ຂ່າວພາບ ຫວຽດນາມ ພາກ ພາສາ ລາວ

ວັດທະນະທຳ

ປະທັບໃຈພິທີໄຫວ້ບູຊາ ບັນພະບຸລຸດອາຊີບຢູ່ ເຫວ້

10/07/2023

ໃນຂອບເຂດງານມະໂຫລານ ອາຊີບມູນເຊື້ອ ເຫ້ວ ປີ 2023, ຢູ່ສວນສາທາລະນະ ຕືເຕື້ອງ ຢູ່ແຄມແມ່ນ້ຳ ເຮືອງ, ນະຄອນ ເຫ້ວ, ໄດ້ດຳເນີນພິທີໄຫວ້ບູຊາ ບັນພະບຸລຸດ ອາຊີບ ແລະ ຂະບວນແຫ່ເພື່ອເຊີດຊູ ນາຍຊ່າງ, ໝູ່ບ້ານອາຊີບມູນເຊື້ອ ຫວຽດນາມ. ນີ້ແມ່ນໜຶ່ງ ໃນບັນດາເຫດການຕົ້ນຕໍ ຂອງງານມະໂຫລານ; ໄດ້ຮັບການຈັດຕັ້ງຢ່າງສະຫງ່າງາມ, ເຂັ້ມຂຸ້ນໄປດ້ວຍພິທີກຳ ແລະ ວັດທະນະ ທຳ ເຫ້ວ, ຊຶ່ງໄດ້ສ້າງຄວາມປະທັບໃຈ ອັນດີງາມໃຫ້ແກ່ ທ່ານຜູ້ຊົມ.

ພິທີໄຫວ້ບູຊາບັນພະບຸລຸດ ອາຊີບ ແມ່ນພິທີເພື່ອລະນຶກເຖິງຄຸນງາມ ຄວາມດີ ຂອງ ບັນພະບຸລຸດ, ຜູ້ໃຫ້ອາຊີບມູນເຊື້ອ ຂອງຊາວ ຫວຽດ ນາມ ຢ່າງເປີດເຜີຍ, ທັງເປັນການອະທິດຖານໃຫ້ແກ່ການດຳເນີນທຸລະກິດ, ການຜະລິດໄດ້ຮັບໂຊກລາບ, ຈະເລີນເຕີບໂຕ ແລະ ຮັ່ງມີ.

ພາຍຫຼັງພິທີໄຫວ້ບູຊາ ບັນພະບຸລຸດ ອາຊີບ ແມ່ນຂະບວນແຫ່ ເພື່ອເຊີດຊູ ນາຍຊ່າງ, ໝູ່ບ້ານອາຊີບມູນເຊື້ອ ຫວຽດນາມ ດ້ວຍການເຂົ້າຮ່ວມ ຂອງບັນດານັກສິລະປິນ ແລະ ນັກສິລະປະກອນ 350 ກວ່າຄົນ ໃນຊຸດອາພອນ ພື້ນເມືອງ ທີ່ມີສີສັນຫຼາກຫຼາຍ ທີ່ມາຈາກ 69 ໝູ່ບ້ານ ອາຊີບ, ພື້ນຖານຜະລິດ, ດ້ວຍບັນດາສະຫຼຽງ ບັນພະບຸລຸດ ອາຊີບ, ວົງດົນຕີ, ຄ້ອງ, ກອງ, ທຸງປີວ, ຄະນະ ຟ້ອນມັງກອນ.

ຂະບວນແຫ່ ເລີ່ມຈາກສວນສາທາລະນະ ຕືເຕື້ອງ, ຂ້າມຂົວ ຈ່າງ ຕ່ຽນ ໄປຕາມຖະໜົນ ເຈິ່ນຮຶງດ້າວ, ຜ່ານຂົວ ຟູຊວນ, ຖະໜົນ ເລເລີ້ຍ ແລະ ມາເຖິງເວທີສະແດງ ສິລະປະ ເບຍກວກຮອກ.

ຂະບວນແຫ່ ໄດ້ດຶງດູດຊາວເມືອງ ເຫ້ວ ແລະ ນັກທ່ອງທ່ຽວ ເຂົ້າຮ່ວມ ແລະ ສະໜັບສະໜູນ ນັບເປັນຈຳນວນຫຼວງຫຼາຍ.

ພິທີໄຫວ້ບູຊາ ບັນພະບຸລຸດ ອາຊີບ ແລະ ຂະບວນແຫ່ເພື່ອເຊີດຊູ ນາຍຊ່າງ, ໝູ່ບ້ານອາຊີບມູນເຊື້ອ ຫວຽດນາມ ໄດ້ຈັດຂຶ້ນຢູ່ສວນສາທາລະນະ ຕືເຕື້ອງ ຢູ່ແຄມແມ່ນ້ຳ ເຮືອງ, ນະຄອນ ເຫ້ວ. ພາບ: ແທງຢາງ/VNP