ທ່ານນາງ ບຸ່ຍທິມິງຮວ່າຍ, ປະທານຄະນະກຳມະການສູນກາງແນວໂຮມປະເທດຊາດ ຫວຽດນາມ. (ພາບ: VNA)  

ເດືອນ​ຈຸດ​ສຸມ "ເພື່ອຄົນທຸກຍາກ" ປີ 2026 ​ດ້ວຍຫົວຂໍ້ "ຄວາມ​ມາ​ຫາສາມັກຄີ - ແຜ່​ກະ​ຈາຍນ້ຳໃຈ​ຂອງຊາດ, ນ້ຳ​ໃຈ​ພໍ່​ແມ່​ປ​ປະ​ຊາ​ຊົນ" ​ໄດ້​ຮັບ​ການ​ຜັນ​ຂະ​ຫຍາຍ​ພ້ອມ​ດຽວ​ກັບ​ໃນ​ຂອ​ບ​ເຂດທົ່ວປະເທດ ແຕ່ວັນທີ 17 ຕຸລາ ຫາ 18 ພະຈິກ.

ທີ່ພິທີ​ປຸກ​ລະ​ດົມເດືອນ​ຈຸດ​ສຸມ “ເພື່ອຄົນທຸກຍາກ” ປີ 2026 ທີ່ຈັດຂຶ້ນໃນ​ຕອນ​ຄ່ຳວັນທີ 17 ຕຸລາ, ທີ່ ຮ່າໂນ້ຍ, ທ່ານນາງ ບຸ່ຍທິມິງຮວ່າຍ, ປະທານ​ຄະ​ນະ​ກຳ​ມະ​ການສູນ​ກາງແນວໂຮມປະເທດຊາດ ຫວຽດນາມ ໄດ້ເນັ້ນໜັກວ່າ ພັກ, ລັດ ຫວຽດນາມ ຍາມໃດກໍ່ເອົາໃຈໃສ່ເປັນພິເສດຕໍ່ການເບິ່ງ​ແຍງດູແລຊີວິດ​ຂອງ​ປະ​ຊາ​ຊົນ, ຮັບປະກັນຄວາມກ້າວໜ້າ, ຄວາມຍຸຕິທຳໃນ​ສັງ​ຄົມ, ໂດຍສະເພາະແມ່ນສຳລັບ​ຜູ້ທຸກຍາກ, ຜູ້ມີຄວາມສ່ຽງ​ສູງ, ເພື່ອບໍ່ໃຫ້ໃຜຖືກປະໄວ້​ຢູ່ທາງຫຼັງ.

ເພື່ອສືບຕໍ່ເສີມຂະ​ຫຍາຍ​ບັນ​ດາຜົນສຳເລັດ​ທີ່​ບັນ​ລຸ​ໄດ້, ທ່ານນາງ ບຸຍທິມິງຮວ່າຍ ໄດ້ສະເໜີວ່າ:

“ເນື່ອງໃນໂອກາດເດືອນ​ຈຸດ​ສຸມ "ເພື່ອຄົນທຸກຍາກ" ປີ 2026, ​ໂດຍຕາງໜ້າໃຫ້ພັກ, ລັດ, ແນວໂຮມປະເທດຊາດ ຫວຽດນາມ, ຂ້າພະເຈົ້າຮຽກຮ້ອງໃຫ້ບັນດາອົງການ, ວິສາຫະກິດ, ຜູ້ໃຈບຸນໃຈ​ກູ​້​ສົນ, ​ພໍ່​ແມ່​ປະ​ຊາ​ຊົນຊາວ ຫວຽດ​ນາມ ​ທັງ​ຢູ່​ພາຍ​ໃນ ແລະ ຕ່າງປະເທດສືບຕໍ່ຮັກສາມູນເຊື້ອຄວາມສາມັກຄີ, ອຸ້ມ​ຊູຊ່ວຍເຫຼືອເຊິ່ງກັນແລະກັນ, ຜ່ານ​ບັນ​ດາ​ວຽກ​ງານແທດ​ຈິງ, ພ້ອມ​ກັບ​ຮ່ວມ​ແຮງ​ຮ່ວມ​ໃຈ​ເບິ່ງ​ແຍງດູແລ, ໜູນ​ຊ່ວຍຜູ້ທຸກຍາກ ແລະ ຜູ້​ປະ​ສົບ​ກັບ​ຄວາມ​ຫຍຸ້ງຍາກ.”

ທີ່ພິທີ, ມີອົງການຈັດຕັ້ງ, ​ວິ​ສາ​ຫະ​ກິດ ແລະ ຜູ້ໃຈບຸນ​ໃຈ​ກູ້​ສົນ 30 ແຫ່ງ ໄດ້ລົງທະບຽນບໍລິຈາກ​ຈຳ​ນວນເງິນກວ່າ 366 ຕື້ດົ່ງ (ກວ່າ 14 ລ້ານ USD) ເພື່ອ​ຕອບ​ສະ​ໜອງເດືອນ​ຈຸດ​ສຸມ "ເພື່ອຄົນທຸກຍາກ" ປີ 2026.