ທ່ານລັດຖະມົນຕີກະຊວງຕຳຫຼວດ ຫວຽດນາມ ໂຕເລິມ (ພາບ: TTXVN)  

ກຳລັງກູ້ໄພກູ້ຊີບ ຫວຽດນາມ ທີ່ໄປຕວັກກີ ແມ່ນບັນດາພະນັກງານ, ນາຍທະຫານ ແລະ ຕຳຫຼວດວິຊາສະເພາະ ຂອງກອງທັບ ແລະ ຕຳຫຼວດ. ເຂົາເຈົ້າໄດ້ປະຕິບັດສຳເລັດທຸກວຽກງານກະກຽມໃນໄລຍະເວລາສັ້ນທີ່ສຸດ ເພື່ອເດີນທາງໄປປະຕິບັດວຽກງານກູ້ໄພກູ້ຊີບ ແລະ ໜູນຊ່ວຍມະນຸດສະທຳ.

ຄວາມຮັບຜິດຊອບໃນການແກ້ໄຂບັນດາບັນຫາສາກົນ

ກຳລັງຂອງກອງທັບ ຫວຽດນາມ ເຂົ້າຮ່ວມການກູ້ໄພກູ້ຊີບຢູ່ ຕວັກກີລວມມີ 76 ຄົນ ໃນນັ້ນມີນັກຮົບເສນາຮັກ ສັງກັດກົມໃຫຍ່ພະລາທິການ36 ຄົນ, ມີ ກຸ່ມກູ້ໄພກູ້ຊີບການພັງທະລາຍ ຂຶ້ນກັບເຫຼົ່າຮົບທະຫານຊ່າງ, ກອງບັນຊາການ 30 ຄົນ. ນອກຈາກນັ້ນຍັງມີ ກົມກອງໝາກວິຊາການຮັບໃຊ້ການຊອກຫາກູ້ໄພກູ້ຊີບຂຶ້ນກັບກອງບັນຊາການທະຫານປ້ອງກັນຊາຍແດນອີກດ້ວຍ. ໄປຄຽງຄູ່ກັນນັ້ນ, ວັດຖຸອຸປະກອນ 42 ໂຕນກໍ່ໄດ້ຮັບການລະດົມເພື່ອໜູນຊ່ວຍວຽກງານກູ້ໄພກູ້ຊີບ. ທ່ານລັດຖະມົນຕີກະຊວງຕຳຫຼວດ ຫວຽດນາມ ໂຕເລິມໃຫ້ຮູ້ວ່າ:

ໂດຍເລີ່ມມາຈາກການພົວພັນອັນດີງາມລະຫວ່າງ ຫວຽດນາມ ແລະ ຕວັກກີ ເວົ້າລວມ ແລະ ການພົວພັນລະຫວ່າງກະຊວງຕຳຫຼວດ ກັບບັນດາອົງການປະຕິບັດກົດໝາຍຂອງຕວັກກີເວົ້າສະເພາະ, ເພື່ອປະກອບສ່ວນແບ່ງປັນຄວາມຫຍຸ້ງຍາກເຊິ່ງ ຕວັກກີພວມປະສົບ, ກະຊວງໄດ້ຈັດສົ່ງຄະນະປະຕິບັດງານໄປຍັງຕວັກກີ ດ້ວຍເປົ້າມາຍໜູນຊ່ວຍການກູ້ໄພກູ້ຊີບ, ໜູນຊ່ວຍການຊອກຫາ ແລະ ສະໜອງການໜູນຊ່ວຍມະນຸດສະທຳຢ່າງວ່ອງໄວ ແລະ ຕັ້ງໜ້າທີ່ສຸດ.

ພາຍຫຼັງໄປຮອດຕວັກກີ, ຜ່ານຜ່າສະພາບດິນຟ້າອາກາດຮ້າຍແຮງ, ກຳລັງກູ້ໄພກູ້ຊີບ ຫວຽດນາມ ໄດ້ເຂົ້າຮ່ວມການເຄື່ອນໄຫວກູ້ໄພກູ້ຊີບ ພ້ອມກັບພະນັກງານກູ້ໄພກູ້ຊີບກ່ວາ 8000 ຄົນຂອງສາກົນ. ບໍລິເວນເຄື່ອນໄຫວຂອງກຳລັງກູ້ໄພກູ້ຊີບ ຫວຽດນາມ ໃນປັດຈຸບັນແມ່ນບາງສະຖານທີ່ຢູ່ນະຄອນ Adiyaman , ຕາແສງ Haci Omer Alpagot, ເມືອງ Antakya, ແຂວງ Hatay, ໜຶ່ງໃນບັນດາແຂວງໄດ້ຮັບຜົນສະທ້ອນຢ່າງໜັກໜ່ວງທີ່ສຸດຈາກເຫດແຜ່ນດິນໄຫວ. ທ່ານພັນໂທ ຟ້ານເຈິ່ນຈຸງ, ຮອງຫົວໜ້າພະແນກບາດເຈັບສັນຍະກຳ ໂຮງໝໍເສນາຮັກ 354 ແບ່ງປັນວ່າ:

