ຕອນເຊົ້າວັນທີ 24 ເມສາ, ຢູ່ສຳນັກງານສະພາແຫ່ງຊາດ, ທ່ານນາງປະທານສະພາແຫ່ງຊາດຫວຽດນາມ ຫງວຽນທິກິມເງິນ ໄດ້ເປັນປະທານພິທີຕ້ອນຮັບຢ່າງເປັນທາງການ ແລະ ດຳເນີນການເຈລະຈາກັບທ່ານປະທານສະພາແຫ່ງຊາດ ສີລັງກາ. ທີ່ການພົບປະເຈລະຈາ, ປະທານສະພາແຫ່ງຊາດ ສອງທ່ານລ້ວນແຕ່ຖືວ່າ ສະພາແຫ່ງຊາດ ແລະ ບັນດາອົງການຈັດຕັ້ງຂອງສະພາແຫ່ງຊາດຂອງສອງປະເທດ ຄວນເພີ່ມທະວີການຕິດຕາມກວດກາ ແລະ ຊຸກຍູ້ການປະຕິບັດບັນດາສົນທິສັນຍາ, ຂໍ້ຕົກລົງທີ່ສອງປະເທດໄດ້ລົງນາມຢ່າງມີປະສິດທິຜົນ; ເພີ່ມທະວີການແລກປ່ຽນຄະນະຜູ້ແທນປ້ອງກັນຊາດ; ຜັນຂະຫຍາຍກົນໄກເຈລະຈາກ່ຽວກັບການປ້ອງກັນຄວາມສະຫງົບຂັ້ນລັດຖະມົນຕີກະຊວງຕຳຫຼວດສອງປີເທື່ອໜຶ່ງ ໂດຍໄວ.

        ກ່ຽວກັບການຮ່ວມມືດ້ານການຄ້າສອງຝ່າຍ, ປະທານສະພາແຫ່ງຊາດສອງທ່ານຖືວ່າ ສອງປະເທດມີຄວາມສາມາດບົ່ມຊ້ອນຮ່ວມມືຢ່າງໃຫຍ່ຫຼວງ, ສູ້ຊົນນຳວົງເງິນການຄ້າສອງສົ້ນໃຫ້ບັນລຸໄດ້ 1 ຕື້ USD ໂດຍໄວ. ພ້ອມກັນນັ້ນ, ຄວນຍູ້ແຮງການຂຸດຄົ້ນ, ໂດຍສະເພາະແມ່ນສຳລັບບັນດາຂົງເຂດຫຼັກແຫຼ່ງ ຄື ນ້ຳມັນອາຍແກັດ, ເຕັກໂນໂລຢີຂໍ້ມູນຂ່າວສານ ແລະ ສື່ສານ, ຕ່ຳແຜ່ນຕັດຫຍິບ, ຢາງພາລາ, ເກີບໜັງ, ພະລັງງານຜະລິດຄືນໃໝ່, ການຂົນສົ່ງທາງອາກາດ ແລະ ທາງທະເລ…      

        ທ່ານນາງປະທານສະພາແຫ່ງຊາດຫງວຽນທິກິມເງິນ ປາດຖະໜາວ່າ ສີລັງກາມີທັດສະນະຕັ້ງໜ້າກວ່າໃນບັນຫາຢູ່ທະເລຕາເວັນອອກ; ສະໜັບສະໜູນຫຼັກໝັ້ນຂອງຫວຽດນາມ ແລະ ອາຊຽນ, ເປັນຕົ້ນແມ່ນໃນບັນດາເນື້ອໃນທີ່ມີລັກສະນະຫຼັກການ ຄື ຄວາມເສລີໃນການເດີນທະເລ ແລະການບິນ, ປະຕິບັດກົດໝາຍສາກົນ, ແກ້ໄຂຄວາມຂັດແຍ້ງໂດຍສັນຕິວິທີ, ປອດການທະຫານຢູ່ທະເລຕາເວັນອອກ.

        ສ່ວນການຮ່ວມມືລັດຖະສະພາລະຫວ່າງສອງປະເທດໃນໄລຍະຈະມາເຖິງ, ປະທານສະພາແຫ່ງຊາດສອງທ່ານຖືວ່າ ສະພາແຫ່ງຊາດສອງປະເທດ ສືບຕໍ່ຮັກສາ ແລະເພີ່ມທະວີການພົບປະແລກປ່ຽນຄະນະຜູ້ແທນຂັ້ນຕ່າງໆ ເພື່ອແນໃສ່ແບ່ງປັນຂໍ້ມູນຂ່າວສານ, ແລກປ່ຽນບົດຮຽນໃນການເຄື່ອນໄຫວລັດຖະສະພາ, ບົດຮຽນໃນການສ້າງກົດໝາຍ ແລະ ຕິດຕາມກວດກາ; ເສີມຂະຫຍາຍບົດບາດຂອງກຸ່ມສະມາຊິກລັດຖະສະພາມິດຕະພາບລະຫວ່າງສອງປະເທດໃຫ້ດີກວ່າໃນເລື່ອງຊຸກຍູ້ການຮ່ວມມືລະຫວ່າງສະພາແຫ່ງຊາດເວົ້າສະເພາະ ແລະ ສອງປະເທດເວົ້າລວມ . ສອງຝ່າຍຄວນຍູ້ແຮງການສົມທົບ ແລະ ສະໜັບສະໜູນເຊິ່ງກັນ ແລະ ກັນຢູ່ບັນດາເວທີປາໄສລັດຖະສະພາສາກົນ ໂດຍສະເພາະແມ່ນ ຢູ່ສະຫະພັນລັດຖະສະພາໂລກ (IPU).

(ແຫຼ່ງຄັດຈາກ VOV)