ໂດຍໄດ້ຮັບຄຳເຊື້ອເຊີນຂອງທ່ານພົນໂທ ຟານວັນຢາງ, ເສນາທິການໃຫຍ່ກອງທັບປະຊາຊົນຫວຽດນາມ, ຮອງລັດຖະມົນຕີກະຊວງປ້ອງກັນປະເທດຫວຽດນາມ, ທ່ານພົນໂທ ສຸວອນ ຫຼວງບຸນມີ, ຮອງລັດຖະມົນຕີກະຊວງປ້ອງກັນປະເທດ, ຫົວໜ້າກົມໃຫຍ່ເສນາທິການກອງທັບປະຊາຊົນປະຕິວັດລາວໄດ້ມາຢ້ຽມຢາມຫວຽດນາມຢ່າງເປັນທາງການໃນລະຫວ່າງວັນທີ 13 – 17 ພຶດສະພາ 2018
ທ່ານພົນໂທ ຟານວັນຢາງ ແລະທ່ານພົນໂທສຸວອນ ຫຼວງບຸນມີ ພ້ອມກັບຄະນະຜູ້ແທນຖ່າຍຮູບເປັນທີ່ລະນຶກ
(ພາບ: Duong Giang/TTXVN)
ໃນຕອນເຊົ້າວັນທີ 14 ພຶດສະພາ, ທີ່ສຳນັກງານກະຊວງປ້ອງກັນປະເທດ, ທ່ານ ພົນໂທ ຟານວັນຢາງ ໄດ້ເປັນປະທານການຕ້ອນຮັບທ່ານພົນໂທ ສຸວອນ ຫຼວງບຸນມີ ແລະ ບັນດາສະມາຊິກຄະນະຜູ້ແທນການທະຫານຂັ້ນສູງແຫ່ງ ສປປ.ລາວ. ພາຍຫຼັງພິທີຕ້ອນຮັບ, ທ່ານພົນໂທ ສຸວອນ ຫຼວງບຸນມີ ແລະ ບັນດາສະມາຊິກໃນຄະນະ ໄດ້ເຂົ້າຢ້ຽມຂໍ່ານັບທ່ານພົນເອກ ໂງຊວນລີກ, ລັດຖະມົນຕີກະຊວງປ້ອງກັນປະເທດຫວຽດນາມ.
ແລະກໍໃນຕອນເຊົ້າຂອງວັນດຽວກັນ, ຄະນະຜູ້ແທນການທະຫານຂັ້ນສູງຫວຽດນາມ ໂດຍທ່ານພົນໂທ ຟານວັນຢາງ ເປັນຫົວໜ້າຄະນະ ໄດ້ມີການໂອ້ລົມສົນທະນາກັບຄະນະຜູ້ແທນການທະຫານຂັ້ນສູງແຫ່ງ ສປປ.ລາວ ໂດຍທ່ານ ພົນໂທ ສຸວອນ ຫຼວງບຸນມີ ເປັນຫົວໜ້າຄະນະ. ສອງຝ່າຍໄດ້ເຫັນດີເປັນເອກະພາບ ຈະເພີ່ມທະວີສົມທົບລະຫວ່າງກຳລັງປ້ອງກັນຊາຍແດນ, ກຳລັງຕໍ່ສູ້, ກຳລັງປ້ອງກັນ ແລະ ຕ້ານອາດຊະຍະກຳຂ້າມຊາຍແດນປະເພດຕ່າງໆ ເປັນປະຈຳຢ່າງມີປະສິດທິຜົນ, ພິເສດແມ່ນອາດຊະຍະກຳຄ້າຂາຍຢາເສດຕິດ; ຜັນຂະຫຍາຍວຽກງານບຳລຸງສ້າງຖັນແຖວພະນັກງານ, ນັກຊ່ຽວຊານການທະຫານ; ຝຶກອົບຮົມວຽກງານພັກ, ວຽກງານການເມືອງ; ຝຶກອົບຮົມເພື່ອຮັບປະກັນດ້ານການພະລາທິການ ແລະເຕັກນິກ ສືບຕໍ່ໄດ້ຮັບການຜັນຂະຫຍາຍຢ່າງມີປະສິດທິຜົນ; ພົບປະແລກປ່ຽນບົດຮຽນ, ໜູນຊ່ວຍເຊິ່ງກັນແລະກັນໃນວຽກງານການກໍ່ສ້າງແຫຼ່ງກຳລັງ ແລະ ຍົກສູງຄວາມຮູ້ຄວາມສາມາດກຽມພ້ອມສູ້ຮົບຂອງກອງທັບເປັນປະຈຳ.
(ແຫຼ່ງຄັດຈາກ VOV)