ຄະນະໄດ້ຮັບໜ້າທີ່ຕ້ອນຮັບ, ປິ່ນປົວ ຜູ້ປະສົບເຄາະຮ້າຍໝົດທຸກຄົນ ໃນເຫດແຜ່ນດິນໄຫວຢູ່ຕວັກກີ. ພວກຂ້າພະເຈົ້າໄດ້ຊາບຊຶມຕ້ອງປະຕິບັດໃຫ້ສຳເລັດໜ້າທີ່ ໃນບໍ່ວ່າສະພາບການໃດຢ່າງເດັດຂາດ.

ຕາມທ່ານພັນເອກ ຫງວຽນມິງເຄືອງ, ຫົວໜ້າຄະນະປະຕິບັດງານກູ້ໄພກູ້ຊີບກະຊວງຕຳຫຼວດແລ້ວ, ຄະນະກູ້ໄພກູ້ຊີບ ຫວຽດນາມ ໄດ້ນຳໃຊ້ວັດຖຸອຸປະກອນວິຊາການສະເພາະທີ່ໄດ້ນຳມາຈາກຫວຽດນາມ. ນັ້ນແມ່ນ ອຸປະກອນເຈາະເບຕົງ, ອຸປະກອນກວດຊອກຫາຜູ້ປະສົບເຄາະຮ້າຍຈາກຄືນຣາດາ, ກໍ່ຄືອຸປະກອນກວດຊອກຫາຜູ້ປະສົບເຄາະຮ້າຍດ້ວຍກ້ອງຖ່າຍ ແລະ ສຽງ. ນອກຈາກນັ້ນ, ຄະນະກູ້ໄພກູ້ຊີບ ຫວຽດນາມ ໄດ້ມອບຢຸກຢາສຸກເສີນ, ຢຸກຢາຈຳເປັນ, ວັດຖຸອຸປະກອນການແພດ, ຕູບ, ຄ້າຍ ນຳໃຊ້ຢູ່ສະໜາມໃຫ້ແກ່ຕວັກກີ.

  ທ່ານເອກອັກຄະລັດຖະທູດ ຫວຽດນາມ ປະຈຳ ຕວັກກີ, ໂດເຊີນຫ໋າຍ (ພາບ: Anadolu Agency)  

ສາກົນຕີລາຄາສູງການເປັນມືອາຊີບ, ສຸດຈິດສຸດໃຈຂອງຄະນະກູ້ໄພກູ້ຊີບ ຫວຽດນາມ

ຄວາມສຸດຈິດສຸດໃຈ ແລະ ເປັນມືອາຊີບຂອງ ບັນດາສະມາຊິກຄະນະກູ້ໄພກູ້ຊີບ ຫວຽດນາມ ໄດ້ຮັບການຕີລາຄາສູງຈາກກຳລັງກູ້ໄພກູ້ຊີບຕວັກກີ ແລະ ສາກົນ.ມີປະຊາຊົນຕວັກກີຫຼາຍຄົນ, ເຊິ່ງແມ່ນຜູ້ຫາກໍ່ຜ່ານຜ່າເຫດແຜ່ນດິນໄຫວທີ່ຮ້າຍແຮງ ໄດ້ຊອກຫາມາພົບ ແລະ ສະແດງຄວາມຂອບອົກຂອບໃຈຕໍ່ໜ່ວຍກູ້ໄພກູ້ຊີບ ຫວຽດນາມ ຍ້ອນວ່າໃນຊຸມວັນຜ່ານມາໄດ້ມີໜ້າຊ່ວຍເຫຼືອ, ຊອກຫາຜູ້ປະສົບເຄາະຮ້າຍທີ່ຖືກຖົມຕິດຄ້າງໃນຊາກຫັກພັງ. ເມື່ອພົບປະກັບສະມາຊິກຂອງຄະນະ, ເຂົາເຈົ້າຍາມໃດກໍ່ເອົາມືຂວາປະແປະໜ້າເອິກຊາຍ ເພື່ອສະແດງຄວາມຮູ້ບຸນຄຸນຕໍ່ບັນດາກຳລັງກູ້ໄພກູ້ຊີບ ຫວຽດນາມ. ທ່ານເອກອັກຄະລັດຖະທູດ ຫວຽດນາມ ປະຈຳ ຕວັກກີ, ໂດເຊີນຫ໋າຍ ໃຫ້ຮູ້ວ່າ:

