ສະຖາບັນ ຕ້ອງຕັ້ງໜ້າພັດທະນາບັນດາສາຍພົວພັນຮ່ວມມືຄົ້ນຄວ້າ ກັບບັນດາຮາກຖານຄົ້ນຄວ້າວິທະຍາສາດຂອງຂະແໜງກະສິກໍາ; ເອົາໃຈໃສ່ເປັນພິເສດເຖິງການຍົກສູງຄຸນນະພາບການຄົ້ນຄວ້າ, ຜັນຂະຫຍາຍ ແລະ ປະຕິບັດສໍາເລັດບັນດາໂຄງການປະດິດຄິດສ້າງເຕັກໂນໂລຢີ...

ທ່ານນາງປະທານສະພາແຫ່ງຊາດຫງວຽນທິກິມເງິນກ່າວຄໍາເຫັນຢູ່ພິທີ (ພາບ: TTXVN)

ກ່າວຄໍາເຫັນທີ່ພິທີສະເຫຼີມສະຫຼອງວັນສ້າງຕັ້ງສະຖາບັນວິທະຍາສາດຊົນລະປະທານ ຫວຽດນາມ ຄົບຮອບ 60 ປີ ເຊິ່ງຖືກຈັດຂຶ້ນໃນຕອນເຊົ້າວັນທີ 3 ທັນວາ ຢູ່ຮ່າໂນ້ຍ, ທ່ານນາງປະທານສະພາແຫ່ງຊາດຫວຽດນາມ ຫງວຽນທິກິມເງິນ ສະເໜີໃຫ້ ສະຖາບັນວິທະຍາສາດຊົນລະປະທານ ຫວຽດນາມ ສຸມໃສ່ຄົ້ນຄວ້າ, ແກ້ໄຂບັນດາບັນຫາພວມປະເຊີນໜ້າໃນສະພາບການປ່ຽນແປງຂອງດິນຟ້າອາກາດມີການຜັນແປຢ່າງໄວວານັ້ນ ໃຫ້ເປັນຢ່າງດີ ເພື່ອສະໜອງບັນດາບົດວິພາກວິທະຍາສາດຢ່າງທັນການ ປະກອບສ່ວນຊ່ວຍການວາງແຜນກໍານົດນະໂຍບາຍ ກ່ຽວກັບຂະແໜງກະສິກໍາເວົ້າລວມ ແລະ ຊົນລະປະທານເວົ້າສະເພາະ; ຮັບປະກັນຄວາມປອດໄພແກ່ແຫຼ່ງຊັບພະຍາກອນນໍ້າແບບຍາວນານ ຮັບໃຊ້ໃຫ້ແກ່ການພັດທະນາເສດຖະກິດແບບຍືນຍົງ.

        ທ່ານນາງປະທານສະພາແຫ່ງຊາດຫງວຽນທິກິມເງິນ ກໍເນັ້ນໜັກວ່າ ສະຖາບັນ ຕ້ອງຕັ້ງໜ້າພັດທະນາບັນດາສາຍພົວພັນຮ່ວມມືຄົ້ນຄວ້າ ກັບບັນດາຮາກຖານຄົ້ນຄວ້າວິທະຍາສາດຂອງຂະແໜງກະສິກໍາ; ເອົາໃຈໃສ່ເປັນພິເສດເຖິງການຍົກສູງຄຸນນະພາບການຄົ້ນຄວ້າ, ຜັນຂະຫຍາຍ ແລະ ປະຕິບັດສໍາເລັດບັນດາໂຄງການປະດິດຄິດສ້າງເຕັກໂນໂລຢີ; ເພີ່ມທະວີການຮ່ວມມືກັບບັນດາຮາກຖານຄົ້ນຄວ້າ, ບໍາລຸງສ້າງຂອງບັນດາປະເທດໃນໂລກໃຫ້ມີປະສິດທິຜົນ;  ກຽມພ້ອມຮັບເອົາ ແລະ ເປັນເຈົ້າໃນການນໍາໃຊ້ ແລະ ຜະລິດເຕັກໂນໂລຢີໃໝ່, ກ້າວໜ້າ, ທັນສະໄໝ ເພື່ອນໍາສະຖາບັນກາຍເປັນສູນຄົ້ນຄວ້າວິທະຍາສາດຊົນລະປະທານມີຂອບຂະໜາດໃຫຍ່, ມີອິດທິພົນຊື່ສຽງເທື່ອລະກ້າວ ບໍ່ພຽງແຕ່ຢູ່ຫວຽດນາມເທົ່ານັ້ນ  ຫາກໃນລະດັບພາກພື້ນ ແລະ ໃນໂລກ ອີກດ້ວຍ.

        ນະທີ່ນີ້, ທ່ານນາງປະທານສະພາແຫ່ງຊາດຫວຽດນາມ ຫງວຽນທິກິມເງິນ ກໍຕາງໜ້າການນໍາພັກ, ລັດ, ມອບຫຼຽນໄຊ ໂຮ່ຈີມິນ ໃຫ້ສະຖາບັນວິທະຍາສາດຊົນລະປະທານ ຫວຽດນາມ.

(ແຫຼ່ງຄັດຈາກ VOV)