ທ່ານ ຫງວຽນຮົ່ງຮ່າ ຫົວໜ້າສະຖານກົງສູນໃຫຍ່ ຫວຽດນາມ ປະຈຳ Osaka (ພາບ: TTXVN)

ບັນດາວິສາຫະກິດຢູ່ເຂດ Hokuriku ຂອງຍີ່ປຸ່ນ ໄດ້ຕີລາຄາສູງສະພາບແວດລ້ອມແຫ່ງການລົງທຶນ ຢູ່ຫວຽດນາມ ແລະ ມີຄວາມຫວັງຕໍ່ການຮ່ວມມືລະຫວ່າງເຂດນີ້ ກັບ ຫວຽດນາມໃນອະນາຄົດ. ນັ້ນແມ່ນຄຳຢັ້ງຢືນຂອງທ່ານ Mitsuru Mitani, ປະທານສະມາຄົມວິສາຫະກິດ ສົ່ງເສີມການລົງທຶນລະຫວ່າງເຂດHokuriku ແລະ ຫວຽດນາມ ຢູ່ກອງປະຊຸມສະຫຼຸບວຽກງານ ປີ 2021 ຂອງ ສະມາຄົມ.

ກ່າວຄຳເຫັນຕໍ່ໜ້າການນຳວິສາຫະກິດສະມາຊິກ ເກືອບ 30 ທ່ານ, ພ້ອມກັບຜູ້ຕາງໜ້າຂອງ ສະຫະພັນເສດຖະກິດ Hokuriku ແລະ ອົງການຮ່ວມມືສາກົນ ຍີ່ປຸ່ນ (JICA) ເຂດ Hokuriku, ທ່ານ Mitani ໃຫ້ຮູ້ວ່າ ທ່ານມີຄວາມຫວັງຢາກຈັດຕັ້ງການຢ້ຽມຢາມຫວຽດນາມ ໃຫ້ບັນດາວິສາຫະກິດ ຢູ່ເຂດ Hokuriku ເພື່ອແນໃສ່ຊອກຫາກາລະໂອກາດດຳເນີນທຸລະກິດ, ພ້ອມທັງກຽມຄວາມພ້ອມຕ້ອນຮັບບັນດາວິສາຫະກິດ ຫວຽດນາມ ມາຢ້ຽມຢາມ ຍີ່ປຸ່ນ ເພື່ອຊອກຫາຄູ່ຮ່ວມມື ແລະ ເລີ່ມດຳເນີນທຸລະກິດ ຢູ່ຍີ່ປຸ່ນ.

ສ່ວນທ່ານ ຫງວຽນຮົ່ງຮ່າ ຫົວໜ້າສະຖານກົງສູນໃຫຍ່ ຫວຽດນາມ ປະຈຳ Osaka ໄດ້ຕີລາຄາສູງຄວາມມານະພະຍາຍາມ ຂອງ ສະມາຄົມວິສາຫະກິດ ສົ່ງເສີມການລົງທຶນ ລະຫວ່າງເຂດ Hokuriku ແລະ ຫວຽດນາມ ໃນການຮັກສາ ແລະ ຊຸກຍູ້ການພົວພັນລະຫວ່າງເຂດ Hokuriku ແລະ ຫວຽດນາມ. ທ່ານ ຫງວຽນຮົ່ງຮ່າ ໃຫ້ຮູ້ວ່າ ລັດຖະບານ ຫວຽດນາມ ພວມຍູ້ແຮງການຜັນຂະຫຍາຍນະໂຍບາຍດຳລົງຊີວິດຢູ່ຮ່ວມກັບໂຄວິດ - 19, ປະຕິບັດເປົ້າໝາຍຄວບຄູ່ (ທັງປ້ອງກັນຕ້ານໂລກລະບາດໂຄວິດ - 19, ທັງຮັກສາການພັດທະນາເສດຖະກິດ - ສັງຄົມໃຫ້ເປັນປົກກະຕິ”. ໃນໄລຍະທີ່ຜ່ານມາ, ມີສັນຍານທີ່ຕັ້ງໜ້າຫຼາຍຢ່າງ ສະແດງໃຫ້ເຫັນວ່າ ຫວຽດນາມ ຍັງແມ່ນຈຸດນັດພົບທີ່ມີຄວາມດູດດື່ມ, ປອດໄພ ແລະ ນັບມື້ນັບໄດ້ຄວາມເອົາໃຈໃສ່ຈາກນັກລົງທຶນຕ່າງປະເທດ.

(ແຫຼ່ງຄັດຈາກ VOV)