ເມື່ອເຫັນຄະນະ ຫວຽດນາມມາ ພ້ອມກັບວັດຖຸອຸປະກອນ ແລະ ເຄື່ອງຊ່ວຍເຫຼືອ, ຝ່າຍປະເທດຕວັກກີຮູ້ສຶກຕື້ນຕັນໃຈຫຼາຍ. ຂ້າພະເຈົ້າກໍ່ເນັ້ນໜັກວ່າ ນີ້ແມ່ນຄັ້ງທຳອິດ ທີ່ຄະນະກູ້ໄພກູ້ຊີບຂອງ ຫວຽດນາມ ໄດ້ມາໄກຄືແນວນີ້, ໃນເງື່ອນໄຂວດິນຟ້າອາກາດຮ້າຍແຮງ, ຫວຽດນາມ ໄດ້ຜ່ານຜ່າທຸກສິ່ງທຸກຢ່າງ ເພື່ອເຂົ້າຮ່ວມການເຄື່ອນໄຫວນີ້. ປະເທດເພື່ອນໄດ້ຕີລາຄາສູງທີ່ສຸດ ແລະ ມາຮອດປັດຈຸບັນ, ພວກຂ້າພະເຈົ້າມີຄວາມເອກອ້າງທະນົງໃຈຕໍ່ການເຄື່ອນໄຫວຜັນຂະຫຍາຍຢ່າງທັນການ ແລະ ສຸດຈິດສຸດໃຈ ຂອງ ຫວຽດນາມ.

ທ່ານພົນຕີ ໂຕເອິນໂຊ, ໂຄສົກກະຊວງຕຳຫຼວດ ຫວຽດນາມ ໃຫ້ຮູ້ວ່າ:

ຄະນະໄດ້ເດີນທາງພາຍຫຼັງຮັບຄຳສັ່ງພຽງ 2 – 3 ຊົ່ວໂມງ, ນີ້ເປັນການພິສູດໃຫ້ເຫັນລັກສະນະມີວິໄນ, ລັກສະນະເປັນມືອາຊີບສູງທີ່ສຸດຂອງກຳລັງກູ້ໄພກູ້ຊີບ ຫວຽດນາມ. ຜ່ານການເຄື່ອນໄຫວນີ້, ບັນດາທູດມະນຸດສະທຳ, ທູດສັນຕິພາບ ຂອງ ຫວຽດນາມ ຈະສ້າງພາບພົດທີ່ດີງາມໃນດວງໃຈຂອງປະຊາຊົນຕວັກກີ ກໍ່ຄືເພື່ອນມິດສາກົນ.

ຫວຽດນາມ ໄດ້ ແລະ ພວມຈັດສົ່ງຊັບພະຍາກອນມະນຸດໄປເຂົ້າຮ່ວມກຳລັງຮັກສາສັນຕິພາບ ຂອງ ສປຊ, ແລະ ປັດຈຸບັນ, ສືບຕໍ່ຈັດສົ່ງກຳລັງເຂົ້າຮ່ວມການກູ້ໄພກູ້ຊີບ, ໜູນຊ່ວຍຜູ້ປະສົບເຄາະຮ້າຍຈາກເຫດແຜ່ນດິນໄຫວຢູ່ ຕວັກກີ. ບັນດາການກະທຳອັນສູງສົ່ງນີ້ໄດ້ເສີມຂະຫຍາຍມູນເຊື້ອຮັກແພງອູ້ມຊູຊ່ວຍເຫຼືອເຊິ່ງກັນແລະກັນຂອງຊາດ ຫວຽດນາມ, ເພີ່ມທະວີນ້ຳໃຈສາມັກຄີສາກົນ, ເຮັດໃຫ້ພາບພົດຫວຽດນາມໃນຄວາມພ້ອມຮ່ວມແຮງຮ່ວມໃຈເຂົ້າຮ່ວມແກ້ໄຂບັນດາບັນຫາສາກົນ ເພີ່ມຄວາມງາມຫຼາຍຂຶ້ນ.