ຕາມເວັບໄຊ ສິຖິຕິ worldometers.info ແລ້ວ, ໄລ່ຮອດ 8 ໂມງ ເຊົ້າຂອງວັນທີ 6 ເມສາ (ຕາມເວລາຫວຽດນາມ), ຍອດຈຳນວນຜູ້ຕິດເຊື້ອພະຍາດໂຄວິດ - 19 ໃນທົ່ວໂລກ ແມ່ນ 1.272.860 ຄົນ, ຈຳນວນຜູ້ເສຍຊີວິດທັງໝົດແມ່ນ 69.424 ຄົນ, ໃນນັ້ນ ຈຳນວນຜູ້ຕິດເຊື້ອທີ່ໄດ້ຮັບການປິ່ນປົວຫາຍດີເປັນປົກກະຕິ ແມ່ນ 261.835 ຄົນ. ໂລກລະບາດດັ່ງກ່າວ ໄດ້ແຜ່ລະບາດອອກສູ່ 208 ປະເທດ ແລະ ເຂດແຄວ້ນໃນໂລກ.
ປັດຈຸບັນ, ອີຕາລີ ແມ່ນປະເທດ ທີ່ມີຈຳນວນຜູ້ເສຍຊີວິດຫຼາຍທີ່ສຸດໃນໂລກ ດ້ວຍ 15.887 ກໍລະນີ. ແອັດສະປາຍໄດ້ຢັ້ງຢືນມີຈໍານວນຜູ້ເສຍຊີວິດຫຼາຍອັນດັບ 2 ໃນໂລກ ດ້ວຍ 12.641 ຄົນ ໃນຈຳນວນ 131.646 ກໍລະນີຕິດເຊື້ອ. ຢຶນອັນດັບທີ 3 ກ່ຽວກັບຈຳນວນຜູ້ເສຍຊີວິດແມ່ນ ອາເມລິກາ ດ້ວຍ ຈຳນວນ 9.616 ກໍລະນີ ໃນຈຳນວນ 336.673 ກໍລະນີຕິດເຊື້ອ, ຖັດມາແມ່ນ ຝລັ່ງ ເມື່ອຢັ້ງຢືນມີ 8.078 ກໍລະນີເສຍຊີວິດໃນຈຳນວນ 92.839 ກໍລະນີຕິດເຊື້ອ, ສ່ວນຢູ່ອັງກິດມີ 81.669 ກໍລະນີຕິດເຊື້ອ ໃນນັ້ນ ມີ 4.934 ກໍລະນີເສຍຊີິວິດ.
ຢູ່ ອາຊີ, ຈີນ ເຊິ່ງເປັນບ່ອນກຳເນີດໂລກລະບາດ ໄດ້ຢັ້ງຢືນມີຜູ້ຕິດເຊື້ອໃໝ່ຕື່ມອີກ 39 ຄົນ, ໃນນັ້ນ 38 ກໍລະນີ ແມ່ນຊາວຕ່າງປະເທດເຂົ້າເມືອງ ແລະ 1 ກໍລະນີ ແມ່ນຢູ່ແຂວງ ກວາງຕຸງ.
ຢູ່ ອາຟະລິກາ, ສູນຄວບຄຸມ, ປ້ອງກັນ ແລະ ສະກັດກັ້ນໂລກລະບາດ ອາຟະລິກາ ໃຫ້ຮູ້ວ່າ ຈຳນວນຜູ້ເສຍຊີວິດຢູ່ທະວີບນີ້ ແມ່ນ 360 ຄົນ ແລະ ຈໍານວນຜູ້ຕິດເຊື້ອເພີ່ມຂຶ້ນເປັນ 8.536 ຄົນ. ໂລກລະບາດໂຄວິດ - 19 ໄດ້ແຜ່ລະບາດອອກສູ່ 50 ປະເທດ ຢູ່ທະວີບນີ້, ໃນນັ້ນຫຼາຍທີ່ສຸດແມ່ນຢູ່ ອາຟະລິກາໃຕ້ ດ້ວຍຈໍານວນຜູ້ຕິດເຊື້ອແມ່ນ 1.655 ກໍລະນີ.
(ແຫຼ່ງຄັດຈາກ VOV)