ວັນທີ 28 ມິຖຸນາ, ຢູ່ຮ່າໂນ້ຍ, ຄະນະພັກການທະຫານສູນກາງ, ກະຊວງປ້ອງກັນປະເທດ ຫວຽດນາມ ໄດ້ຈັດຕັ້ງກອງປະຊຸມການທະຫານ-ການເມືອງທົ່ວກອງທັບ, ຕີລາຄາໝາກຜົນວຽກງານການທະຫານ, ການປ້ອງກັນຊາດ 6 ເດືອນຕົ້ນປີ; ຜັນຂະຫຍາຍໜ້າທີ່ 6 ເດືອນທ້າຍປີ 2018.
ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກເຂົ້າຮ່ວມກອງປະຊຸມການທະຫານ-ການເມືອງທົ່ວກອງທັບ
(ພາບ:Thong Nhat – TTXVN)
ເຂົ້າຮ່ວມ ແລະ ກ່າວຄຳເຫັນຊີ້ນຳກອງປະຊຸມ, ທ່ານນາຍົກລັດຖະມົນຕີຫວຽດນາມ ຫງວຽນຊວນຟຸກ ຕີລາຄາສູງບັນດາໝາກຜົນຮອບດ້ານ ເຊິ່ງພະນັກງານ, ນັກຮົບທົ່ວກອງທັບ ປະຕິບັດໄດ້ໃນ 6 ເດືອນຕົ້ນປີ 2018. ໃນໄລຍະຜ່ານມາ, ກອງທັບປະຊາຊົນຫວຽດນາມ ໄດ້ສຸມໃສ່ຍົກສູງຄຸນນະພາບ, ກຳລັງແຮງສູ້ຮົບ, ປະຕິບັດບັນດາມາດຕະການຢ່າງຄົບຊຸດ, ເອົາໃຈໃສ່ເປັນພິເສດເຖິງການປ່ຽນແປງໃໝ່ເນື້ອໃນວຽກງານຝຶກຊ້ອມ, ຕິດພັນກັບພຶດຕິກຳຕົວຈິງໃນການສູ້ຮົບ; ຖືເປັນສຳຄັນ, ຍົກສູງກຳລັງຄວາມສາມາດ ເປັນເຈົ້າຂອງອາວຸດ, ອຸປະກອນເຕັກນິກທັນສະໄໝ…
ທ່ານນາຍົກລັດຖະມົນຕີ ຫງວຽນຊວນຟຸກ ເຫັນດີເປັນເອກະພາບ ຕໍ່ທິດທາງໜ້າທີ່ການທະຫານ, ການປ້ອງກັນຊາດ 6 ເດືອນທ້າຍປີ 2018 ຂອງຄະນະພັກການທະຫານສູນກາງ, ກະຊວງປ້ອງກັນປະເທດວາງອອກ. ນັ້ນແມ່ນ ສືບຕໍ່ກຳແໜ້ນສະພາບການ, ປະຕິບັດການນຳພາຂອງພັກ, ການຄຸ້ມຄອງຂອງລັດ ແລະ ການບໍລິຫານຂອງລັດຖະບານໃຫ້ເຂັ້ມງວດ; ປະຕິບັດວຽກງານເປັນເສນາທິການໃຫ້ພັກ, ລັດ ກ່ຽວກັບໜ້າທີ່ການທະຫານ-ການປ້ອງກັນຊາດເປັນຢ່າງດີ; ຮັກສາການປະຕິບັດຕາມແຜນກຽມພ້ອມສູ້ຮົບໃຫ້ເຂັ້ມງວດ, ເປັນເສນາທິການ, ສົບທົບກັນແກ້ໄຂບັນດາກໍລະນີເກີດຂຶ້ນ ໄດ້ຢ່າງທັນການ, ຊັດເຈນ, ມີປະສິດທິຜົນ; ຍົກສູງຄຸນນະພາບ, ປະສິດທິຜົນຂອງວຽກງານຂົນຂວາຍປະຊາຊົນ, ເອົາໃຈໃສ່ເປັນພິເສດເຖິງບັນດາບໍລິເວນຍຸດທະສາດ, ຈຸດສຸມ, ເຂດຫ່າງໄກສອກຫຼີກ, ເຂດ ຊົນເຜົ່າສ່ວນໜ້ອຍ, ສາສະໜາເວົ້າລວມ; ສ້າງພື້ນຖານປ້ອງກັນຊາດທົ່ວປວງຊົນ ຕິດພັນກັບທ່າຮົບປ້ອງກັນຄວາມສະຫງົບປະຊາຊົນ ແລະ ເຂດປ້ອງກັນໃຫ້ໝັ້ນຄົງ.
(ແຫຼ່ງຄັດຈາກ VOV)