ໃນຊຸມປີຜ່ານມາ, ຈຳນວນຊາວຫວຽດນາມ ໄປຕ່າງປະເທດໄດ້ເພີ່ມຂຶ້ນຢ່າງບໍ່ຢຸດຢັ້ງ ແລະ ມີຫຼາຍພາກສ່ວນ ໄດ້ວາງອອກບັນດາຄວາມຫຍຸ້ງຍາກ, ສິ່ງທ້າທາຍໃຫ້ແກ່ວຽກງານປົກປ້ອງພົນລະເມືອງ.
ທ່ານຮອງລັດຖະມົນຕີການຕ່າງປະເທດຫວຽດນາມ ໂຕແອັງຢຸງ
(ພາບ: TTXVN)
ໃນບົດຂຽນກ່ອນກ້າວເຂົ້າສູ່ບຸນເຕັດປີ 2021, ທ່ານຮອງລັດຖະມົນຕີການຕ່າງປະເທດຫວຽດນາມ ໂຕແອັງຢຸງ ໃຫ້ຮູ້ວ່າ: ໃນຊຸມປີຜ່ານມາ, ຈຳນວນຊາວຫວຽດນາມ ໄປຕ່າງປະເທດໄດ້ເພີ່ມຂຶ້ນຢ່າງບໍ່ຢຸດຢັ້ງ ແລະ ມີຫຼາຍພາກສ່ວນ ໄດ້ວາງອອກບັນດາຄວາມຫຍຸ້ງຍາກ, ສິ່ງທ້າທາຍໃຫ້ແກ່ວຽກງານປົກປ້ອງພົນລະເມືອງ. ພິເສດ, ປີ 2020, ເມື່ອໂລກລະບາດໂຄວິດ-19 ແຜ່ລະບາດຂຶ້ນແບບບໍ່ເຄີຍມີມາກ່ອນ, ໄດ້ຮຽກຮ້ອງໃຫ້ວຽກງານປົກປ້ອງພົນລະເມືອງໄດ້ຍົກລະດັບຂຶ້ນສູ່ລະດັບສູງໃໝ່ ເມື່ອຫວຽດນາມ ຜັນຂະຫຍາຍການຊ່ວຍເຫຼືອພົນລະເມືອງຫວຽດນາມ ອາໄສຢູ່ຕ່າງປະເທດນັບພັນໆຄົນຮັບປະກັນຊີວິດການເປັນຢູ່, ປົກປ້ອງຊີວິດອິນຊີ, ສັບຊົມບັດ, ບັນດາສິດທິຜົນປະໂຫຍດອັນຊອບທຳຂອງພົນລະເມືອງ.
ດ້ວຍຈິດໃຈຄືດັ່ງທ່ານນາຍົກລັດຖະມົນຕີຫວຽດນາມ ຫງວຽນຊວັນຟຸກ ເຄີຍເວົ້າວ່າ “ບໍ່ໃຫ້ຜູ້ໃດຖືກປະໄວ້ຢູ່ທາງຫຼັງ”, ບັນດາອົງການທີ່ມີໜ້າທີ່ຂອງຫວຽດນາມ, ອົງການຕ່າງໜ້າຫວຽດນາມ ປະຈຳຕ່າງປະເທດໄດ້ ແລະ ພວມສົມທົບກັບບັນດາບໍລິສັດການບິນຢູ່ພາຍໃນປະເທດ ແລະ ຕ່າງປະເທດຢ່າງແໜ້ນແຟ້ນ ເພື່ອຈັດບັນດາຖ້ຽວບິນສົ່ງພົນລະເມືອງຫວຽດນາມ ກັບເມືອປະເທດດ້ວຍຄວາມປອດໄພ.
ທ່ານຮອງລັດຖະມົນຕີ ໂຕແອັງຢຸງ ເນັ້ນໜັກວ່າ, ໃນໄລຍະຈະມາເຖິງ, ວຽກງານນຳພົນລະເມືອງຫວຽດນາມ “ຖືກຕິດຄ້າງ” ຢູ່ຕ່າງປະເທດຈະໄດ້ຮັບການເພີ່ມທະວີ, ຍູ້ແຮງ, ມານະພະຍາຍາມຢ່າງສຸດຂີດ ເພື່ອຕ້ອບສະໜອງຄວາມມຸ່ງມາດປາດຖະໜາກັບເມືອປະເທດຢ່າງຊອບທຳຂອງພົນລະເມືອງ, ບົນພື້ນຖານເໝາະສົມກັບສະພາບການການຜັນແປຂອງໂລກລະບາດຢູ່ພາຍໃນ ແລະ ຕ່າງປະເທດ ກໍຄືຮັບປະກັນວຽກງານປ້ອງກັນ, ສະກັດກັ້ນໂລກລະບາດ ແລະ ກຳລັງຄວາມສາມາດແຍກຕົວຢູ່ບັນດາທ້ອງຖິ່ນ.
(ແຫຼ່ງຄັດຈາກ VOV)