ທີ່ການໂອ້ລົມສົນທະນາ (ພາບ: VNA)

ຕອນເຊົ້າວັນທີ 23 ກັນຍາ (ຕາມເວລາທ້ອງຖິ່ນ), ຢູ່ ນິວຢອກ (ອາ​ເມ​ລິ​ກາ) ທ່ານເລຂາທິການໃຫຍ່, ປະ​ທານ​ປະ​ເທດ ໂຕເລີມ ໄດ້ເຂົ້າຮ່ວມການ​ໂອ້​ລົມສົນທະນາ ໂຕະມົນກັບ ບັນດາວິສາຫະກິດໃຫຍ່ຂອງ ອາເມລິກາ. ເຫດການໂດຍຫ້ອງການການຄ້າ ອາເມລິກາ, ສະພາດຳ​ເນີນທຸລະກິດ ອາເມລິກາ-ອາຊຽນ ແລະ ປະຊາຄົມວິ​ສາ​ຫະ​ກິດຂອງສອງປະເທດ ສົມທົບກັບ​ບັນ​ດາອົງການຂອງ ຫວຽດນາມ ຈັດ​ຂຶ້​ນ.

ກ່າວຄຳເຫັນ​ທີ່​ການ​ໂອ​້​ລົມ​ສົນ​ທະ​ນາ, ທ່ານເລຂາທິການໃຫຍ່, ປະ​ທາ​ນ​ປະ​ເທດ ໂຕ​ເລີມ ຖື​ວ່າ ສອງຝ່າຍຕ້ອງວາງ​ອອກ​ຄວາມ​ຮຽກ​ຮ້ອງສູງກວ່າ ​ຕໍ່ການຮ່ວມມືດ້ານ ເສດຖະກິດລະຫວ່າງ ຫວຽດນາມ ແລະ ອາເມລິກາ: ບໍ່ພຽງແຕ່ເປີດກວ້າງຂອບເຂດ​ດ້ານການຄ້າ ແລະ ການລົງທຶນເທົ່ານັ້ນ, ​ຫາກຍັງ​ຕ້ອງ​ຍົກ​ສູງຄຸນນະພາບການຮ່ວມມື, ລະດັບການເຂົ້າຮ່ວມຂອງວິ​ສາ​ຫະ​ກິດສອງ​ປະ​ເທດ​ເຂົ້າໃນລະບົບຕ່ອງໂສ້ມູນຄ່າຍຸດ​ທະ​ສາດ.

ດ້ວຍຈິດໃຈດັ່ງກ່າວ, ທ່ານເລຂາທິການໃຫຍ່, ປະ​ທານ​ປະ​ເທດ ໂຕເລີມ ສະເໜີໃຫ້ທັງສອງຝ່າຍພ້ອມກັນພັດທະນາວິທະຍາສາດເຕັກໂນໂລຊີ, ​ນະ​ວັດ​ຕະ​ກຳ, ແລະ ​ຍົກ​ສູງ​ກຳ​ລັງ​ແກ່ງ​ແຍ້ງດ້ານອຸດສາຫະກໍາ...

“ພວກຂ້າ​ພະ​ເຈົ້າສືບຕໍ່ລົງທຶນຢ່າງ​ແຮງ​ກວ່າເຂົ້າ​ບັນ​ດາເງື່ອນໄຂພື້ນຖານ ສຳລັບ​ພື້ນ​ຖານເສດຖະກິດທີ່ທັນສະໄໝ. ນັ້ນ​ແມ່ນ​ແຫຼ່​ງ​ຊັບ​ພະ​ຍາ​ກອນ​ມະ​ນຸດ​ທີ່ມ​ີ​ຄຸນ​ນະ​ພາບສູງ, ການສະໜອງພະລັງງານທີ່ໝັ້ນຄົງ, ພື້ນຖານໂຄງລ່າງ​ຄົມ​ມະ​ນາ​ຄົມ logistics ແລະ ພື້ນ​ຖານ​ໂຄງ​ລ່າງດີຈີຕອນ, ຕະຫຼາດທຶນ ແລະ ລະບົບນິເວດນະວັດຕະກຳ. ນີ້ກໍ່​ແມ່ນບັນ​ດາ​ປັດໄຈຕັດສິນເພື່ອໃຫ້​ບັນ​ດາ​ວິ​ສາ​ຫະ​ກິດ ອາ​ເມ​ລິ​ກາ ບໍ່ພຽງແຕ່ມາ ຫວຽດນາມ ເທົ່ານັ້ນ ຫາກຍັງສາມາດຢູ່ໃນໄລຍະຍາວ, ​ເປີດກວ້າງການລົງທຶນ ແລະ ນຳເອົາ​ບັນ​ດາ​ການ​ເຄື່ອນ​ໄຫວ​ທີ່​ນັບ​ມື້​ນັບເພີ່ມ​ຂຶ້​ນສູງ​ເຂົ້າ​ມາ ຫວຽດນາມ ອີກດ​້ວຍ.”

ໃນວັນດຽວກັນ, ທ່ານເລຂາທິການໃຫຍ່, ປະທານປະເທດ ໂຕເລີມ ກໍ່​ໄດ້ຕ້ອນຮັບຜູ້ຕາງໜ້າຂອງ​ກຸ່ມບໍລິສັດເສດຖະກິດ​ແຖວ​ໜ້າໂລກ.