ທົ່ວໂລກມີຜູ້ຕິດເຊື້ອພະຍາດໂຄວິດ-19 ເກືອບ 335 ລ້ານຄົນ ແລະ ມີຜູ້ເສຍຊີວິດກວ່າ 5,57 ລ້ານຄົນ.
ອາເມລິກາ ຍັງແມ່ນປະເທດຖືກຜົນສະທ້ອນຢ່າງໜັກໜ່ວງທີ່ສຸດຈາກໂລກລະບາດໂຄວິດ-19
(ພາບປະກອບ: THX/TTXVN)
ຕາມເວັບໄຊສະຖິຕິ worldmeters.info ແລ້ວ, ໄລ່ຮອດເວລາ 1 ໂມງຂອງວັນທີ 19 ມັງກອນ (ຕາມເວລາ UTC), ທົ່ວໂລກມີຜູ້ຕິດເຊື້ອພະຍາດໂຄວິດ-19 ເກືອບ 335 ລ້ານຄົນ ແລະ ມີຜູ້ເສຍຊີວິດກວ່າ 5,57 ລ້ານຄົນ. ອາເມລິກາ ຍັງແມ່ນປະເທດຖືກຜົນສະທ້ອນຢ່າງໜັກໜ່ວງທີ່ສຸດຈາກໂລກລະບາດໂຄວິດ-19 ດ້ວຍຜູ້ຕິດເຊື້ອເກືອບ 68,6 ລ້ານຄົນ ແລະ ມີຜູ້ເສຍຊີວິດກວ່າ 877.000 ຄົນ. ນັບແຕ່ກາງເດືອນ ພະຈິກ 2021 ມາຮອດປະຈຸບັນ, ຈຳນວນຜູ້ເສຍຊີວິດຍ້ອນໂລກລະບາດໂຄວິດ-19 ຢູ່ ອາເມລິກາ ໄດ້ເພີ່ມຂຶ້ນຢ່າງລຽນຕິດປະມານ 1.700 ຄົນ/ອາທິດ. ຈຳນວນຜູ້ຕິດເຊື້ອພະຍາດໂຄວິດ-19, ພິເສດແມ່ນໄວຣັດສາຍພັນ Omicron ເພີ່ມຂຶ້ນສູງຢູ່ຫຼາຍລັດ ແລະ ຜູ້ມີພະຍາດຕິດໂຕມີອາການເຈັບໜັກກວ່າ.
ໃນວັນດຽວກັນ, ກອງທຶນ Bill & Melinda Gates ແລະ ອົງການເຄື່ອນໄຫວໃນຂົງເຂດການແພດຊີວະເພື່ອການກຸສົນ ຂອງ ອັງກິດ Wellcome ໄດ້ໃຫ້ຄຳໝັ້ນສັນຍາ ແຕ່ລະຝ່າຍຈະປະກອບເງິນ 150 ລ້ານ USD ເພື່ອຮັບມືກັບໂລກລະບາດໂຄວິດ -19 ກໍຄືເພື່ອປ້ອງກັນ, ສະກັດກັ້ນໂລກລະບາດທີ່ອາດຈະເກີດຂຶ້ນໃນອະນາຄົດ.
ຈຳນວນເງິນປະກອບ 300 ລ້ານ USD ຂອງກອງທຶນ Gates ແລະ ອົງການຈັດຕັ້ງ Wellcome ພຽງແຕ່ແມ່ນຈຳນວນໜ້ອຍ ເມື່ອທຽບໃສ່ຈຳນວນເງິນ 3,5 ຕື້ USD ເຊິ່ງ CEPI ລະດົມໃຫ້ແກ່ແຜນການກະທຳໃໝ່ໃນຮອບເວລາ 5 ປີ.
(ແຫຼ່ງຄັດຈາກ VOV)