ທ່ານຮອງນາຍົກລັດຖະມົນຕີ ຜູ້ປະຈຳການລັດຖະບານ ຫວຽດນາມ ຟ້າມບິງມິງ ຫາກໍ່ລົງນາມຂໍ້ຕົກລົງວ່າດ້ວຍການອະນຸມັດແຜນການປະຕິບັດສັນຍາຄູ່ຮ່ວມມືດ້ານເສດຖະກິດຮອບດ້ານໃນພາກພື້ນ (ສັນຍາ RCEP).
ແຜນການໄດ້ແບ່ງໜ້າທີ່, ຄວາມຮັບຜິດຊອບໃຫ້ແກ່ບັນດາອົງການ, ອົງການຈັດຕັ້ງທີ່ກ່ຽວຂ້ອງ, ຕົກລົງມາດຕະການຊີ້ນຳ, ບໍລິຫານ ແລະ ບັນດາມາດຕະການຕ່າງໆເພື່ອຜັນຂະຫຍາຍສັນຍາສະບັບນີ້ຢ່າງຄົບຖ້ວນ ແລະ ມີປະສິດທິຜົນ.
ຕາມນັ້ນແລ້ວ, ບັນດາກະຊວງ, ອົງການທຽບເທົ່າກະຊວງ, ອົງການຂຶ້ນກັບລັດຖະບານ, ຄະນະກຳມະການປະຊາຊົນ ບັນດາແຂວງ, ນະຄອນ ຂຶ້ນກັບສູນກາງຜັນຂະຫຍາຍ, ເຜີຍແຜ່ໂຄສະນາ ກ່ຽວກັບສັນຍາ RCEP ແລະ ບັນດາເອກະສານນິຕິກຳທີ່ກ່ຽວຂ້ອງເຖິງບັນດາເປົ້າໝາຍ, ເປັນຕົ້ນແມ່ນ ບັນດາເປົ້າໝາຍທີ່ອາດຈະໄດ້ຮັບຜົນກະທົບ. ສ້າງສູນຮັບຂໍ້ມູນຂ່າວສານກ່ຽວກັບ RCEP ຢູ່ ກະຊວງອຸດສາຫະກຳ ແລະ ການຄ້າ ຫວຽດນາມ ເພື່ອສະໜອງຂໍ້ມູນ, ຄຳແນະນຳ, ເຮັດແຈ້ງບັນດາເນື້ອໃນຄຳໝັ້ນສັນຍາ ແລະ ບັນດາບັນຫາທີ່ກ່ຽວຂ້ອງເຖິງ ສັນຍາ.
ປັບປຸງເຄືອຂ່າຍ, ເພີ່ມທະວີກຳລັງຄວາມສາມາດ ແລະ ຍູ້ແຮງວຽກງານສະໜອງຂໍ້ມູນ, ຄາດຄະເນກ່ຽວກັບຕະຫຼາດນຳເຂົ້າ, ສົ່ງອອກ, ຕະຫຼາດພາຍໃນປະເທດ ຂອງບັນດາອົງການແຫ່ງລັດ ທີ່ມີໜ້າທີ່ສະໜອງຂໍ້ມູນດ້ານການຄ້າ, ການລົງທຶນ, ສ້າງຄວາມສະດວກໃຫ້ແກ່ບັນດາວິສາຫະກິດ ຫວຽດນາມ ໃນການວາງແຜນກຳນົດ, ຜັນຂະຫຍາຍຍຸດທະສາດດຳເນີນທຸລະກິດພາຍໃນປະເທດ ແລະ ລົງທຶນໄປຍັງຕ່າງປະເທດ.
(ແຫຼ່ງຄັດຈາກ VOV)