ຕອນຄ່ຳວັນທີ 21 ມີນາ, ຢູ່ຮ່າໂນ້ຍ, ສະມາຄົມທ່ານໝໍໜຸ່ມ ຫວຽດນາມ ແລະ ຄະນະຊາວໜຸ່ມ ຫວຽດນາມ ໄດ້ຈັດຕັ້ງພິທີຍ້ອງຍໍຊົມເຊີຍ ທ່ານໝໍໜຸ່ມ ຫວຽດນາມດີເດັ່ນປີ 2021 ດ້ວຍຫົວຂໍ້ວ່າ “ທ່ານໝໍໜຸ່ມບົນແນວຮົບປ້ອງກັນ ແລະ ຕ້ານໂລກລະບາດໂຄວິດ-19”.
ພິທີ ຍ້ອງຍໍຊົມເຊີຍທ່ານໝໍໜຸ່ມ 10 ຄົນ ໃນການປ້ອງກັນ ແລະ ຕ້ານພະຍາດໂຄວິດ-19 (ພາບ:TTXVN)
ທ່ານໝໍໜຸ່ມດີເດັ່ນຫວຽດນາມ 10 ຄົນ ໃນປີ 2021 ທີ່ໄດ້ຮັບການຍ້ອງຍໍຊົມເຊີຍ ໃນໂຄງການແມ່ນແພດໝໍທີ່ຕາງໜ້າໃຫ້ທ່ານໝໍໜຸ່ມນັບໝື່ນຄົນ ທີ່ໄດ້ມານະພະຍາຍາມອຸທິດສ່ວນ, ເສຍສະຫຼະ, ບໍ່ຫວາດຫວັ່ນຕໍ່ຄວາມຫຍຸ້ງຍາກ, ຊ້ຳບໍ່ໜຳແມ່ນຄວາມສ່ຽງຕໍ່ຊີວິດຂອງຕົນ, ເພື່ອຟື້ນຟູສຸຂະພາບ ແລະ ກູ້ເອົາຊີວິດໃຫ້ແກ່ຄົນເຈັບໃນໄລຍະທີ່ຜ່ານມາ. ກ່າວຄຳເຫັນທີ່ນີ້, ທ່ານ ຫງວຽນຈ້ອງເງ້ຍ ຫົວໜ້າຄະນະໂຄສະນາສຶກສາສູນກາງ ປາດຖະໜາວ່າ ບັນດາແພດໝໍໜຸ່ມ ຈະສືບຕໍ່ເຜີຍແຜ່ນ້ຳໃຈຄວາມມານະພະຍາຍາມ, ຄວາມກະຕືລືລົ້ນຂອງແພດໝໍໜຸ່ມໃນການເບິ່ງແຍງດູແລ ແລະ ປົກປັກຮັກສາສຸຂະພາບຂອງປະຊາຊົນ, ວຽກງານຄົ້ນຄວ້າວິທະຍາສາດ, ອາສາສະໝັກເພື່ອສຸຂະພາບຂອງປະຊາຄົມ, ເປັນຕົ້ນແມ່ນການເຂົ້າຮ່ວມປ້ອງກັນ ແລະ ຕ້ານໂລກລະບາດໂຄວິດ - 19. ທ່ານກ່າວວ່າ:
ຂ້າພະເຈົ້າຫວັງວ່າ ບັນດາທ່ານໝໍໜຸ່ມຕ້ອງເປັນຜູ້ນຳໜ້າໃນການນຳໃຊ້ການຫັນເປັນດິຈິຕອນໃນການກວດກາ, ການປິ່ນປົວ ແລະ ການເບິ່ງແຍງດູແລຄົນເຈັບ; ເປັນເຈົ້າການຕັ້ງໜ້າໃນການຜັນຂະຫຍາຍການເຄື່ອນໄຫວຮ່ວມມື, ພິເສດແມ່ນການຮ່ວມມືສາກົນ, ປະກອບສ່ວນຍົກສູງກຳລັງຄວາມສາມາດດ້ານວິຊາຊີບຂອງບັນດາສະມາຊິກສະມາຄົມແພດໝໍຫນຸ່ມ, ປະກອບສ່ວນເຂົ້າໃນການກໍ່ສ້າງພື້ນຖານການແພດຂອງ ຫວຽດນາມບົນຫຼັກການວິທະຍາສາດ - ປະເທດຊາດ - ມະຫາຊົນ ແລະ ການເຊື່ອມໂຍງ.