ທ່ານ ຄຸ້ງແຊວຢູງ ເອກອັກຄະລັດຖະທູດຈີນ ປະຈຳຫວຽດນາມ
ພາບ:(qdnd.vn)
ຕອນຄ່ຳວັນທີ 9/1 ຢູ່ ຮ່າໂນ້ຍ, ຄະນະກຳມະການປະຊາຊົນນະຄອນ ຮ່າໂນ້ຍ ໄດ້ສົມທົບກັບສະຖານທູດ ຈີນ ປະຈຳຫວຽດນາມ ຈັດຕັ້ງງານລ້ຽງສະເຫລີມສະຫລອງ 67 ປີແຫ່ງວັນສ້າງຕັ້ງສາຍພົວພັນທາງການທູດລະຫວ່າງຫວຽດນາມ ແລະ ຈີນ (18/1/1950-18/1/2017). ກ່າວຄຳເຫັນນະພິທີ, ທ່ານ ຫງວຽນຈີຢູງ, ລັດຖະມົນຕີກະຊວງແຜນການ ແລະ ການລົງທຶນຫວຽດນາມ ຢືນຢັນວ່າ: ພັກ, ລັດ ແລະ ປະຊາຊົນ ຫວຽດນາມ ຖືການພັດທະນາການພົວພັນຖານບ້ານໃກ້ເຮືອນຄຽງ ແລະ ການຮ່ວມມືຮອບດ້ານກັບພັກ, ລັດ ແລະ ປະຊາຊົນຈີນເປັນສຳຄັນ. ຫວຽດນາມ ແລະ ຈີນພ້ອມແລ້ວ ຊຸກຍູ້ການພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ - ຈີນ ໃຫ້ພັດທະນາຢ່າງບໍ່ຢຸດຢັ້ງ, ມີສະຖຽນລະພາບ, ໝັ້ນຄົງ, ປະກອບສ່ວນຢ່າງຕັ້ງຫນ້າໃຫ້ແກ່ສັນຕິພາບ, ສະຖຽນລະພາບ ແລະ ການພັດທະນາຂອງພາກພື້ນ ແລະ ໂລກ.
ສ່ວນທ່ານເອກອັກຄະລັດຖະທູດຈີນ ປະຈຳຫວຽດນາມ ຄຸ້ງແຊວຢູງ ໄດ້ທົບທວນຄືນບັນດາຜົນງານບັນລຸໄດ້ຂອງການພົວພັນລະຫວ່າງສອງປະເທດໃນ 67 ປີຜ່ານມາ. ທ່ານ ຄຸ້ງແຊວຢູງ ຢືນຢັນວ່າ: ຈີນ ຖືການພັດທະນາການພົວພັນມິດຕະພາບກັບຫວຽດນາມ ເປັນສຳຄັນ, ພ້ອມກັບຝ່າຍຫວຽດນາມ ຊຸກຍູ້ການພົວພັນຄູ່ຮ່ວມມືຍຸດທະສາດຮອບດ້ານ.
(ແຫຼ່ງຄັດຈາກ VOV)