູ້ວ່າ: ຍາກທີ່ຈະລົງມືປະຕິບັດອາຍຸການທີ່ຕ້ອງດຳລົງຕຳແໜ່ງເປັນປະທານຄືແນວນັ້ນ, ຈະມີສິ່ງທ້າທາຍຫຼາຍຢ່າງ, ແຕ່ເຖິງຢ່າງໃດກໍ່ຕາມ ຫວຽດນາມ ກໍ່ໄດ້ປະຕິບັດສຳເລັດເປັນຢ່າງດີ ແລະ ໄດ້ສ້າງຂີດໝາຍຢ່າງແທດຈິງ ດ້ວຍກອງປະຊຸມປຶກສາຫາລືເປີດກ່ຽວກັບ 75 ປີແຫ່ງວັນກົດບັດສະຫະປະຊາຊາດ, ພິເສດແມ່ນໃນສະພາບທີ່ທັງສະຫະປະຊາຊາດ ກໍຄືໂລກມີຄວາມເຄັ່ງຕຶງຫຼາຍຢ່າງຄືໃນປະຈຸບັນ.
ໃນຂະນະນັ້ນ, ທ່ານ Dian triansyah Djani, ເອກອັກຄະລັດຖະທູດ, ຫົວໜ້າຄະນະຜູ້ຕາງໜ້າປະເທດ ອິນໂດເນເຊຍ ປະຈຳສະຫະປະຊາຊາດ, ໃຫ້ຂໍ້ສັງເກດວ່າ “ເລື່ອງຍົກອອກບັນຫາຮ່ວມມືລະຫວ່າງອາຊຽນ - ສະຫະປະຊາຊາດ ຢູ່ສະພາຄວາມໝັ້ນຄົງສະຫະປະຊາຊາດ ແມ່ນກາລະໂອກາດທີ່ດີ, ມີຄວາມໝາຍສຳຄັນຍິ່ງ”. ທ່ານເອກອັກຄະລັດຖະທູດອິນໂດເນເຊຍ ຢືນຢັນວ່າ, ຫວຽດນາມ ດຳລົງຕຳແໜ່ງປະທານສະພາຄວາມໝັ້ນຄົງສະຫະປະຊາຊາດໄດ້ເປັນຢ່າງດີ ແລະ ສິ່ງດັ່ງກ່າວໄດ້ປະກອບສ່ວນຍົກສູງທີ່ຕັ້ງຂອງອາຊຽນ ຢ່າງເຫັນໄດ້ຊັດ.
(ແຫຼ່ງຄັດຈາກ VOV)